(002MG)
ချင်းပြည်နယ် ပလက်၀မြို့နယ်တွင် အာရက္ခတပ်တော် (AA) က ၎င်းတို့၏ ထောက်ခံစာပါမှသာ ဒေသခံပြည်သူများကို ဝင်/ထွက်သွားလာခွင့်ပြုသည်ဟု သိရသည်။
ပလက်၀မြို့နယ်အတွင်းရှိ ပြည်သူများအနေဖြင့် ပလက်၀မြို့မှ အခြားဒေသများသို့ ခရီးသွားလိုလျှင်သော်လည်းကောင်း၊ အခြားဒေသများမှ ပလက်၀မြို့ပေါ်သို့ ဝင်ရောက်လိုလျှင်သော်လည်းကောင်း အာရက္ခတပ်တော် (AA) ၏ ထောက်ခံစာပါမှသာ ဝင်/ထွက်သွားလာခွင့်ပြုသည်ဟု ပလက်၀ဒေသခံများထံမှ သိရသည်။
“သူတို့က ပလက်ဝမှာ အထွက်လဲ ထောက်ခံစာယူရတယ်၊ ဘယ်သူပဲဖြစ်ဖြစ် အဝင်လဲ ထောက်ခံစာပါမှ လက်ခံတယ်။ ပလက်ဝ မြို့ထဲမှာ AA ဂိတ်တွေ၊ တံတားဂိတ်တွေမှာ ဆမီးကနေဖြစ်ဖြစ် ကျောက်တော်ကနေဖြစ်ဖြစ် ထောက်ခံစာပါမှ လက်ခံတယ်။ ဒါမှမဟုတ်ရင် ဝင်လို့မရဘူး၊ ဆမီးကနေ ပလက်ဝကိုသွားမယ်ဆိုရင်တော့ ဆမီးမြို့က AA အုပ်ချုပ်ရေး အပိုင်းရဲ့ ထောက်ခံစာယူရတယ်၊ မပါရင်တော့ ပြန်ခေါက်ခိုင်းတယ်” ဟု လုံခြုံရေးအရ အမည်မဖော်လိုသူ ပလက်ဝ ဒေသခံတစ်ဦးကပြောသည်။
အာရက္ခတပ်တော် (AA) သည် ၁၀၂၇ စစ်ဆင်ရေးနှင့်အတူ ချင်းပြည်နယ် ပလက်၀မြို့နယ်ကို ၂၀၂၃ ခုနှစ် နို၀င်ဘာ ၁၃ ရက်နေ့က စတင်ထိုးစစ်ဆင်တိုက်ခိုက်ခဲ့ပြီးနောက် ၂၀၂၄ ခုနှစ် ဇန်နဝါရီ ၁၄ ရက်နေ့တွင် ပလက်၀မြို့နယ်တစ်ခုလုံး သိမ်းပိုက်နိုင်ခဲ့သည်။
ထို့ကဲ့သို့ ပလက်၀မြို့ကို သိမ်းပိုက်ထိန်းချုပ်ပြီးနောက်ပိုင်းတွင် အာရက္ခတပ်တော် (AA) က ပလက်၀မြို့နယ်တွင် အုပ်ချုပ်ရေးလုပ်ငန်းစဉ်များအကောင်အထည်ဖော်ဆောင်လာခဲ့ခြင်းဖြစ်သည်။
ပလက်၀မြို့ပေါ်တွင် နေထိုင်ကြသော ဒေသခံပြည်သူများအနေဖြင့် ကျေးလက်ဒေသနှင့် နယ်စပ်ဘက်ကို ခရီးသွားလိုပါက မြို့ပေါ်ရှိ AA မှခန့်အပ်ထားသော အုပ်ချုပ်ရေးမှူးများထံသို့ ကျပ်ငွေ ၁၀၀၀ ဖြင့် ထောက်ခံစာများယူရသည်ဟု သိရသည်။
ထောက်ခံစာမပါဘဲ ခရီးသွားပါက AA တပ်ဖွဲ့၏ စစ်ဆေးဂိတ်များကို ဖြတ်သန်းခွင့်မရှိဘဲ ပြန်လှည့်ခိုင်းသည်ဟု ဒေသခံများထံမှ သိရသည်။
“ပလက်၀မြို့ကနေ အိန္ဒိယနယ်စပ်ဘက်ကိုလာရင်လည်း AA ရဲ့ထောက်ခံစာယူရတယ်၊ အဲဒါမပါရင် သွားလို့မရဘူး” ဟု ပလက်၀ဒေသခံတစ်ဦးက ပြောသည်။
ပလက်ဝမြို့ပေါ်ရှိ ဒေသခံအများစုသည် တိုက်ပွဲကြောင့် စစ်ဘေးတိမ်းရှောင်ရာမှ နေရပ်မပြန်လာကြသေးဘဲ ယခုလက်ရှိ မြို့ပေါ်တွင်အိမ်ထောင်စု ၃၀၀ ဝန်းကျင်ခန့်သာရှိသည်ဟု သိရသည်။
တချိန်တည်းမှာပဲ ပလက်၀မြို့နယ်ထဲက ဒေသခံများ၏ ပိုင်ဆိုင်မှုစာရင်း၊ အိမ်ထောင်စုစာရင်းများကို AA က ကောက်ခံမှုများလည်းရှိနေကြောင်း သိရသည်။
