CDF-Tonzang က ၎င်းလက်နက်ခဲယမ်းများ ပြန်လည်အပ်နှံရန် သတိပေး
(004SS)
ချင်းပြည်နယ်၊ တီးတိန်မြို့နယ်၊ Geelzang ရွာရှိ People’s Defense Army (PDA) ၏ တပ်စခန်းတစ်ခုကို Zomi Revolutionary Army-Eastern Command (ZRA-EC) က ဝင်ရောက်ပစ်ခတ်တိုက်ခိုက်ပြီး လက်နက်ခဲငယ် ၁၅ လက်နှင့် ခဲယမ်းများ သိမ်းဆည်းခဲ့ကြောင်း သိရသည်။
မတ်လ ၂၂ ရက်နေ့တွင် ဖြစ်ပွားခဲ့သော အဆိုပါစီးနင်းမှုအတွင်း ZRA-EC ဘက်မှ လက်နက် ၁၅ လက်နှင့် ကျည်ဆန် အမြောက်အများ၊ ဗုံးသီးများ သိမ်းဆည်းရမိခဲ့ကြောင်း ZRA-EC အဖွဲ့ဝင် Peter Kim thang က ၎င်း၏ လူမှုကွန်ယက်စာ မျက်နှာတွင် ဖော်ပြသည်။
“မနေ့က Geelzang က PDA စခန်းကို သွားတိုက်တာ RPG ရော လက်နက်ခဲယမ်းအမြောက်အများရခဲ့တယ်” ဟု ဗီဒီယိုဖိုင်၊ ဓါတ်ပုံနှင့်တကွ Peter Kim Thang က ရေးသားဖော်ပြထားသည်။
အဆိုပါဖြစ်စဉ်နှင့် ပတ်သက်၍ CDF-Tonzang က ယမန်နေ့ညနေပိုင်းတွင်ကြေညာချက်ထုတ်ပြန်ပြီး ZRA-EC အနေဖြင့် သိမ်းယူသွားသော လက်နက်ခဲယမ်းများကို မူလပိုင်ရှင်ဖြစ်သည့် PDA ထံသို့ အမြန်ဆုံး ပြန်လည်အပ်နှံရန် သတိပေးခဲ့သည်။
အကယ်၍ သတ်မှတ်ထားသည့်အတိုင်း ပြန်လည်အပ်နှံခြင်းမရှိပါက ချင်းလဲန်းကောင်စီ ပူးပေါင်းတပ်ဖွဲ့များအနေဖြင့် လိုအပ်သလို ပြန်လည်တုံ့ပြန် ဆောင်ရွက်သွားမည်ဖြစ်ကြောင်း CDF-Tonzang ကပြင်းထန်စွာ သတိပေးထားသည်။
