တီးတိန်မြို့သိမ်းနိုင်ရေးအတွက် “နောက်ဆုံးလှိုင်း အိမ်ပြန်လှိုင်း” ကမ်ပိန်းမှာ ၇ ရက်တွင်း ဒေါ်လာ ၁ သိန်းကျော်ရရှိ

(006SV)

ချင်းပြည်နယ်မြောက်ပိုင်း၊ တီးတိန်မြို့သိမ်းစစ်ဆင်ရေးကို မကြာမီဖော်ဆောင်တော့မည်ဖြစ်ရာ “နောက်ဆုံးလှိုင်း အိမ်ပြန်လှိုင်း” ရန်ပုံငွေ ကမ်ပိန်း ၇ ညတွင် ဒေါ်လာ ၁ သိန်းကျော်ကို ထောက်ပံ့ကူညီမှု ရရှိထားကြောင်း PDF – Zoland ထံမှ သိရသည်။

“အောက်ချင်းငှက်တွေ သူတို့ အသိုက်၊ သူတို့ ပြန်ဖို့ အချိန်ရောက်ပြီဆိုတဲ့‌ ခေါင်းစဉ်နဲ့ပေါ့နော်။ ရန်ပုံငွေ ရှာရခြင်းဖြစ်တယ်။ အဲဒီအတွက် ကျနော်တို့ မြို့သိမ်းစစ်ဆင်ရေး လုပ်ဖို့လိုတယ်။ အများပြည်သူတွေအနေနဲ့ အခုကာလမှာ မြို့သိမ်းစစ်ဆင်ရေးက အခြေအနေပေးနေပြီဆိုတော့ တော်လှန်ရေးကို ပြည်သူတွေအနေနဲ့ ထောက်ပံ့ကူညီပေးစေလိုပါတယ်။ များများထောက်ပံ့လေ အမြန်ဆုံး ကိုယ့်အိမ်ကို မြန်မြန်ပြန်နိုင်မှာဖြစ်ပါတယ်” ဟု PDF – Zoland ၊ ပြောရေးဆိုခွင့်ရှိသူ ကိုရောဘတ်က ပြောသည်။

နောက်ဆုံးလှိုင်း အိမ်ပြန်လှိုင်း ရန်ပုံငွေကမ်ပိန်းသည် မြို့သိမ်းစစ်ဆင်ရေးအတွက် စားနပ်ရိက္ခာပိုင်းနှင့် လက်နက်ခဲယမ်းများ ဖြည့်တင်းနိုင်ရေး အဓိက ရည်ရွယ်လုပ်ဆောင်ခြင်းဖြစ်ကြောင်း သိရသည်။

ယင်းကမ်ပိန်းကာလ ၇ ရက်အတွင်း ဒေါ်လာ ၁ သိန်း ၂ သောင်းခန့် ရရှိထားပြီးဖြစ်ကြောင်း၊ ကမ်ပိန်းမှာ နေ့စဉ်ဖော်ဆောင်ခြင်းမျိုးမဟုတ်ပဲ ကမ်ပိန်းရက်များကို ရက်ခြားနား၍ ဖော်ဆောင်ခြင်းဖြစ်ကြောင်း သိရသည်။

မြို့သိမ်းစစ်ဆင်ရေးကို မကြာမီ အကောင်အထည်ဖော်တော့မည်ဟူ၍ ပြောနိုင်သော်လည်း မည်သည့်အချိန်တွင် ဖော်ဆောင်မည်ကို ပြော၍မရသေးကြောင်း PDF – Zoland ပြောရေးဆိုခွင့်ရှိသူက ပြောသည်။

ချင်းညီနောင်အဖွဲ့သည် ၂၀၂၄ ခုနှစ်အတွင်း ချင်းပြည်နယ်ကို စစ်ကောင်စီကင်းစင်ရေး စစ်ရေးရည်မှန်းချက် ချမှတ်ထားကြောင်း ထုတ်ပြန်ထားသည်။

မေလကုန်ပိုင်းက တီးတိန်မြို့ပေါ်ရှိ စစ်ကောင်စီစခန်းများကို ချင်းညီနောင် စစ်ဆင်ရေးအဖြစ် PDF – Zoland နှင့် CNDF တို့က တိုက်ခိုက်ခဲ့ရာ စစ်ကောင်စီအထိုင်ချတပ်စွဲသည့် မိုင်ခရိုဝေ့စခန်းနှင့် လျပ်စစ်ရုံးတို့ကို သိမ်းနိုင်ပြီး စစ်သုံ့ပန် ၉ ဦးကို ဖမ်းဆီးရမိခဲ့သည်။

ထိုစစ်ဆင်ရေးသည် ချင်းလဲန်းကောင်စီပူးပေါင်းတပ်များက ကျီခါးနှင့် တွန်းဇံမြို့ကို အပြီးသတ်သိမ်းပိုက်ပြီး ၁ ရက်အကြာတွင် ဖော်ဆောင်ခဲ့ခြင်းဖြစ်သည်။

တီးတိန်မြို့တွင် စစ်ကောင်စီ၏ ခလရ – ၂၆၉ တပ်ရင်း အခြေစိုက်ထားပြီး မြို့ပေါ်နေရာတချို့တွင် စစ်ကောင်စီအထိုင်ချစခန်းများရှိသည်။