ချင်းပြည်နယ်၊ ဖလမ်းမြို့ပေါ်က မြို့နယ် ပညာရေးမှူးရုံးမှာ ဇန်နဝါရီလ ၃၁ ရက်နေ့ နံနက်ပိုင်းက Non-CDM ဝန်ထမ်းတွေကို လစာပေးဖို့ အစည်းအဝေးလုပ်နေစဉ် ဓားပြတိုက်ခံခဲ့ရပြီး ဝန်ထမ်းတွေကိုပေးမယ့် လစာငွေကျပ်သိန်း ၈၀၀ ကျော် ပါသွားတယ်လို့ သိရပါတယ်။
ဖလမ်းမြို့နယ်ပညာရေးမှူးရုံးမှာ အစည်းအဝေးလုပ်နေစဉ် မျက်နှာဖုံးစွပ်ထားသူ ၄ ဦးက ပစ္စတိုသေနတ်နဲ့ ဝင်ရောက်လာကာ လစာပေးမယ့် ငွေကျပ် သိန်း ၈၀၀ ကို လုယူသွားတာဖြစ်တယ်လို့ သိရပါတယ်။
ဒီကိစ္စနဲ့ပတ်သက်ပြီး ဖလမ်းမြို့ခံတစ်ဦးက “အစည်းဝေးလုပ်နေတဲ့အချိန် လူ ၄ ယောက်ဝင်လာတယ်၊ သူတို့က Mask တပ်ထားတာ လက်ထဲမှာတော့ ပစ္စတိုသေန တ်ကိုင်ထားကြတယ်၊ ပြီးတော့ ပညာရေးမှုးကိုခေါ်သွားတယ်။ အဲ့အချိန်မှာ သူတို့က လစာအတွက်ပိုက်ဆံတွေကို ရေတွက်နေတဲ့အချိန်၊ ငွေကို ကုန်ယူသွား မသွားတော့ မသိဘူး။ ဆာလာအိတ်အြပည့်နီးပါး တသောင်းတန်အသစ် ဘယ်လောက်ပါသွားလည်းဆိုတာ မသိရဘူး” လို့ ပြောပါတယ်။
ဖလမ်းမြို့နယ်မှာ စစ်ကောင်စီလက်အောက် တာဝန်ထမ်းဆောင်တဲ့ Non-CDM ပညာရေးဝန်ထမ်း ၆၀၀ လောက်ရှိတယ်လို့သိရပြီး သူတို့ကို လစာငွေထုတ်ပေးဖို့ ပညာရေးမှူးရုံးမှာ အစည်းအဝေးလုပ်နေတဲ့အချိန်မှာ လုယူခံရတာဖြစ်ပါတယ်။
ဓားပြတိုက်သွားတဲ့သူတွေဟာ ဘယ်သူဘယ်ဝါဖြစ်တယ်ဆိုတာကိုတော့ မသိရပဲ အဲဒီဖြစ်စဉ်ဖြစ်ပြီးနေက်မှာတော့ စစ်ကောင်စီတပ်သားတွေရောက်ရှိလာပြီး စစ်ဆေးမှုတွေပြုလုပ်ခဲ့သလို ဖလမ်းမြို့ပေါ်မှာလည်း လုံခြုံရေးတင်းကြပ်ထားတယ်လို့ သိရပါတယ်။
