(005MK)
မီဇိုရမ်ပြည်နယ် Sairang/Sihhmui မှ အိန္ဒိယ-မြန်မာနယ်စပ် Zorinpui အထိ ရထားလမ်းဖောက်လုပ်မည့်စီမံကိန်း ပဏာမစစ်တမ်းကောက်ယူမှု ပြီးစီးပြီဟု မီဇိုရမ်အထက်လွတ်တော်အမတ် Pu K.Vanlalvena ကပြောသည်။
မီဇိုရမ်အထက်လွတ်တော်အမတ် Pu K. Vanlalvena သည် ပြည်နယ်၏ မြို့တော်အနီး Sairang/Sihhmui ရထား ဘူတာမှတဆင့် မီဇိုရမ်ပြည်နယ်တောင်ပိုင်း လောင်တလိုင်ခရိုင် မြန်မာနယ်စပ် Zorinpui အထိ ရထားလမ်း ဖောက်လုပ်ရန် အိန္ဒိယဗဟိုအစိုးရထံ ယခင်ကတည်းကတင်ပြတောင်းဆိုချက်ကို ပိုမိုမြန်ဆန်စွာဆောင်ရွက်နိုင်ရေးအတွက် ရထားပို့ဆောင်ရေးဝန်ကြီးကို မကြာသေးခင်ကတွေ့ဆုံဆွေးနွေးခဲ့သည်ဟု All India Radio News က ဖော်ပြသည်။
ထိုသို့တွေ့ဆုံရာမှာ ရထားပို့ဆောင်ရေးဝန်ကြီးက Sairang/Sihhmui မှ Zorinpui အထိ ရထားလမ်းဖောက်မည့် စီမံကိန်းနှင့်ပတ်သက်၍ ပဏမစစ်တမ်းကောက်ယူမှုပြီးဆုံးပြီဖြစ်ကြောင်း၊ သို့သော်လည်း မြေပုံကိုတော့ နောက်ဆုံး အတည်ပြုချက်မရသေးကြောင်း ပြောဆိုခဲ့သည်ဟု Pu K. Vanlalvena ကပြောသည်။
အဆိုပါ ပဏာမစစ်တမ်းကောက်ယူချက်အရ Sairang/Sihhmui ရထားဘူတာ မှ မြန်မာနယ်စပ် Zorinpui အထိ ကီလိုမီတာ ၂၂၃ ရှည်လျားမည့် ရထားလမ်း ဖောက်လုပ်ရမည်ဟုသိရသည်။
ရထားလမ်းဖောက်လုပ်ပြီးစီးပါက မီဇိုရမ် ပြည်နယ်မှ ချင်းပြည်နယ် ပလက်ဝမြို့ ထိုမှတဆင့် ခရိုင်ပြည်နယ် စစ်တွေမြို့ဆိပ်ကမ်းအထိ ဆက်သွယ်နိုင်မည့် Kaladan Multi-Modal Transit Transport Project (KMMTTP) အတွက်လည်း များစွာအကျိုးရှိမည်ဟုသိရသည်။
ယခုလက်ရှိတွင် အိန္ဒိယပြည်မဘက်နှင့် မီဇိုရမ်ပြည်နယ်တို့ ဆက်သွယ်နိုင်မယ့် Sairang/ Sihhmui ရထားလမ်းစီမံကိန်းမှာ ပြီးစီးပြီဖြစ်ကာ ဇူလိုင်လ ၃၁ ရက်မတိုင်ခင် ဖွင့်လှစ်နိုင်မည်ဟု ယုံကြည်ကြောင်း ၎င်းကပြောသည်။ လက်ရှိမှာတော့ ပြည်မဘက်မှ ရထားများ Sairang/Sihhmui ဘူတာသို့ အစမ်းပြေးဆွဲနေပြီဖြစ်သည်။
