မီဇိုရမ်ဝန်ကြီးချုပ်အကြံပေးပုဂ္ဂိုလ်ဦးဆောင်သော ငြိမ်းချမ်းရေးအကျိုးဆောင်အဖွဲ့ ရိခေါဒါရ်မြို့သို့သွားရောက်

(005MK)

မီဇိုရမ်ပြည်နယ် ဝန်ကြီးချုပ်၏ ဦးဆောင်မှုဖြင့် ဖွဲ့စည်းထားသော Advocacy Group for peace ငြိမ်းချမ်းရေးအကျိုးဆောင်အဖွဲ့သည် CNO/CNDF နှင့် CDF-Hualngoram တို့တိုက်ပွဲဖြစ်ပွားရာ ချင်းပြည်နယ် ဖလမ်းမြို့နယ် ဟွာလ်ငိုးရမ်းဒေသ ရိခေါဒါရ်မြို့သို့ သွားရောက်ခဲ့ကြသည်ဟုသိရသည်။

မီဇီုရမ်ဝန်ကြီးချုပ်အကြံပေးပုဂ္ဂိုလ် ပြည်နယ်လွတ်တော်အမတ် Pu Lalmuanpuia Punte ဦးဆောင်သော ငြိမ်းချမ်းရေးအကျိုးဆောင်အဖွဲ့သည် ဇူလိုင် ၆ ရက်နေ့က ရိခေါဒါရ်မြို့နှင့် ဇိုခေါထာရ်ကျေးရွာသို့သွားရောက်ပြီး CNDF နှင့် CDF-Hualngoram တာဝန်ရှိသူများနှင့် တွေ့ဆုံခဲ့ကြသည်ဟု All India Radio News က ဖော်ပြသည်။

ထိုသို့တွေ့ဆုံရာမှာ ညီအကိုအချင်းချင်းကြား ပြန်လည်ခြေဖျက်၍မရသော အမှားမျိုးကျူးလွန်ခြင်းမပြုကြရန် နှင့် အမျိုးသမီးနှင့် ကလေးငယ်များအပေါ် အပြစ်ကျူးလွန်ခြင်းမလုပ်မိစေရန် ငြိမ်းချမ်းရေးအကျိုး ဆောင်အဖွဲ့ခေါင်းဆောင် Pu Lalmuanpuia Punte က မှာကြားခဲ့သည်ဟုသိရသည်။

ထို့အပြင် မီဇိုရမ်အစိုးရအနေဖြင့်လည်း အဖွဲ့အစည်း ၂ ခုအကြား ပဋိပက္ခများအဆုံးသတ်ကာ ငြိမ်းချမ်းရေးပြန်လည် ရရှိစေရေးအတွက် တတ်နိုင်သည့်ဘက်မှ ကူညီဆောင်ရွက်ပေးရန်အဆင်သင့်ရှိကြောင်း ဝန်ကြီးချုပ်အကြံပေးပုဂ္ဂိုလ်က ပြောဆိုခဲ့သည်။

ယခုခရီးစဉ်တွင် Pu Lalmuanpuia Punte နှင့်အတူ မီဇိုးကျောင်းသားသမဂ္ဂ (MZP) ဥက္ကဌ Pu H. Lalthianghlima, တွဲဖက်အတွင်းရေးမှူး Lalhmingsanga တို့လည်း ပါဝင်သည်ဟု သိရသည်။

HPO/CDF-Hualngoram ထိန်းချုပ်ထားသော အိန္ဒိယ-မြန်မာနယ်စပ်ကုန်သွယ်ရေးစခန်းတည်ရှိရာ ရိခေါဒါရ်မြို့ကို CNO/CNDF က ဝင်ရောက်တိုက်ခိုက်ရာမှာ ဇူလိုင် ၅ ရက်နေ့က ထိန်းချုပ်နိုင်ခဲ့ပြီး တိုက်ပွဲကြောင့် ရိခေါဒါရ်မြို့က ပြည်သူ ၃၀၀၀ ကျော် မီဇိုရမ်ပြည်နယ်ဘက် ထွက်ပြေးတိမ်းရှောင်ခဲ့ကြရသည်ဟု သိရသည်။

မီဇိုရမ်ပြည်နယ်က ဗဟိုမီဇိုးလူငယ်များအသင်း (CYMA) ခေါင်းဆောင်များကလည်း ယခုဖြစ်စဉ်နှင့်ပတ်သက်၍ CNO/CNDF နှင့် HPO/CDF-Hualngoram ခေါင်းဆောင်များကို ဇူလိုင်လ ၅ ရက်နေ့ညက တွေ့ဆုံပြီး နှစ်ဖက်တပ်ဖွဲ့ များအပစ်ခတ်ရပ်စဲကြရန် ဆွေးနွေးခဲ့ကြသည်ဟုသိရသည်။