ချင်းပြည်နယ်၊ မတူပီမြို့နယ်၊ ခြန်းပြန်ရွာမှ အမျိုးသမီးငယ်တစ်ဦးအပါအဝင် လူငယ် ၅ ဦးကို ပြီးခဲ့သည့် သြဂုတ်လ ၂၀ ရက်နေ့နှင့် ၂၂ ရက်နေ့များတွင် စစ်ကောင်စီမှ ဖမ်းဆီးခေါ်ဆောင်သွားကြောင်း သိရသည်။
လက်ရှိအချိန်အထိ အမျိုးသမီးငယ်မှလွဲ၍ ကျန်လူငယ် ၄ ဦးမှာ မိသားစုဝင်များနှင့် အဆက်အသွယ်မရကြသေးသလို မည်သည့်နေရာတွင် ဖမ်းဆီးထားသည်ကိုလည်း မသိရှိရသေးကြောင်း ၎င်းတို့နှင့်နီးစပ်သူ မတူပီဒေသခံတစ်ဦးမှ ပြောသည်။
“၂၀ ရက်နေ့က ၄ ယောက်၊ ဒီနေ့က ၁ ယောက်ဖမ်းတာ၊ အမျိုးသမီးငယ်ကလွဲပြီး ကျန်တဲ့သူတွေ အခုထိ ပြန်မလွှတ်သေးဘူး၊ သူတို့ကို ရဲစခန်းကိုလည်း မပို့သေးဘူး။ ဒီနေ့နဲ့ဆိုရင် ၃ ရက်ရှိပြီ၊ ဘယ်မှာထားကြမှန်းလဲ မသိရတဲ့အပြင် ဘာကြောင့်ဖမ်းလဲဆိုတာ မသိရဘူး၊ သူတို့ကို ဂိတ်မှာဖမ်းတာ၊ ၅ ယောက်စလုံးက တစ်ရွာထဲသားတွေပဲ” ဟု ၎င်းကပြောသည်။
ဖမ်းဆီးခံရသည့်အထဲမှ အမျိုးသမီးငယ်မှာ မလဲ့လဲ့ဝင်းဆိုသူဖြစ်ပြီး အဖမ်းခံရသည့် ဩဂုတ်လ ၂၀ ရက်နေ့ ညနေ ၆ နာရီတွင် ပြန်လည်လွှတ်ပေးခဲ့သော်လည်း ကျန်လူငယ် ၄ ဦးကိုမူ ဆက်လက်ဖမ်းဆီးထားဆဲဖြစ်ကြောင်း သိရသည်။
ခြန်းပြန်ရွာမှ အဖမ်းခံရသော လူငယ် ၅ ဦးမှာ မလဲ့လဲ့ဝင်း၊ ကိုဒီဇင်ထန်း၊ ကိုထယ်တွီး၊ ကိုထောင်ပိန်း၊ ကိုစန်သိန်း တို့ဖြစ်ကြပြီး မင်းတပ်စစ်ဆေးရေးဂိတ်နှင့် ဖနိုင်ရွာနှင့် မတူပီအကြားက ဗျုဟာစစ်ဆေးရေးဂိတ်တို့တွင် အဖမ်းခံရခြင်းဖြစ်ပြီး ခြန်းပြန်ရွာသည် မတူပီမြို့မှ မိနစ်အနည်းငယ်သာ ကွာဝေးသည်။
အလားတူ ဧပြီလ ၇ ရက် ၈ ရက်နေ့များတွင် စစ်အာဏာရှင်ဆန့်ကျင်ရေးလှုပ်ရှားမှုနှင့် CDM လှုပ်ရှားမှုတို့တွင် ပါဝင်ကြသည်ဟု သံသယရှိသူ မတူပီမြို့မှ လူငယ် ၅ ဦးကိုလည်း စစ်ကောင်စီတပ်ဖွဲ့ဝင်များက ဖမ်းဆီးခဲ့ပြီး လက်ရှိအချိန်ထိ ပြန်လွတ်ပေးခြင်းမရှိသေးကြောင်းကိုလည်း သိရသည်။
