စစ်ကိုင်းတိုင်း ကလေးမြို့မှ ချင်းပြည်နယ် တီးတိန်မြို့နယ် အိန္ဒိယ-မြန်မာအမှတ် ၂ နယ်စပ်ကုန်သွယ်ရေးလမ်းကြောင်းအ တိုင်း စစ်ကူတက်လာသည့် စစ်ကောင်စီဖွဲ့သည် လမ်းခုလပ်တွင်ခြုံခိုတိုက်ခိုက်ခံရပြီး ၁၀ ဦးသေဆုံးခဲ့ကြောင်း ချင်းပြည်သူ့ ကာကွယ်ရေးပူးပေါင်းတပ်ဖွဲ့မှ CDM-Siyin တပ်ဖွဲ့ကထုတ်ပြန်သည်။
တီးတိန်မြို့နယ် ကလေး-တီးတိန်လမ်း ဟိန်ဇင်နှင့် သိုင်ငင်းကျေးရွာအကြားတွင် ရှေ့ဆက်မတိုးနိုင်ပဲ ပိတ်မိနေသည့် စစ်ကောင်စီတပ်ဖွဲ့အား ကူညီရန် ယနေ့နံနက်ပိုင်း ၁၀ နာရီခန့်က ကလေးမြို့မှတက်လာသော စစ်ကား ၃ စီးနှင့် စက်သေနတ်ပါကားအသေး ၂ စီးကို ချင်းပြည်သူ့ကာကွယ်ရေးတပ်ဖွဲ့များဖြစ်သည့် CNA, CDM Siyin, PDF-Zoland, Kalay PDF 3, Kalay PDF 9, Zomi PDF, Zongam Army, CDF-KKG-2 စသည်တို့မှ ခြုံခိုတိုက်ခိုက်ခဲ့ရာတွင် စစ်ကောင်စီဘက်မှ ၁၀ ဦးသေဆုံးကာ အမြောက်အများဒါဏ်ရာရရှိခဲ့ကြောင်း CDM-Siyin တပ်ဖွဲ့မှပြန်ကြားရေးတာဝန်ခံကပြောသည်။
“ပိတ်မိနေတဲ့ စစ်ကောင်စီတပ်ကို စစ်ကူဖို့အတွက် ဒီနေ့ စကစက ကားသုံးစီးနဲ့ စက်သေနတ်ပါတဲ့ ကားအသေး ၂ စီး ကလေးမြို့ကနေတက်လာတယ်။ ကျွန်တော်တို့က ကြားထဲကနေဝင် တိုက်လို က်တယ်။ သူတို့ဖက်က အထိနည်းနည်းနာ တော့ သူတို့က ချက်ခြင်းပြန်ခေါက်သွားတယ်။ အနည်းဆုံး ၁၀ ယောက်ထက်မနည်း လုံးဝထိထားတယ်။ အမြောက်အများ ဒဏ်ရာရထားပေါ့။ ကျွန်တော်တို့ ဖက်ကတော့ အထိအခိုက်မရှိပါဘူး” CDM-Siyin မှ တာဝန်ရှိသူတစ်ဦးက ပြောသည်။
အိန္ဒိယ-မြန်မာနယ်စပ်ကုန်သွယ်ရေး၏ အဓိကလမ်းကြောင်းတစ်ခုဖြစ်သည့် ကလေး-တီးတိန်ကားလမ်းတွင် ဇန်နဝါရီလ ၁၂ ရက်နေ့ကစ၍ ကလေးမြို့မှ ချင်းတောင်ဘက်သို့ အင်အား ၁၀၀ ကျော်ရှိသည့် စစ်ကောင်စီတပ်ဖွဲ့များ စစ်ကြောင်းချီ လာပြီး ထေးဇန်ကျေးရွာတွင် ညအိပ်တည်းခိုခဲ့ကြပြီနောက် ဇန်နဝါရီလ ၁၃ ရက်နေ့ကစတင်ပြီး ချင်းပြည်သူ့ကာကွယ်ရေး မဟာမိတ်တပ်ဖွဲ့များနှင့် တိုက်ပွဲစတင်ဖြစ်ပွားခဲ့သည်ဟု သိရသည်။
ဇန်နနဝါရီလ ၁၃ ရက်နေ့ကစ၍ ကလေး-တီးတိန်လမ်းမပေါ်တွင် စစ်ကောင်စီတပ်နှင့် ချင်းပြည်သူ့ကာကွယ်ရေးပူးပေါင်း တပ်ဖွဲ့များ နေ့စဉ်ရက်ဆက်တိုက်ပွဲဖြစ်ပွားနေပြီး စစ်ကောင်စီဘက်က ဇန်နဝါရီလ ၁၅ ရက်နေ့က ဂျက်တိုက်လေယာဉ်ပါ အသုံးပြုတိုက်ခိုက်ခဲ့သည်။
ထို့အပြင် ကလေးတက္ကသိုလ်ဝင်းအတွင်းမှ ဘီးတပ်အမြောက်လက်နက်ကြီးဖြင့် ချင်းတောင် ဘက်သို့ စဉ်ဆက်မပြတ်ပစ်ခဲ့သည်။
ကလေး-တီးတိန်ကားလမ်းတလျှောက်တိုက်ပွဲများဖြစ်ပွားနေသည့်အတွက် ယာဉ်လိုင်းပြေးဆွဲမှုများလည်းရပ်နားကာ ကုန်စည်စီးဆင်းမှုလည်းရပ်တန့်နေသည်ဟု သိရသည်။
စစ်ကောင်စီတပ်မှ ချင်းတောင်ဘက်သို့ အင်အားဖြည့်တိုက်ခိုက်နေစဉ်တွင် ယမန်နေ့ (ဇန်နဝါရီလ ၁၆) ရက်နေ့ည ၇ နာရီဝန်းကျင်ခန့်ကစ၍ ကလေးမြို့အနောက်ဘက် တာဟန်းရပ်ကွက်ဘက်တွင် စစ်ကောင်စီတပ်ဖွဲ့နှင့် (မြို့ပေါ် ပြောက်ကျားအဖွဲ့) တို့ အပြန်အလှန်ပစ်ခတ်မှုဖြစ်ပွားကာ စစ်ကောင်စီဘက်က ၂ ဦးသေဆုံးကြောင်း ကလေးမြို့နယ် ပြည်သူ့ကာကွယ်ရေးအဖွဲ့က ထုတ်ပြန်သည်။
အဆိုပါပစ်ခတ်မှုအတွင်း စစ်ကောင်စီဘက်မှ လက်နက်ကြီးပစ်ခတ်မှုကြောင့် တာဟန်းရပ်ကွက်မှ လူနေအိမ်တ စ်လုံးအပေါ် လက်နက်ကြီးကျည်ကျရောက်ပေါက်ကွဲခဲ့သည်။
