ချင်းပြည်နယ်၊ တီးတိန်မြို့ ပြည်သူ့ဆေးရုံတွင် အသက် ၆ နှစ်အရွယ် ကလေးငယ်အပါအဝင် ကိုဗစ်ကူးစက်လူနာ ၃ ဦး ကုသမှုခံယူနေပြီး အသက်အန္တရယ် မစိုးရိမ်ရကြောင်း ဆေးရုံဝန်ထမ်းတစ်ဦးထံမှ သိရသည်။
တီးတိန်မြို့တွင် ယနေ့မနက်ပိုင်းအထိ ကိုဗစ်ရောဂါ ကူးစက်ခံရသူ အမျိုးသမီး ၈ ဦးအထိရှိခဲ့ပြီး ယမန်နေ့တွင် ကုသမှုခံယူသူ ၅ ဦးသည် ကျန်းမာစွာ ဆေးရုံဆင်းခွင့်ရရှိခဲ့ပြီဖြစ်သည်။
“သူတို့ကိုတော့ ဆေးရုံမှာ ၇ ရက် အနီးကပ်ကုသပေးတယ် ကောင်းသွားပြီဆိုရင် ဆင်းပေးပါတယ်။ ကိုဗစ်ပိုးအမျိုးအစားကတော့ အတိအကျ ပြောလို့ မရသေးဘူး၊ တီးတိန်မှာ ရောဂါခွဲခြမ်းစိတ်ဖျာဖို့ စက်ပစ္စည်းများ အပြည့်အစုံ မရှိလို့ပေါ့နော်။” ဟု ဆေးရုံဝန်ထမ်းတစ်ဦးက ပြောသည်။
ရောဂါကူးစက်ခံရသူများမှာ ပြည်ပခရီးသွားလာခြင်းမရှိဘဲ ပြည်တွင်းနေထိုင်သူများသာဖြစ်ပြီး ကုသမှုခံယူခဲ့သော လူနာများမှာ ကိုဗစ်ကာကွယ်ဆေးထိုးထားပြီးသူများဖြစ်လို့ အဖျားတက်တာ၊ တုတ်ကွေးလက္ခဏာများသာရှိကြောင်း သိရသည်။
ယခုလက်ရှိ ပြည်သူ့ဆေးရုံ၊ ပြင်ပလူနာဌာနတွင် လာရောက်ပြသသူတိုင်းအား Covid-19 ရှိ/မရှိ အခမဲ့ စစ်ဆေးလျက်ရှိပါသည်။
“လာပြတဲ့သူတွေကို ကိုဗစ်ပိုး ရှိ/မရှိ စစ်ဆေးပေးတယ်၊ positive ဖြစ်ရင် ဆေးရုံတင်ရမှာဆိုလို့ တစ်ချို့ကလည်း ကိုဗစ်စစ်ဖို့ ကြောက်ကြတာပေါ့နော်။ ဆေးရုံတက်လူနာတေ သီးသန့် ကုသပေးတာဆိုတော့ ခက်ခဲတဲ့သူတွေအတွက် အစားအသောက် လှူဒါန်းပေးမည့်သူတွေကိုလည်း ကြိုဆိုပါတယ်” ဟု ၎င်းကပြောသည်။
တီးတိန်မြို့တွင် Covid-19 ကာကွယ်ဆေး အဆက်မပျက် ထိုးနှံပေးခဲ့သော်လည်း ယခုတွင် ကာကွယ်ဆေးများ ပြတ်လပ်နေမှုကြောင့် ထိုးနှံပေးနိုင်ခြင်းမရှိနိုင်သေးဘူးလို့ သိရသည်။
ကိုဗစ်ရောဂါဖြစ်ပွားမှု ပြန်လည်ရှိလာသည့်အတွက် ပြည်သူများအနေဖြင့် စနစ်တကျ mask တပ်ခြင်း၊ စနစ်တကျ လက်ဆေးခြင်း၊ လူစုလူဝေးများမပြုလုပ်ဘဲ ယခင်က ကိုဗစ်ရောဂါကာကွယ်နည်းများကို အဆက်မပျက် လုပ်ဆောင်သင့်ကြောင်း ၎င်းက ဆက်ပြောသည်။
အလားတူ ချင်းပြည်နယ် ဖလမ်းမြို့တွင်လည်း ကိုဗစ်ရောဂါကူးစက်ခံရသူ လူနာ ၅ ဦးရှိသည်ဟုသိရပြီး ချင်းလူမျိုးအများစုနေထိုင်သော စစ်ကိုင်းတိုင်း၊ ကလေးမြို့တွင်လည်း ကိုဗစ်ကူးစက်ခံရမှု ရှိလာနေပြီဟု သိရသည်။
ကိုဗစ်-၁၉ ကပ်ရောဂါကူးစက်ခံရသူများအနက် (၈၀) ရာခိုင်နှုန်းမှာ ကာကွယ်ဆေးလုံးဝ ထိုးနှံထားခြင်း မရှိသူများဖြစ်ပြီး၊ (၁၅.၉) ရာခိုင်နှုန်းမှာ ကာကွယ်ဆေး (၁) ကြိမ်ထိုးနှံထားသူ၊ (၄) ရာခိုင်နှုန်းမှာ ကာကွယ်ဆေး အကြိမ်ပြည့်ထိုးနှံထားပြီးသူနှင့် (ဝ.၁) ရာခိုင်နှုန်းမှာ ထပ်ဆောင်းကာကွယ်ဆေးထိုးပြီးသားသူများဖြစ်သည်ဟု စစ်ကောင်စီလက်အောက်ခံ ကျန်းမာရေးဝန်ကြီးဌာနက သတင်းထုတ်ပြန်ထားသည်။
