ချင်းပြည်နယ် မင်းတပ်မြို့နယ်အတွင်းရှိ ကျေးရွာများကို တိုက်လေယာဉ်ဖြင့် ရည်ရွယ်ချက်ရှိရှိ ဗုံးကြဲတိုက်ခိုက်နေသော စစ်ကောင်စီ၏ လေယာဉ်မောင်းသူများကို အပြစ်ပေးစီရင်နိုင်ပါက သိန်း ၅၀၀ တန်ဖိုးရှိသော မြေကွက် ချီးမြှင့်မည်ဟု CDF-Mindat က ကြေညာသည်။
ယခုနှစ် ဇန်နဝါရီလ ပထမအပတ်မှစတင်ပြီး စစ်ကောင်စီသည် မင်းတပ်မြို့နယ် ကျေးရွာများအတွင်းရှိ အပြစ်မဲ့ပြည်သူများအား ပစ်မှတ်ထားကာ ရည်ရွယ်ချက်ရှိရှိဖြင့် လေကြောင်းတိုက်ခိုက်မှုများ ဆက်တိုက်ကျူးလွန်လျှက်ရှိပြီး ထိုကဲ့သို့ တိုက်ခိုက်မှုကြောင့် ပြည်သူ့အိုးအိမ် ပျက်စီးမှုများစွာနှင့် အပြစ်မဲ့ပြည်သူသေဆုံးမှုများ ရှိလာနေသောကြောင့် လာရောက်တိုက် ခိုက်သော စစ်ကောင်စီ Pilot (လေယာဉ်မောင်းသူ) များအား စုံစမ်းဖော်ထုတ်လျှက်ရှိသည်ဟု CDF-Mindat က ဆိုသည်။
ယင်းစုံစမ်းမှုအရ ဧပြီလ ၁၆ ရက်နေ့က မင်းတပ်မြို့နယ် ပန်းပါကျေးရွာကို ဂျက်ဖိုက်တာ ၂ စင်းဖြင့် တိုက်ခိုက်သည့် လေယာဉ်မောင်းသူ ၂ ဦးမှာ ဗိုလ်မှူးနေဝင်းကျော်နှင့် ဗိုလ်မှူးသက်လင်းမောင် တို့ဖြစ်ကြပြီး အာဏာသိမ်းစစ်ခေါင်းဆောင်က အထူးအားကိုးသည့် Pilot များဖြစ်ကြောင်း ကြားသိရသည်ဟု CDF-Mindat ကြေညာချက်တွင် ဖော်ပြထားသည်။
ထို လေယာဉ်မောင်းနှင်းသူ နှစ်ဦးတို့မှာ နေပြည်တော်၊ တံတားဦးနှင့် မှော်ဘီမြို့နယ် စသည့် ၃ နေရာအတွင်းရှိ Yak အုပ် စစ်ဆင်ရေးကို ဦးဆောင်အုပ်ချုပ်တာဝန်ယူနေသူ ဒု-ဗိုလ်မှူးကြီး ရဲဇော်နိုင်လက်အောက်တွင် တာဝန်ယူထမ်းဆောင်နေကြသူများဖြစ်ကြကြောင်းလည်း ဖော်ပြထားသည်။
ထို့ကြောင့် မင်းတပ်မြို့နယ် ကျေးရွာများအတွင်း ရည်ရွယ်ချက်ရှိရှိ တိုက်ခိုက်နေသော ဒု-ဗိုလ်မှူးကြီးရဲဇော်နိုင်နှင့် လေယာဉ်မောင်းသူ (Pilot) နှစ်ဦးတို့နှင့်တူ ပူးပေါင်းသူများအား အပြစ်ပေးစီရင်ကာ သက်သေပြနိုင်သည့် အဖွဲ့အစည်းများကို ကျပ်ငွေ ၅၀၀ သိန်း တန်ဖိုးနှင့်ညီမျှသော မြေတကွက်အား ချီးမြှင့်ပေးသွားမည်ဖြစ်ကြောင်း ချင်းကာကွယ်ရေးတပ်ဖွဲ့ Chin Defense Force – Mindat က ထုတ်ပြန်ကြေညာထားသည်။
