မကွေးတိုင်း ကျောက်ထုဖက်မှ ချင်းပြည်နယ် မင်းတပ်မြို့နယ်ထဲသို့ စစ်ကြောင်းထိုးလာသော စစ်ကောင်စီတပ်ဖွဲ့နှင့် ချင်းကာကွယ်ရေးပူးပေါင်းတပ်ဖွဲ့တို့အကြား ဖြစ်ပွားသော တိုက်ပွဲတွင် စစ်ကောင်စီဖက်က ၇ ဦးသေဆုံးခဲ့သည်ဟု CDF-Mindat က ယမန်နေ့က သတင်းထုတ်ပြန်သည်။
ကျောက်ထုမြို့နယ်မှ မင်းတပ်မြို့နယ်စပ်ဘက် ရေရှင်ဖက်ကို ဦးတည်ကာ စစ်ကြောင်းထိုးလာသော အင်အား အယောက် ၈၀ ခန့်ရှိ စစ်ကောင်စီတပ်ဖွဲ့ကို Chinland Defense Force-Mindat ၊ Chinland Defense Force-Kanpetlet နှင့် ယော The Youth Force စသည့် ကာကွယ်ရေး ပူးပေါင်းတပ်ဖွဲ့တို့က ဧပြီ ၂၃ ရက်နေ့မှာ ကြားဖြတ်တိုက်ခိုက်ခဲ့ခြင်းဖြစ်သည်။
မိနစ် ၃၀ ခန့်အကြာ ပြင်းထန်စွာဖြစ်ပွားသော အဆိုပါတိုက်ပွဲတွင် စစ်ကောင်းစီဖက်မှ တပ်သား ၇ ဦးသေဆုံးကာ ၂ ဦး ဒဏ်ရာရသည့်အပြင် ချင်းကာကွယ်ရေးပူးပေါင်းတပ်ဖွဲ့က လက်နက်ကြီး ၆၀ မမ ဗုံးသီးတစ်လုံး၊ ၄၀ မမ တစ်လုံးတို့အပါင်ဝင် MA1 ကျည်ပေါက် နှစ်ခုနှင့် နာဂါပို့ကျည် လေးခု သိမ်းဆည်းခဲ့ရမိခဲ့သည်ဟု CDF-Mindat က ဆိုသည်။
ယင်းတိုက်ပွဲတွင် CDF-Mindat အဖွဲ့မှ ရဲဘော်တစ်ဦး ထိခိုက်ဒဏ်ရာ ရရှိခဲ့သည်ဟု သိရသည်။
ကျောက်ထုမြို့မှ တက်လာသော စစ်ကောင်စီတပ်ဖွဲ့များသည် မင်းတပ်မြို့အကျော် ၄ မိုင်ခန့်အကွာရှိ ကန်ပက်လက်လမ်းခွဲတွင် CDF-Mindat အဖွဲ့နဲ့ ဧပြီ ၂၄ ရက်နေ့ ညနေပိုင်းနှင့် ယနေ့ ဧပြီ ၂၆ ရက်နေ့ မနက် ၇ နာရီအချိန်တွင် ထပ်မံ ထိတွေ့ပစ်ခတ်မှု ဖြစ်ပွားခဲ့ကြောင်း CDF-Mindat က ဆိုသည်။
ဧပြီ ၂၂ ရက်နေ့ကလည်း မင်းတပ်မြို့ရှိ ခလရ (၂၇၄) တပ်ရင်းမှ မင်းတပ်မြို့နယ် တိုက်နယ်အမှတ် ၃ ဖက်ကို လက်နက်ကြီးများဖြင့် ပစ်ခတ်မှုကြောင့် အနီးတစ်ဝိုက် ရွာရှိ ပြည်သူနေအိမ် ၃ လုံး ထိခိုက်ပျက်ဆီးခဲ့ကြောင်း CDF-Mindat က ထုတ်ပြန်ထားသည်။
