ချင်းပြည်နယ် ထန်တလန်မြို့နယ် တလန်လိုကျေးရွာကို စစ်ကောင်စီက ဧပြီလ ၂၇ ရက်နေ့ မွန်းလွဲပိုင်း ၃ နာရီကျော်ခန့်က တိုက်လေယာဉ်ဖြင့် ဗုံးကြဲတိုက်ခိုက်ရာတွင် အရပ်သား ပြည်သူ ၂ ဦးသေဆုံးခဲ့ပြီး ၅ ဦးထက်မနည်း ဒဏ်ရာရရှိခဲ့သည်ဟု သိရသည်။
ချင်းအမျိုးသားတပ်ဦး CNF ဗဟိုဌာနချုပ် ဝိတိုရိယစခန်းမှ ၇ မိုင်ခန့်ကွာဝေးသော တလန်လိုကျေးရွာကို စစ်ကောင်စီတိုက်လေယာဉ်က ယနေ့မွန်းလွဲပိုင်း ၃ နာရီခွဲခန့်တွင် လာရောက်ဗုံးကြဲသွားခဲ့ခြင်းဖြစ်သည်။
စစ်ကောင်စီ၏ ဗုံးကြဲတိုက်ခိုက်မှုကြောင့် တလန်လိုကျေးရွာက CDM ဆရာမ Dimte နှင့် Pu Hram Ceu တို့ သေဆုံးခဲ့ပြီး ၅ ဦးထက်မနည်းထိခိုက်ဒဏ်ရာရရှိခဲ့သည်။
ထို့အပြင် လူနေအိမ်အနည်းဆုံး ၅ လုံးထိခိုက်ပျက်စီးသွားခဲ့သည်ဟု သိရသည်။
စစ်ကောင်စီတပ်ဖွဲ့သည် ယနေ့မနက်ပိုင်းမှာ ဟားခါး-ထန်တလန်ကြား သီမြစ်ချောင်းအနီးက ၎င်းတို့စခန်းငယ်တစ်ခုကို လက်လွှတ်ဆုံးရှုံးခဲ့ပြီးနောက် ယခုကဲ့သို့ အရပ်သားများနေထိုင်သော ကျေးရွာကို ဗုံးကြဲတိုက်ခိုက်လာခြင်းဖြစ်သည်။
ချင်းအမျိုးသားတပ်မတော် CNA နှင့် ချင်းကာကွယ်ရေးပူပေါင်းတပ်ဖွဲ့တို့သည် ယနေ့မနက်ပိုင်း ၁ နာရီဝန်းကျင်ခန့်က သီမြစ်ချောင်းအနီး စစ်ကောင်စီတပ်စခန်းငယ်တစ်ခုကို သိမ်းပိုက်ခဲ့ကြပြီး နောက်ထပ်စခန်း ၂ ကို ထပ်မံသိမ်းပိုက်ရန် တိုက်ခိုက်စဉ်မှာ စစ်ကောင်စီက တိုက်လေယာဉ်နှင့် ဗုံးကြဲတိုက်ခိုက်ခဲ့မှုကြောင့် ပြန်ဆုပ်ခွါခဲ့ရသည်ဟု သိရသည်။
သီမြစ်ချောင်းအနီး စခန်းသိမ်းတိုက်ပွဲတွင် CNA ရဲဘော်တစ်ဦးကျဆုံးခဲ့ရပြီး စစ်ကောင်စီဖက်ကလည်း အကျအဆုံးများနိုင်သည်ဟု သိရသည်။
စစ်ကောင်စီတပ်ဖွဲ့သည် ပြီးခဲ့သည့် မတ်လ ၃၀ ရက်နေ့မှ ဧပြီလ ၂၇ ရက်နေ့အထိ တစ်လအတွင်းမှာ ချင်းပြည်နယ်တွင် တိုက်လေယာဉ်ဖြင့်ဗုံးကြဲတိုက်ခိုက်မှုကြောင့် အရပ်သားပြည်သူ ၂၃ ဦး သေဆုံးခဲ့ပြီဖြစ်သည်။
Photo- Salai William Hlawnceu
