(006SV)
စစ်ကောင်စီတပ် အများအပြား အထိနာသည့် ဗာရ်စခန်းသိမ်းတိုက်ပွဲ ဆင်နွှဲထားသည့် CNDF တပ်မဟာများထဲမှ တပ်မဟာ ၁ ၏ ရဲဘော်များကို မောင်းပြန်တပ်ဆင်ပေးနိုင်ရန်အတွက် CNO/ CNDF မှ သိန်း ၅၀၀၀ ကမ်ပိန်းကို ယနေ့ စတင်ပြုလုပ်သည်ဟု ယင်းအဖွဲ့မှ ပြောရေးဆိုခွင့်ရှိသူက ပြောသည်။
“တပ်မဟာ ၁ က ချင်းပြည်နဲ့ စစ်ကိုင်းကြားမှာ ရှိတဲ့ နယ်စပ်ဖြစ်နေတဲ့အတွက် စစ်ရေးစစ်ရာအရမှာ တကယ့် အရေးပါတဲ့ နေရာဖြစ်လို့ပါ။ အဲဒါကြောင့် ကျနော်တို့က ရဲဘော်တွေက လက်နက်အင်အားနည်းနေတော့ စစ်ရေးအတွက် အဓိက ကျတဲ့ နေရာဖြစ်တာရော၊ ရဲဘော်တွေရဲ့ အဝတ်အစားနဲ့ စားဝတ်နေရေးအတွက်ပါ ဒီကမ်ပိန်းကို လုပ်လိုက်ရတာ ဖြစ်ပါတယ်။ ချင်းတို့ရဲ့ တူမီး၊ မောင်းပြန်နဲ့ ပြီး ကမ်းပိန်မှာ စွမ်းအားရှိသ၍ ပါဝင်ပေးကြပါဦးလို့ မေတ္တာရပ်ခံချင်ပါတယ်” ဟု CNO/CNDF မှ ပြောရေးဆိုခွင့်ရှိသူ ဆလိုင်းကျုံငိုင်း က ပြောသည်။
အဆိုပါ “ချင်းတို့ရဲ့ တူမီး၊ မောင်းပြန်နဲ့ အပြီ” ရန်ပုံငွေကမ်ပိန်းကို ယနေ့ စက်တင်ဘာလ ၂၅ ရက်မှ နိုဝင်ဘာလ ၁၀ ရက်အထိ ပထမဆုံးအကြိမ်အဖြစ် ပြုလုပ်မှာဖြစ်ပြီး တပ်မဟာ ၁ မှ ရဲဘော်များကို ကာကွယ်ရေးပစ္စည်းများ တပ်ဆင်ပေးနိုင်ရန် သိန်း ငါးထောင်ရရှိရန် မျှော်မှန်းထားခြင်းဖြစ်သည်။
CNDF တပ်မဟာ ၁ သည် ချင်းပြည်နယ်၊ ဖလမ်းမြို့နယ်အရှေ့ပိုင်းတွင် တည်ရှိပြီး ယင်းတပ်မဟာနယ်မြေအတွင်းရှိ စစ်ကောင်စီ ဗာရ်စခန်းကို ပြီးခဲ့တဲ့ ဧပြီ ၁၀ရက်က CNDF တပ်များက အောင်မြင်စွာ သိမ်းပိုက်နိုင်ခဲ့သည်။
ဖလမ်းမြို့နယ်က စစ်ကောင်စီအထိုင်စခန်းဖြစ်သည့် ဗားရ်စခန်းသိမ်းတိုက်ပွဲတွင် စစ်ကောင်စီမှ ဗိုလ်ကြီးအပါအဝင် ၁၄ ဦးသေဆုံးခဲ့ပြီး တပ်သား ၁၁ ဦးကို အရှင်ဖမ်းဆီးရမိခဲ့ကာ လက်နက်ခဲယမ်းအများအပြားလည်း သိမ်းဆည်းရမိခဲ့သည်။
