ချင်းပြည်နယ် ဟားခါးမြို့နယ် ဘုံဇုံးကျေးရွာက စစ်ကောင်စီတပ် စခန်းသိမ်းတိုက်ပွဲတွင် စစ်ကောင်စီတပ်သား ၈ ဦးသေဆုံးပြီး ၆ ဦးကို အရှင်ဖမ်းဆီးရမိကာ ၂၄ ဦးထွက်ပြေးသွားသည်ဟု သိရသည်။
ချင်း-မကွေးအစပ် ဟားခါး-ဂန့်ဂေါကားလမ်းမပေါ်တွင်တည်ရှိသော ဘုံဇုံးကျေးရွာက စစ်ကောင်စီတပ်စခန်းကို ချင်းအမျိုးသားတပ်မတော် CNA, CDF-Hakha, CDF-Thantlang နှင့် CDF-KKG ပူးပေါင်းတပ်ဖွဲ့က ယမန်နေ့ ဒီဇင်ဘာလ ၁၈ ရက်နေ့ မနက်ပိုင်းက ၀င်ရောက်တိုက်ခိုက်သိမ်းပိုက်ခဲ့ခြင်းဖြစ်သည်။
ဘုံဇုံးကျေးရွာက စစ်ကောင်စီတပ်စခန်းတွင် အင်အား ၃၈ ဦးရှိပြီး ယင်းအနက် ၈ ဦးသေဆုံး၊ ၆ ဦးကို အရှင်ဖမ်းဆီးရမိကာ ၂၄ ဦး ထွက်ပြေးလွတ်မြောက်သွားသည်ဟု CNA သတင်းရင်းမြစ်ကဆိုသည်။
စခန်းသိမ်းတိုက်ပွဲတွင် ချင်းကာကွယ်ရေးတပ်ဖွဲ့များက လက်နက်ခဲယမ်းအအမြောက်အများကိုလည်း သိမ်းဆည်းရမိခဲ့သည်။
