(002MG)
ချင်းတောင်ခြေ ကလေးမြို့မြောက်ပိုင်း ပျဉ်းခုံကြီးကျေးရွာထဲ ယနေ့မနက် (၇) နာရီဝန်းကျင်က စစ်ကောင်စီတပ်ဖွဲ့မှ ပစ်ခတ်လိုက်သော လက်နက်ကြီးကျည်ကျရောက်ပေါက်မူကြောင့် အမျိုးသား (၃) ဦးပွဲချင်းသေဆုံးကာ ထိခိုက်ဒဏ်ရာရရှိသူများလည်းရှိသည်ဟု သိရသည်။
ထိခိုက်ဒဏ်ရာရရှိသူများကို ကူညီပေးသူတဦးက“ဆုံးသွားတာက အမျိုးသားတွေကြီးပဲ (၃) ယောက်ရှိတယ်၊ ဒဏ်ရာ ရတဲ့သူ တွေလည်းရှိတယ် ဒီမနက် သူတို့ကို အဆင်ပြေတဲ့နေရာမှာ ကုသမူခံယူနေကြတယ်၊ ပေါင်ကျိုး တာ (၁) ယောက်၊ ခြေကျိုးတာ (၂) ယောက်၊ကျန်တဲ့သူတွေက တအားတော့မစိုးရိမ်ရဘူး” ဟု ပြောသည်။
စစ်ကောင်စီလက်နက်ကြီးကြောင့်သေဆုံးသူများမှာ အသက်(၅၇)နှစ်အရွယ် Pu Thian Neih Thang၊ အသက် (၅၇)နှစ် အရွယ် Pu Kawl Tin Kham နှင့် အသက် (၃၃) နှစ်အရွယ် Pu Za San Hmung တို့ဖြစ်ကြပြီး ၎င်းတို့၏ မိသားစုဝင် များလည်း ထိခိုက်ဒဏ်ရာများရရှိခဲ့ကြသည်ဟုသိရသည်။
ထို့အပြင် ပျဉ်းခုံကြီးကျေးရွာထဲက နွား (၄)ကောင်လည်း လက်နက်ကြီးကြောင့် သေဆုံးခဲ့သည်ဟု သိရသည်။
ပျဉ်းခုံကြီးကျေးရွာသည် ကလေးမြို့ တာဟန်းရပ်ကွက်မှ လက်ပံချောင်းကျေးရွာသို့သွားသော ကားလမ်းမပေါ်တွင် တည်ရှိသည့် ရွာဖြစ်ပြီး ချင်းလူမျိုးများနေထိုင်ကြသည့်ရွာဖြစ်သည်။
ယခုရက်ပိုင်းအတွင်း ကလေးမြို့နယ်တွင် စစ်ကောင်စီတပ်ဖွဲ့နှင့် ပြည်သူ့ကာကွယ်ရေးတပ်ဖွဲ့များအကြား တိုက်ပွဲ ဖြစ်ပွားနေပြီး စစ်ကောင်စီတပ်က လက်နက်ကြီးများကို နေ့တိုင်းပစ်ခတ်နေပြီး မတ်လ ၁၄ ရက်က လက်ပံချောင်း ကျေးရွာသား ၂ ဦး၊ မတ်လ ၁၆ ရက်နေ့တွင် ပျဉ်းခုံလေးကျေးရွာသား ၃ ဦး သေဆုံးခဲ့ပြီးဖြစ်သည်။
စစ်ကောင်စီတပ်ဖွဲ့သည် ပျဉ်းခုံလေးကျေးရွာကိုလည်း မတ်လ ၁၉ ရက်ညနေပိုင်း ၃ နာရီခန့်က စတင်မီးရှို့ခဲ့ပြီး တညလုံးမီးလောင်ကာ ယနေ့မနက်ပိုင်းအထိ မီးလောင်းကျွမ်းနေဆဲဟုသိရသည်။ စစ်ကောင်စီတပ်ဖွဲ့များသည် ကျေးရွာထဲရှိနေသေးသည့်အတွက် မည်သူမျှရွာထဲမ၀◌င်ရဲကြဘဲ မီးလောင်ကျွမ်းမှုအခြေအနေအသေးစိတ်ကို မသိရသေးပေ။
