(006SV)
ချင်းပြည်နယ်၊ မတူပီမြို့နယ် ဝလံတဲရွာနှင့် ကုလားရွာတို့မှာ ဒေသခံပြည်သူ ၂ ဦးသည် မြေမြှုပ်မိုင်းကြောင့် ဘယ်ခြေတဖက်စီ ပြတ်သွားပြီး ၁ ဦးမှာ ဒဏ်ရာများ ရရှိခဲ့ကြောင်း ဒေသခံများက ပြောသည်။
“ဝလံတဲရွာရဲ့ အစွန်မှာပေါ့နော်။ ဘောလုံးကွင်းမှာ မိုင်းနင်းမိတာပါ။ ပြည်သူသွားတဲ့ လမ်း၊ တောင်ယာသွားတဲ့ လမ်းပါပဲ။ ကုလားကျေးရွာမှာ မိုင်းနင်းမိတာလည်း ရွာဟောင်းနဲ့ ရွာသစ်ကြားပဲ။ ရွာအနားလေးမှာပဲ မိုင်းနင်းမိတယ်”ဟု ဒေသခံတစ်ဦးက ပြောသည်။
ဇူလိုင်လ ၈ ရက် ညနေ ၃ နာရီခန့်က ဝလံတဲကျေးရွာအစွန်က ဘောလုံးကွင်းတွင် ဒေသခံကျေးရွာသား ဦးတွီမိုးသည် မြေမြှုပ်မိုင်း နင်းမိခဲ့ပြီး ဘယ်ဖက်ခြေထောက် ပြတ်သွားကာ ညာခြေထောက်တွင်လည်း ဒဏ်ရာ အနည်းငယ် ရရှိခဲ့ကြောင်း ဒေသခံ ကျေးရွာသား တစ်ဦးက ပြောသည်။
ယမန်နေ့က ညနေပိုင်းတွင်လည်း ကုလားရွာအဝင်လမ်း၏ ရွာဟောင်းလမ်းပေါ်တွင် မြေမြှုပ်မိုင်းပေါက်ကွဲ သောကြောင့် ဆိုင်ကယ်စီးနင်းလာသူ ၂ ဦးထဲတွင် ကျေးရွာအုပ်ချုပ်ရေးမှူး ဦးလောင်မန်းသည် ဘယ်ခြေတစ်ဖက်ပြတ် သွားခဲ့ကြောင်း သိရသည်။
ဆိုင်ကယ်မောင်းနှင်သူဖြစ်သည့် CDM ကျောင်းဆရာ ဦးခေါင်ဘွေးမှာ ဒဏ်ရာအနည်းငယ်ရရှိခဲ့ကြောင်း သိရသည်။
အိန္ဒိယနိုင်ငံဘက်တွင် ဆေးဝါးကုသနိုင်ရန်အတွက် ဒဏ်ရာရရှိသူ ၂ ဦးကို ထမ်းစင်များ အသုံးပြု၍ သယ်ဆောင်သွား နေကြကြောင်း၊ ကား မရှိသောကြောင့် အခက်အခဲများစွာ ဖြစ်နေကြောင်းသိရသည်။
ဝလံတဲကျေးရွာနှင့် ကုလားကျေးရွာထဲတွင် CDF- မတူပီ၊ တပ်မဟာ – ၁ နှင့် အာရက္ခတပ်တော် (ULA/AA) တို့ စခန်းချထား ကြောင်း သိရသည်။
မြေမြှုပ်မိုင်းများမှာ CDF- မတူပီ၊ တပ်မဟာ – ၁ နှင့် အာရက္ခတပ်တော် (ULA/AA) တို့က ထောင်ထားခြင်းဖြစ်ကြောင်း ဒေသခံများက ပြောသော်လည်း ခိုနူမ်းသုန်းအနေဖြင့် သီးခြားအတည်ပြုနိုင်ခြင်း မရှိသေးပါ။
ဇူလိုင် ၆ ရက်ကလည်း ကုလားရွာမှ CDM ကျောင်းဆရာ ဦးခေါင်ဘွေးသည် ရွာသို့ ပစ္စည်းယူရန် ဆိုင်ကယ်ဖြင့် သွားရောက်စဉ် မြေမြှုပ်မိုင်းကြောင့် ညာခြေထောက်နှင့် လက်မောင်းတို့တွင် ထိခိုက်ဒဏ်ရာများ ရရှိခဲ့ကြောင်း သိရသည်။
ပြီခဲ့သည့် ရက်ပိုင်းအတွင်း ကုလားရွာနှင့် ဝလံပီးကျေးရွာတို့တွင် ချင်းလဲန်းကောင်စီပူးပေါင်းတပ်များနှင့် ချင်းညီနောင်၊ အာရက္ခတပ်တော် (AA/ ULA) မဟာမိတ်တပ်များအကြား ထိတွေ့တိုက်ပွဲများ ဖြစ်ပွားခဲ့ကြောင်း သိရသည်။
