ချင်းပြည်နယ် တီးတိန်မြို့နယ်ထဲက ဘိန်းစိုက်ခင်းဧက ၂၀ ကျော်ကို ဇိုလဲန်းပြည်သူ့ရဲတပ်ဖွဲ့ (People’s Police Force-Zoland) နှင့် PDF-Zoland တို့က ပူးပေါင်းဖျက်ဆီးခဲ့ကြသည်ဟုသိရသည်။
တီးတိန်မြို့နယ်ထဲက ဘိန်းစိုက်တောင်သူများကို အကြိမ်ကြိမ်သတိပေးစာပေးခဲ့သော်လည်း လိုက်နာမှုမရှိသည့်အပြင် ဆက်လက်လုပ်ဆောင်နေကြသောကြောင့် အောက်တိုဘာလ ၂၂ နှင့် ၂၃ ရက်နေ့က ဘိန်းစိုက်ခင်းများကို သွားရောက် ဖျက်ဆီးခဲ့ခြင်းဖြစ်သည်ဟု PDF-Zoland တာဝန်ရှိသူတစ်ဦးကပြောသည်။
“ခေတ်ကာလမကောင်းတဲ့ကြားမှာမကောင်းတဲ့စီးပွားရေးဖြစ်တဲ့ ဘိန်းစိုက်တာဟာ ပြည်သူနဲ့လူမျိုးကို ပျက်စီးစေနိုင်တယ်၊ ပညာတတ်လူငယ်တွေအများကြီးလည်း ပျက်စီးနိုင်တဲ့အပြင် အချိန်ကြာလာရင် လူမျိုးပါ တုန်းသွားနိုင် တဲ့အထိ ဆိုးကျိုးတွေဖြစ်လာနိုင်တာကြောင့် အခြေအနေမဆိုးခင် အချိန်မှီ တားဆီးနိုင်ဖို့ အခုလိုဖျက်ဆီးရတာ ဖြစ်ပါတယ်” ဟု PDF-Zoland တာဝန်ရှိသူတစ်ဦးကပြောသည်။
ယခုဘိန်းစိုက်ခင်းဖျက်ဆီးသည့်နေရာကို အတိအကျဖော်ပြထားခြင်းမရှိဘဲ တီးတိန်မြို့နယ်အတွင်းရှိ အခြားသောနေရာများက ဘိန်းစိုက်ခင်းများကိုလည်း အပြတ်လင်းရှင်းနိုင်ရန် ဆက်လက်ဆောင်ရွက်သွားကြမည်ဟု PDF-Zoland က ထုတ်ပြန်ထားသည်။
