(004SS)
ချင်းညီနောင်စစ်ဆင်ရေးအဖြစ် ဖော်ဆောင်နေသော ချင်းပြည်နယ်၊ မြောက်ပိုင်း ဖလမ်းမြို့သိမ်းတိုက်ပွဲတွင် အမျိုးသမီး ရဲဘော် ၂၈ ဦးရှေ့တန်းမှ ပါဝင်တိုက်ပွဲဝင်နေကြောင်း CNO/CNDF Defense Secretary ကပြောသည်။
ချင်းအမျိုးသားကာကွယ်ရေးတပ်ဖွဲ့ CNDF အမျိုးသမီးရဲဘော်များသည် ၎င်းတို့ကျွမ်းကျင်ရာကဏ္ဍ အသီးသီး အလိုက် အမျိုးသားရဲဘော်များနှင့်အတူ ရှေ့တန်းတွင် တာဝန်ထမ်းဆောင်နေကြသည်ဟု CNDF Defense Secretary Mai Olivia Thawng Luai က ပြောသည်။
“အခုမြေပြင်မှာ ဖလမ်းမြို့တိုက်ပွဲမှာဆိုလို့ရှိရင် ရှေ့တန်းမှာ မိန်းခလေး ၂၈ ယောက် တိုက်ပွဲဝင်နေတယ်။ တစ်ချို့က စနိုက်ပါသင်းမှာ၊ တစ်ချို့က ဒရုန်းသင်းမှာ ၊ တစ်ချို့က မေဒစ်သင်း ( Medic team)မှာ၊ တစ်ချို့ကကျတော့ walkie talkieနဲ့ လေကြောင်းက ဘယ်ကိုရောက်နေပါပြီဆိုပြီး တညလုံး communication department က မိန်းခလေးတွေမအိပ်နိုင်ဆုံးဆုပေးရမယ်။ အဲလို အမျိုးသမီးပါဝင်မှုကလဲ အရမ်းအရေးကြီးပါတယ်၊ ကျားမ တန်းတူညီမျှရေးပေါ့နော်” ဟု ယမန်နေ့က အွန်လိုင်းမှပြုလုပ်သော MDF အခြေခံစစ်သင် တန်း ရန်ပုံငွေရှာဖွေပွဲတွင် CNDF Defense Secretary က ပြောသည်။
CNDF တပ်ဖွဲ့အနေဖြင့် သေနတ်ကို ကောင်းမွန်စွာပစ်ခတ်နိုင်ပြီး သင်တန်းများမှ လက်ဖြောင့်ဆု ရထားသော အမျိုးသမီး ရဲဘော်များကို သေနတ်ကိုင်ခွင့်ပြုခြင်းဖြစ်ကြောင်းနှင့် တာဝန်ရှိသူများအနေဖြင့်လည်း စစ်ပညာသင်ယူရန်ရောက်ရှိလာသော အမျိုးသမီးရဲဘော်များအား ၎င်းတို့၏ ဆန္ဒအလျောက် ရှေ့တန်းတွင် တိုက်ပွဲဝင်ခွင့် ပြုပေးသင့်ကြောင်း သူမက ဆက်ပြောသည်။
ဖလမ်းမြို့ကို ၂၀၂၄ ခုနှစ် နိုဝင်ဘာလ ၉ ရက်နေ့တွင် ချင်းညီနောင်မဟာမိတ်ပူးပေါင်းတပ်ဖွဲ့များက စတင်တိုက်ခိုက်ခဲ့ရာ ဖလမ်းမြို့အတွင်းရှိ စစ်ကောင်စီတ်များတပ်ဆွဲနေရာယူထားသည့် ခရိုင်ရဲတပ်ဖွဲ့ရုံး၊ မြို့နယ်ရဲတပ်ဖွဲ့ရုံး၊ ဆောက်လုပ်ရေးရုံး၊ အထွေထွေအုပ်ချုပ်ရေးရုံးနှင့် ဆေးရုံကုန်းနေရာများကို သိမ်းယူနိုင်ခဲ့ပြီးဖြစ်သည်။
လက်ရှိတွင် ခလရ ၂၆၈ တပ်ကုန်းအား သိမ်းပိုက်ရန် ဆက်လက် ထိုးစစ်ဆင်တိုက်ခိုက်လျက်ရှိပြီး တော်လှန်ရေးတပ်ဖွဲ့များ သည် တပ်ကုန်းနှင့် အနီးဆုံးနေရာတွင် နေရာယူတပ်ဆွဲကာ ထိုးစစ်ဆင်လျက်ရှိနေကြောင်း CNDF Defense Secretary ၏ ပြောကြားချက်အရ သိရသည်။
ဖလမ်းမြို့သိမ်းတိုက်ပွဲအတွင်း စစ်ကောင်စီသည် တော်လှန်ရေးတပ်ဖွဲ့များတပ်ဆွဲမည်ဟု ယူဆသော နေရာများအား လေကြောင်းဖြင့် ကင်းထောက်ခြင်း၊ ပစ်ခတ်ခြင်းများနေ့စဉ်နှင့်အမျှပြုလုပ်နေကြောင်းသိရသည်။
