(006SV)
မကွေးတိုင်း၊ ဧရာဝတီအနောက်ခြမ်းတွင် စစ်ကောင်စီကို တိုက်ခိုက်နေသည့် ချင်းကာကွယ်ရေးတပ်ဖွဲ့ – အရှိုသည် တော်လှန်ရေး ၂ နှစ်တာအတွင်း မိသားစုဝင်တချို့အပါအဝင် စစ်ကောင်စီ စစ်သုံ့ပန်း ၁၅၀ ဦး ဖမ်းဆီးထိန်းသိမ်းနိုင်ခဲ့ကြောင်း သိရသည်။
“ဖမ်းဆီးရမိတာတွေက ဟို ၁၁ လပိုင်းကတည်းက ဖမ်းဆီးရမိတာကော၊ အရင်တုန်းက ဖမ်းဆီးရမိတာကော၊ အခုချိန် ဖမ်းဆီးရမိတာကော ပုံစံအမျိုးမျိုးနဲ့ ဖမ်းဆီးရမိခဲ့တာပါ။ ၁၅၀ ဦး ဖမ်းဆီးရမိခဲ့တာမှာ အမျိုးသမီးတွေ၊ စကစတပ်ဖွဲဝင်တွေရဲ့ မိသားစုတွေလည်း ပါပါတယ်” ဟု CDF – အရှိုတပ်မှ ပြောရေးဆိုခွင့်ရှိသူ ဆလိုင်းရိုးချင်းက ပြောသည်။
၂၀၂၃ ခုနှစ် ဇန်နဝါရီလ ၂၁ ရက်တွင် CDF – အရှိုတပ်ဖွဲ့ကို အရှိုချင်းတိုင်းရင်း သားများဖြင့် စတင်တည်ထောင်ခဲ့ပြီး ၂ နှစ်ပြည့် ချိန်တွင် စစ်ကောင်စီနှင့် ထိတွေ့တိုက်ပွဲ ၂၅ ကြိမ်ခန့် ရှိခဲ့ကြောင်း သိရသည်။
ချင်းကာကွယ်ရေးတပ်ဖွဲ့ – အရှို့မှ ရဲဘော် ၁ ဦးကျဆုံးခဲ့ပြီး ထိခိုက်ဒဏ်ရာရရှိမှု တချို့ရှိကြောင်း၊ စစ်ကောင်စီတပ်ဖွဲ့ဝင် ၂၀၀ ဝန်းကျင် သေဆုံးခဲ့ပြီး လက်နက်မျိုးစုံ ၁၀၀ ခန့်နှင့် ခဲယမ်းအများအပြားကိုလည်း သိမ်းဆည်းရမိခဲ့သည်ဟု သိရသည်။
“ရှေ့ဆက် စစ်အာဏာရှင်တော်လှန်ရေးနဲ့ ပတ်သက်လို့ စစ်ရေးပစ်မှတ်တွေကို အဓိက ဦးစားပေးပြီး တော်လှန်ရေးတပ်ဖွဲတွေနဲ့ ပူးပေါင်းကာ စစ်ကောင်စီ တပ်ဖွဲဝင်တွေ ခြေကုပ်ယူရာ နေရာများကို တိုက်ယူသွားဖိုရှိပါတယ်” ဟု CDF – အရှိုတပ်မှ ပြောရေးဆိုခွင့်ရှိသူ ဆလိုင်းရိုးချင်းက ပြောသည်။
ဇန်နဝါရီလ ၁၃ ရက်နှင့် ၁၄ ရက်တို့တွင် ရခိုင်- မကွေးအစပ် အမ်းမြို့နယ်ထဲက တိုက်ပွဲများမှ ထွက်ပြေးလာသော စစ်ကောင်စီတပ်နှင့် တိုက်ပွဲများတွင် စစ်ကောင်စီတပ်ဖွဲ့ဝင် ၅ ဦးသေဆုံးပြီး ၁၂ ဦး အရှင်ဖမ်းဆီးရမိသည်ဟု CDF – အရှိုက ထုတ်ပြန်သည်။
ဇန်နဝါရီလ ၃ ရက်နှင့် ၄ ရက်တွင်လည်း အမ်းမြို့နယ်မှ စစ်ရှုံး၍ ထွက်ပြေးလာသော စစ်ကောင်စီတပ်နှင့် တိုက်ပွဲဖြစ်ရာ စစ်သုံ့ပန်း ၁၁ ဦးကို လက်နက်ခဲယမ်းများဖြင့် ဖမ်းဆီးရမိခဲ့သည်ဟု သိရသည်။
CDF – အရှိုက နွေဦးတော်လှန်ရေးကာလ လက်နက်ကိုင်လမ်းစဉ်အရ တွေ့ကြုံခဲ့ရသော ဖြစ်ရပ်များကို ဝေဖန်သုံးသပ်လျက် လူထု၏ တည့်မတ်ထိန်းကျောင်းမှုကို ခံယူကာ ပြည်သူကို အကာအကွယ်ပြုရန်၊ ပြည်သူမှ ယုံကြည်အားကိုးသော တပ်တော်ဖြစ်ရန် ကြိုးစားမည်ဟု တပ်တော် ၂နှစ်ပြည့်တွင် သဘောထားထုတ်ပြန်သည်။
လက်နက်လူအင်အားကို အခြေတည်လျက် နိုင်ငံ့ဩဇာအာဏာ တည်ဆောက်မှုနှင့် လူမျိုးကြီးဝါဒ ကျင့်သုံးမှုကို လုပ်ဆောင်မည်မဟုတ်ကြောင်း CDF – အရှိုက ဆိုသည်။
စစ်အာဏာရှင်အပါအဝင် အာဏာရှင်စနစ်အားလုံး ချုပ်ငြိမ်းရန်၊ အဖိနှိပ်ခံ ပြည်သူတရပ်လုံးကို ကာကွယ်ရန်နှင့် ဖက်ဒရယ်ဒီမိုကရေစီ ပြည်ထောင်စု တည်ဆောက်ရေးအတွက် ဆက်လက်တိုက်ပွဲ ဝင်သွားမည်ဟု သိရသည်။
