ယင်းဒေသက ချင်းတောင်အတွက် စစ်ရေးနှင့် နိုင်ငံရေးဗျူဟာအရ အင်မတန် အရေးကြီးနေရာဟုဆို
(006SV)
ချင်းအင်အားစုများအတွက် စစ်ရေးနှင့် နိုင်ငံရေးအရ အရေးကြီးသော ဗျူဟာလမ်းကြောင်းပေါ်မှာ ရှိသည့် ကလေး- ဂန့်ဂေါကြား စစ်ကောင်စီစခန်းသိမ်းတိုက်ပွဲများတွင် တော်လှန်ရေးပူးပေါင်းတပ်မှ ၂၀ ဦးကျော် ကျဆုံးပြီး ၇၀ ကျော် ထိခိုက်ဒဏ်ရာရရှိသည်။
စစ်ကိုင်းတိုင်း ၊ ကလေးမြို့တောင်ပိုင်းနှင့် မကွေးတိုင်း၊ ဂန့်ဂေါကြားရှိ စစ်ကောင်စီ အခြေစိုက်စခန်းများ ဖြစ်သည့် ကန်းပါးနီးစခန်း၊ မှန်တော၊ အရှေ့အောင်သာယာ၊ အနောက်အောင်သာယာ၊ ကြံသာရွာ စခန်းသိမ်း တိုက်ပွဲများနှင့်ပတ်သက်၍ ယနေ့ ဧပြီလ ၂၁ ရက်က CNF/ CNA ၊ CDF – KKG ပူးတွဲသတင်းစာရှင်းလင်းပွဲမှာ CDF – KKG ဥက္ကဌ ဆလိုင်းဇာဘွေထောင်က ပြောသည်။
“၂လကြာမြင့်တဲ့ စခန်း ၅ ခု စစ်ဆင်ရေးစခန်းသိမ်းတိုက်ပွဲတွေမှာ CDF – KKG အပါအဝင် မဟာမိတ်တပ်ဖွဲ့ဝင် ၂၀ ဦး ကျော် ကျဆုံးခဲ့ပါတယ်။ အဲဒီ ၂၀ ကျော်မှာက CDF – KKG က ၁၁ ဦးရှိခဲ့ပါတယ်။ ဒဏ်ရာရ ရဲဘော်ဆိုရင် အကြီးရော၊ အသေးအမွှာရော အကုန်လုံးက ၇၀ ကျော် ရှိခဲ့ပါတယ်။ ကလေးနယ်တောင်ပိုင်းမှာဆိုရင် ၉၅ ရာခိုင်နှုန်းကျော်ကိုတော့ တော်လှန်ရေးအဖွဲ့တွေက ထိန်းချုပ်ထားပါတယ်” ဟု ဆလိုင်းဇာဘွေထောင်က ပြောသည်။
ကလေး- ဂန့်ဂေါကြားက ကျန်ရှိသေးသော စစ်ကောင်စီစခန်းများ၊ ပျူစောထီး စိုးမိုးကျေးရွာများကို မကြာမီ ဆက်လက်ပြီး တိုက် ခိုက်သွားမည်ဖြစ်ကြောင်း၊ ကလေး – ဂန့်ဂေါလမ်းကြောင်းကို မိုးရာသီ မတိုင်မှီ ထိန်းချုပ်နိုင်ရေး ဆောင်ရွက်မည်ဟု ဆိုသည်။
CDF – KKG Major Operation အဖြစ် ဖော်ဆောင်သည့် ကလေး- ဂန့်ဂေါတကြောသည် ချင်းတောင်ကို စစ်ရေးနှင့် နိုင်ငံရေး ဗျူဟာအရ အင်မတန် အရေးကြီးသော နေရာဖြစ်သောကြောင့် ပထမအဆင့် စစ်ဆင်ရေး ဆောင်ရွက်ခြင်းဖြစ်သည်ဟု CNF/CNA ပြောရေးဆိုခွင့်ရှိသူ ဆလိုင်းထက်နီက ပြောသည်။
“အခုစစ်ဆင်ရေး လုပ်တဲ့နေရာမှာ စစ်ရေးအရသော်လည်းကောင်း၊ နိုင်ငံရေးအရသော်လည်းကောင်း အင်မတန်မှ အရေးကြီးတဲ့ ဗျူဟာလမ်းကြောင်းပေါ်မှာ ရှိတယ်။ အားလုံးသိတဲ့အတိုင်း ကျနော်တို့ သက်သေ အထောက်အထားတွေနဲ့ပြောရရင်တော့ မနှစ်က ကျနော်တို့ရဲ့ တော်လှန်ရေးရဲဘော်တွေ အရှင်လတ်လတ်နဲ့ မီးရှို့သတ်ဖြတ်ခဲ့တဲ့နေရာ ၊ပြည်သူလူထုရဲ့ အသက်အိုးအိမ်စည်းစိမ်တွေ မီးရှို့ဖျက်ဆီးပြီးတော့ စစ်ဘေးရှောင်ဘဝနဲ့ နေ့စဉ်ကျီးလန့်ဆန်စားဘဝနဲ့ နေနေရတဲ့ အဲဒီဒေသက ပြည်သူလူထုတွေရဲ့ အသက် အိုးအိမ်စည်းစိမ်လုံခြုံရေး နဲ့ အသက်မွေးဝမ်းကြောင်းကို လွတ်လပ်စွာလုပ်နိုင်ရေးနဲ့ အဲဒီလမ်းကြောင်းပေါ်မှာရှိတဲ့ ကုန်စည် ကူးသန်းမှု ဘေးကင်းလုံခြုံရေး၊ အဲဒီဒေသက နိုင်ငံရေးအရ စစ်ကောင်စီက ဒီဇင်ဘာလမှာ အကောင်ထည်ဖော်မဲ့ ရွေးကောက် ပွဲအတွက် အဲဒီမှာလုပ်နိုင်ဖို့ အားကောင်းတဲ့ နေရာဖြစ်ပါတယ်။ အဲဒါကြောင့် အဲဒီဒေသကို ကျနော်တို့က စစ်ဆင်ရေးကို ဖော်ဆောင်ရခြင်းဖြစ်ပါတယ်” ဟု ဆလိုင်းထက်နီက ပြောသည်။
ယင်းဒေသသည် ပြည်သူ သုံးသောင်းကျော် နေထိုင်ပြီး လယ်ဧကပေါင်း တသောင်းကျော်ရှိကာ ကုန်စည်ကူးသန်းမှုအရလည်း အရေးကြီးသော နေရာဖြစ်ကြောင်း စစ်ကောင်စီ၏ ပျူစောထီး ၁၀၀၀ ခန့် အင်အားရှိသော ဒေသလည်း ဖြစ်ကြောင်း သိရသည်။
တိုက်ပွဲ ၂လအတွင်း စစ်ကောင်စီက လေကြောင်းတိုက်ခိုက်မှုပေါင်း ၁၀၀၀ ကျော် ပြုလုပ်ခဲ့ပြီး စစ်ကောင်စီထံမှ လက်နက် ၅၀ ကျော်အပါအဝင် ခဲယမ်းအများအပြား သိမ်းဆည်းရမိခဲ့သည်ဟု သိရသည်။
ဆေးရုံး၊ စာသင်ကျောင်း ၊ သာသနိက အဆောက်အဦးနှင့် လူနေအိမ်ပေါင်း ၆၀ ကျော် ထိခိုက်ပျက်စီးပြီး ကျေးရွာပေါင်း ၁၂ ရွာမှ ဒေသခံပြည်သူ ၂၀၀၀၀ ဝန်းကျင် အိုးအိမ်စွန့်ခွာ စစ်ဘေးရှောင်နေရသည်ဟု သိရသည်။
တိုက်ပွဲအတွင်း အရပ်သားပြည်သူ ၁၅ ဦးထက်မနည်း သေဆုံးပြီး ၄၀ ကျော် ထိခိုက်ဒဏ်ရာ ရရှိခဲ့သည်ဟု သိရသည်။
CDF – KKG Major Operation ကို CNA မှ ဦးဆောင်စစ်ရေးကွပ်ကဲပြီး ချင်းတောင်ပေါ်နှင့် မြေပြန့်က တော်လှန်ရေး အင်အားစု ၁၂ ဖွဲ့ခန့်က ပူးပေါင်းဆင်နွှဲခဲ့ကြခြင်းဖြစ်သည်။
