(006SV)
ချင်းပြည်နယ်တောင်ပိုင်း၊ မင်းတပ်မြို့နယ်ထဲက ကျေးရွာကို စစ်ကောင်စီက လေကြောင်းမှ ဗုံးကြဲတိုက်ခိုက်မှု ပြုလုပ်ခဲ့ရာ ကလေးငယ် ၁ ဦးအပါအဝင် ၃ ဦး သေဆုံးခဲ့ပြီး ၁၀ ဦးခန့် ထိခိုက်ဒဏ်ရာများ ရရှိခဲ့သည်ဟု မင်းတပ်ဒေသခံထံမှ သိရသည်။
ယနေ့ မေလ ၁၅ ရက် နံနက် ၉ နာရီ ၄၀ မိနစ်ခန့်က မင်းတပ်မြို့နယ်၊ တိုက်နယ် အမှတ် -၁ ထဲက ကျေးရွာကို တိုက်ပွဲဖြစ်ပွားခြင်း မရှိဘဲ အကြောင်းမဲ့သက်သက်ဖြင့် စစ်ကောင်စီက ဗုံးကြဲတိုက်ခိုက်ခဲ့ခြင်းဖြစ်သည်ဟု ဒေသခံက ပြောသည်။
“အမှတ် ၁ ဘက်မှာ ရှိတဲ့ ရွာကို အကြောင်းမဲ့ ဗုံးကြဲတိုက်ခိုက်ခဲ့တယ်လို့ ကြားသိရပါတယ်။ သေဆုံးသူက ၃ ဦး၊ ၁၀ ဝန်းကျင်း ထိခိုက်ဒဏ်ရာရရှိတယ်။ လောလောဆယ်က အကုန်အတည်မပြုနိုင်သေးတော့ အသေးစိတ်ဖြေဖို့ အဆင်မပြေသေးပါဘူး” ဟု မင်းတပ်ဒေသခံက ပြောသည်။
သေဆုံးသူများမှာ ၆ တန်အရွယ် ကလေးငယ် ၁ ဦး၊ ကလေး၏ အမေဖြစ်သည့် အသက် ၃၀ ကျော်အရွယ် အမျိုးသမီး ၁ ဦးနှင့် လူငယ်အမျိုးသား ၁ ဦးတို့ သေဆုံးခဲ့သည်ဟု သိရသည်။
ဗုံးဒဏ်ကြောင့် လူနေအိမ် ၁၀ လုံးကျော်လည်း ထိခိုက်ပျက်စီးခဲ့ပြီး တချို့အိမ်မှာ မီးလောင်မှု ဖြစ်ပွားခဲ့သည်ဟု သိရသည်။
မေလ ၉ ရက်ကလည်း မင်းတပ်မြို့ကို စစ်ကောင်စီက လေကြောင်းမှ ဗုံးကြဲတိုက်ခိုက်မှု ၂ ကြိမ်ပြုလုပ်ခဲ့ရာ အစိုးရ အဆောက် အဦးနှင့် ပြည်သူနေအိမ် စုစုပေါင်း ၁၅ လုံးခန့် ထိခိုက်ပျက်စီးမှုရှိခဲ့သည်ဟု မင်းတပ်မြို့ ပအဖက ထုတ်ပြန်ထားသည်။
စစ်ကောင်စီသည် အပစ်ရပ်ထပ်မံ သက်တမ်းတိုးထားသော်လည်း မေလ ၆ ရက်မှ ၁၅ ရက်အတွင်း ချင်း၊ ကချင်၊ ကရင်၊ ကရင်နီ၊ ရှမ်းမြောက်၊ စစ်ကိုင်း၊ မန္တလေးနှင့် မကွေး တို့ကို နေ့စဉ်နီးပါးလေကြောင်းတိုက်ခိုက်မှုတွေ ပြုလုပ်နေရာ ပြည်သူ ၉၀ နီးပါး သေဆုံးခဲ့ရသည်ဟု သိရသည်။
