(004SS)
ချင်းပြည်နယ်တောင်ပိုင်းရှိ ပလက်ဝမြို့နယ်ကို အာရက္ခတပ်တော် (ULA/AA) က ရခိုင်ပြည်နယ်၏ ၈ ခုမြောက်ခရိုင်အဖြစ် ဖွဲ့စည်းထည့်သွင်းမှုကို Global Khumi Organization (GKO) က ပြင်းထန်စွာ ရှုတ်ချကြောင်း ထုတ်ပြန်သည်။
ULA/AA သည် ရခိုင်ပြည်နယ်အား ခရိုင် ၈ ခုဖြင့် ပြန်လည်ဖွဲ့စည်းရာတွင် ပလက်ဝမြို့နယ်ကို ရခိုင်ပြည်နယ်၏ ခရိုင် တစ်ခုအဖြစ် ထည့်သွင်းခဲ့သည်ဟု ရခိုင်အခြေစိုက် Narinjara သတင်းဌာနက ဇွန်လ ၁၂ ရက်နေ့က ရေးသားဖော်ပြမှုနှင့် ပတ်သက်၍ Global Khumi Organization (GKO) က ယခုကဲ့သို့ထုတ်ပြန်လာခြင်းဖြစ်သည်။
ဒေသခံချင်းတိုင်းရင်းသားများ၏ သဘောထားမပါဘဲ ပလက်ဝခရိုင်ကို ရခိုင်ပြည်ထဲသို့ ထည့်သွင်းခြင်းသည် ဒေသခံ ခူမီး(ချင်း) ပြည်သူများနှင့် ချင်းတစ်မျိုးသားလုံးကို စော်ကားခြင်းဖြစ်သောကြောင့် ULA/AA ၏ လုပ်ရပ်ကို ပြင်းထန်စွာ ရှုပ်ချကြောင်း Global Khumi Organization – GKO က ဖော်ပြထားသည်။
ပလက်ဝခရိုင်သည် ၁၈၇၆ ခုနှစ်၊ အင်္ဂလိပ်လက်အောက်ကျရောက်စဉ်က ရခိုင်မြောက်ပိုင်း တောင်တန်းခရိုင်ဟု သတ်မှတ်ခဲ့ သော်လည်း ခူမီးလူမျိုးများက သီးခြားလွပ်လပ်စွာ အုပ်ချုပ်ခဲ့သောနယ်မြေဖြစ်သည်ဟု သိရသည်။ ပလက်ဝခရခိုင်သည် ၁၉၄၇၊ ၁၉၇၄ နှင့် ၂၀၀၈ ဖွဲ့စည်းပုံအခြေခံဥပဒေများအရ ချင်းပြည်နယ်ရှိ မြို့နယ် ၉ ခုထဲက တစ်ခုဖြစ်သည်။
ပလက်ဝ၏ တည်ရှိမှုသည် ခူမီးလူမျိုးတို့၏ ဖြစ်တည်မှုနှင့် တစ်ထပ်တည်းဖြစ်ကာ ဝိသေသလက္ခဏာ၊ လူမျိုးဖြစ်တည်မှုနှင့် ခွဲခြား၍မရနိုင်သော ဘိုးဘွားပိုင်နယ်မြေဖြစ်ပြီး ခူမီး(ချင်း) လူမျိုးများ၏ မြင့်မြတ်ပြီး အစားထိုးမရသော မွေးရပ်မြေဖြစ် သည်ဟု GKOက ဆိုသည်။
ထို့ကြောင့် ပလက်ဝအား ULA/AA ၏ တရားမဝင်သိမ်းယူရန် ကြိုးစားအပေါ် နိုင်ငံတော်အစိုးရ၊ နိုင်ငံတကာအသိုင်းအဝိုင်း၊ ချင်းပြည်အစိုးရနှင့် အခြားသက်ဆိုင်သည့် နိုင်ငံတကာအဖွဲ့အစည်းများအနေဖြင့် ဒေသခံပြည်သူများ၏ မူလအခွင့်အရေးများကို ကာကွယ်စောင့်ရှောက်ပေးရန် Khumi Organization – GKO က အလေးအနက်ထား တိုက်တွန်းထားသည်။
