လိုင်စင်မရှိသော ယာဉ်များဖမ်ဆီးးမည်ဟုဆို
(004SS)
စစ်ကိုင်းတိုင်း၊ ကလေးမြို့အတွင်း လောင်စာဆီပြတ်လပ်မှု အခက်အခဲကြောင့် မော်တော်ယာဉ်နှင့် ဆိုင်ကယ် များကို နံပါတ်ပြားနောက်ဆုံးဂဏန်းအပေါ် မူတည်ပြီး စုံ/မ စနစ်ဖြင့်သာ သွားလာခွင့်ပြုတော့မည်ဟု ဒေသခံများထံမှ သိရသည်။
ကလေးမြို့တွင် ဧပြီလ ၁ ရက်နေ့မှစတင်ကာ ကျင့်သုံးမည်ဟု ယမန်နေ့ မတ်လ ၃၀ ရက်နေ့တွင် ယာဉ်ထိန်းရဲတပ်ဖွဲ့များ သည် မြို့ထဲ့သို့ ကွင်းဆင်းကာ အသိပေးခဲ့ကြောင်း ဆိုသည်။
“မနေ့က RTC ရပ်ကွက် ပြည်လမ်းမှာ မော်တော်ပီကယ်တွေက ကားတွေ၊ ဆိုင်ကယ်တွေရပ်ခိုင်း စုဝေးခိုင်းပြီးတော့ ဘယ်နံပါတ်တွေ ဘယ်နေ့ထွက်ရမယ်၊ ဆိုင်ကယ်လိုင်စင်မရှိရင် ဖမ်းမယ်ဆိုပြီး ကွင်းဆင်းပြီး အသိပေးတာပါ။ လောလောဆယ်တော့ ကလေးမြို့မှာ စမှာပေါ့နော်။ ကြားရသလောက် တနိုင်ငံလုံးမှာ အဲလိုလုပ်မယ်ထင်ပါတယ်။ ” ဟု ကလေးမြို့နေ ဒေသခံအမျိုးသမီးတစ်ဦးက ပြောသည်။
ယာဉ်ထိန်းရဲများ၏ ပြောကြားချက်အရ ဧပြီ ၁ ရက်နေ့မှစတင်ကာ အဆိုပါ စုံ/မ စနစ်ကို စတင်စစ်ဆေးမည်ဖြစ်ပြီး ဆိုင်ကယ်လိုင်စင်မရှိသူများကိုလည်း တင်းကျပ်စွာ ဖမ်းဆီးအရေးယူသွားမည်ဟု သတိပေးခဲ့ကြောင်း ဆိုသည်။
ဘက်ထရီဆိုင်ကယ်များကိုမူ လောင်စာဆီအသုံးမပြုသည့်အတွက် ယခုကန့်သတ်ချက်တွင် အကျုံးမဝင်ဘဲ ပုံမှန်အတိုင်း သွားလာနိုင်ကြောင်း သိရသည်။
စစ်ကော်မရှင်၏ထုတ်ပြန်ချက်အရ လစဉ် “စုံ” ရက်များတွင် စုံနံပါတ် အက္ခရာပါသော ယာဉ်များ၊ “မ” ရက်များ၌ မ နံပါတ်ပါသည့်ယာဉ်များ မောင်းနှင်အသုံးပြုရမည်ဟု ဆိုထားသည်။
ယာဉ်မောင်းနှင်သူများအနေဖြင့် မိမိ ယာဉ်နံပါတ်ပြား နောက်ဆုံးဂဏန်း (ဉပမာ- ၁၃ ယ ဆိုပါက) မဂဏန်း ၁၊၃၊၅၊၇၊၉ထဲက ၃ ဖြစ်သည့်အတွက် ရက်သတ္တပါတ်၏ ၁၊၃၊၅၊၇၊ ၉ ရက်နေ့များတွင် သွားလာရမည်ဖြစ်ပြီး စုံဂဏန်း (၂၊၄၊၆၊၈) ဆိုပါက ရက်သတ္တပါတ်၏ ၂၊၄၊၆၊၈ ရက်နေ့များတွင်သာ သွားလာရမည်ဟု နားလည်ရသည်။
ယနေ့ မတ်လ ၃၁ ရက်နေ့တွင်လည်း ကလေးမြို့အတွင်း စစ်ကော်မရှင်လက်အောက်ခံ ယာဉ်ထိန်းရဲများမှ လမ်းသွား လမ်းလာ ယာဉ်အချို့ဖမ်းဆီးမှုများရှိခဲ့ကြောင်း ဒေသခံများထံမှ သိရသည်။
