(006SV)
ကနေဒီတောင်နှင့် တီးတိန်မြို့ကြား ချီတက်လာသော အာဏာသိမ်းစစ်တပ် စစ်ကြောင်းကို ကြားဖြတ်တိုက်ခိုက်ခဲ့ရာ ZRA – EC တပ်ဖွဲ့ဝင် ၃ ဦးအပါအဝင် စစ်ကောင်စီတပ်မှ ၆ ဦး သေဆုံးပြီး အများအပြား ထိခိုက်ဒဏ်ရာ ရရှိကြောင်း PDF – Zoland ထံမှ သိရသည်။
ဇူလိုင်လ ၂၁ ရက် ချင်းပြည်နယ်မြောက်ပိုင်း၊ တီးတိန်မြို့နယ်အတွင်းရှိ ကနေဒီတောင်နှင့် တီးတိန်မြို့ကြား စစ်ကြောင်းထိုးလာနေသော စစ်တပ်၏ တပ်ဖွဲ့ဝင်များကို ကြားဖြတ်တိုက်ခိုက်နိုင်ခဲ့သည်ဟု ချင်းကာကွယ်ရေးတပ်ဖွဲ့ ZFU/ PDF Zoland က ဇူလိုင်လ ၂၂ ရက်မှာ ထုတ်ပြန်သည်။
တိုက်ပွဲအတွင်း စစ်ကောင်စီတပ်ဖွဲ့ဝင် ၆ ဦး သေဆုံးပြီး အများအပြား ထိခိုက်ဒဏ်ရာများ ရရှိခဲ့ကာ ZRA- EC တပ်ဖွဲ့ဝင် ၃ ဦး ပါဝင်ကြောင်း ၎င်းတို့၏ ထုတ်ပြန်ချက်အရ သိရသည်ဟု PDF- Zoland ထံမှ သိရသည်။
အဆိုပါ စစ်ဆင်ရေးသည် PDF – Zoland နှင့် အာဏာသိမ်းစစ်တပ်တို့ကြားမှ တိုက်ပွဲတစ်ခုသာ ဖြစ်ကြောင်း ပြည်သူများ သိရှိစေရန် အသိပေးထုတ်ပြန်ရသည်ဟု PDF – Zoland က ဆိုသည်။
တိုက်ပွဲသည် ဇူလိုင်လ ၂၁ ညဦးပိုင်း ၈ နာရီခန့်တွင် စစ်တပ်နှင့် ZRA – EC ပူးပေါင်းတပ်တို့၏ ကင်းလှည့်ကားကို မြေမြုပ်မိုင်း၊ လက်နက်ကြီး၊ လက်နက်ငယ်များဖြင့် PDF – Zoland က ကြားဖြတ်တိုက်ခိုက်ခဲ့သည်ဟု ZRA-EC တပ်ဖွဲ့ဝင် Joshua Zomi က ၎င်း၏ လူမှုကွန်ယက်စာမျက်နှာတွင် ဖော်ပြထားသည်။
သေဆုံးသွားသည့် ZRA-EC တပ်ဖွဲ့ဝင် ၃ ဦးမှာ လမ်ဇမ်းရွာသား မွန်ဂျက်၊ ဘွမ်းလီရွာသား ကေဗီ နှင့် လဲဇန် ရွာသား ထန်နို တို့ဖြစ်ကြောင်း သိရသည်။
စစ်အာဏာရှင်ကို လက်နက်ကိုင်တော်လှန်ရေး အားကောင်းသော ချင်းပြည်နယ်တွင် ZRA – EC တပ်ဖွဲ့သည် စစ်ကောင်စီနှင့် ပူးပေါင်းပြီး ချင်းကာကွယ်ရေးတပ်ဖွဲ့များကို ဖိနှိပ်နေသော တပ်ဖွဲ့ဖြစ်ကာ တွန်းဇံမြို့နှင့် တီးတိန်မြို့အပါအဝင် ချင်းပြည်နယ်မြောက်ပိုင်းမှာ စစ်ရေး၊ နိုင်ငံရေးလှုပ်ရှားနေသော အဖွဲ့ဖြစ်သည်။
၂၀၂၆ မေလက ချင်းကာကွယ်ရေးတပ်ဖွဲ့က ထိန်းချုပ်ထားသော တွန်းဇံမြို့ကို အာဏာသိမ်းစစ်တပ်နှင့် ပူးပေါင်း၍ ထိုးစစ်ဆင် သိမ်းပိုက်ခဲ့သလို ချင်းပူးပေါင်းတပ်ဖွဲ့၏ တီးတိန်မြို့သိမ်းတိုက်ပွဲနှင့်ပတ်သက်၍ သတင်းများ ထွက်လာစဉ်ကလည်း မြို့လုံခြုံရေးကိုလည်း စစ်တပ်နှင့် ပူးပေါင်း၍ ဆောင်ရွက်ခဲ့သော အဖွဲ့ဖြစ်သည်။
