မတူပီခရိုင်ရုံးကို ဖနိုင်-ငလိုင်ဘက်တွင် တည်ဆောက်မည်

0

By လားနွန် – ချင်းပြည်နယ်တောင်ပိုင်း မတူပီခရိုင်ရုံးကို ဖနိုင်-ငလိုင်ဘက်တွင်တည်​​ဆောက်ရန် ချင်းပြည်နယ်အစိုးရက ရွေးချယ်လိုက်ပြီဟုသိရပြီး ထိုကဲ့သိုရွေးချယ်လိုက်ခြင်း မတူပီလူထုဆန္ဒကို မလေးစားခြင်းမဟုတ်ဘူးဟု ချင်းပြည်နယ်အစိုးရပြောရေးဆိုခွင့်ရှိသူ စည်ပင်ဝန်ကြီး ဦးစိုးထက်ကပြောသည်။

“ခရိုင်ရုံးဆောက်ဖို့နေရာကို ကျွန်တော်တို့ ဖနိုင်-ငလိုင်ကိုရွေးပြီးပါပြီ အဲဒီမှာပဲ အစိုးရက ဆက်လုပ်သွားမှာပါ လူထုဆန္ဒကိုလေးစားတယ် လူထုဆန္ဒကိုလည်းလိုက်နာခဲ့တယ် နားထောင်ပြီးပြီ အဲဒီလူတိုင်းရဲ့ ဆန္ဒအတိုင်းလုပ်မယ်ဆိုရင်တော့ ဒီဘက်ဂျက်ကပြန်အမ်းရမှာအမှန်ပဲ ဒါပေမဲ့အခုကတော့ ဒီအဆောက်အဦးဆောက်တယ် ခရိုင်ကိုပေးတယ်ဆိုတာ အုပ်ချုပ်ရေးစနစ် ဒီဒေသဖွံ့ဖြိုးရေးအတွက်ကို စီစဉ်ပေးတဲ့ဟာပဲ အဲဒါကို အစိုးရရဲ့စီမံခန့်ခွဲတဲ့ဟာကို တအားကို ဒီလိုကန့်ကွက်နေမယ်ဆိုရင် နစ်နာဆုံးရှုံးမှာသူတို့ပဲ နစ်နာဆုံးမှာ ဆိုတော့ကျွန်တော်တို့က ဖနိုင်-ငလိုင်ရွေးပေးပြီ အဲဒီမှာ ခရိုင်ရုံးဆောက်ဖို့ရန်နဲ့ အိမ်ယာဆောက်မှာပါ” ဟုစည်ပင်ဝန်ကြီး ဦးစိုးထက်ကပြောသည်။

မတူပီခရိုင်ရုံးတည်ဆောက်ရန်အတွက် မြေနေရာအငြင်းပွားမှုသည်​ ၇ လကျော်သွားပြီဖြစ်ပြီး ၅ လသာကျန်ရှိ​တော့သည့်​အတွက်​ အမြန်​ဆုံး တင်ဒါခေါ်ယူပြီး တည်​​ဆောက်​​တော့မည်​ဟု ၀န်ကြီးကပြောသည်။

“ခရိုင်ရုံးဆောက်ဖို့ရန်နဲ့ အိမ်ယာဆောက်ဖို့ရန်အတွက် ၁.၇ ဘီလီယံကျော်နှင့် အခုတင်ဒါခေါ်ပြီးပြီး အခုတင်ဒါက ဒီမေလ ၁၀ ရက်နေ့မှာ တင်ဒါပိတ်မယ် ၂၀ ရက်နေ့ကျရင် တင်ဒါဖွင့်မယ် အဲဒီအတိုင်းပဲဆက်လုပ်မှာ နောက်တစ်ချက်က အခုကအဲဒီမြေနေရာအငြင်းခုံဖြစ်တာနဲ့ပဲ အခု ၇ လကျော်သွားပြီ ဒီဘက်မှာ ၅ လပဲကျန်တော့တယ် ၅ လတောင်မှ အခုလဆန်းဖြစ်တယ် တင်ဒါပတ်မှာက ၁၀ ရက်နေ့ ဖွင့်မှာက ၂၀ ရက်ဆို အဲဒီမှာတင်ပဲ ဟိုဘက်မှာ ၁၀ ရက်ပဲကျန်တော့တယ်ဆိုတော့ ၄ လနဲ့ ၁၀ ရက်ပဲ ဆောက်လုပ်မယ့်အချိန်ကျန်တာ ကုမ္ပဏီတွေကလည်း ဒီကာလမှာ သူ့ရဲ့တင်ဒါလုပ်ထုံးလုပ်နည်းနဲ့ လုပ်ရမယ် စာချုပ်ချုပ်ရမယ် နောက်ပြီးတော့ ဘက်ဂျက်ရဲ့အနေအထား ဒီ ၄ လအတွင်းမှာဒီခရိုင်ရုံးကြီးဆောက်ဖို့ ပြီးဖို့ဆိုတာလုံးဝမလွယ်ဘူး အဲဒါကြောင့် ကျွန်တော်တို့က ကုမ္ပဏီကိုမပေးပဲနဲ့ အစိုးရဌာနဖြစ်တဲ့ ဆောက်လုပ်ရေးဝန်ကြီးဌာနကိုပဲအပ်လိုက်ပြီးမှ အဲဒီကပညာရှင်တွေနဲ့ စနစ်တကျကောင်းကောင်းမွန်မွန်နဲ့ အရည်အသွေးကောင်းကောင်းနဲ့ အဲလိုဆောက်ဖို့ ကျွန်တော်တို့ အစိုးရအဖွဲ့ကနေအခုစဉ်းစားထားတယ်” ဟု စည်ပင်ဝန်ကြီးဦးစိုးထက်ကပြောသည်။

၎င်းခရိုင်ရုံးတည်ဆောက်ရန်အတွက် ပြီးခဲ့သည့်ရက်ပိုင်း နိုင်ငံတော်ဒုတိယသမ္မတ ဦးဟင်နရီဗန်ထီးယူ ခရီးစဉ်အတွင်း မတူပီမြို့မိမြို့ဖများမှ ခရိုင်ရုံးအား လက်ရှိမတူပီထွေအုပ်ရုံးနှင့် အတူပူးတွဲဆောက်လုပ်ပေးပါရန်၊ ဖနိုင် – ငလိုင်ဘက်နှင့် မတူပီနှင့်အလယ်ကျသည့် ဖူလ်ပါးကွင်းတွင်တည်ဆောက်ပေးရန်နှင့် စည်ပင်နယ်နမိတ်အတွင်းတည်ဆောက်ပေးရန် တောင်းဆိုထားကြောင်း ၎င်းတို့ဆန္ဒအတိုင်း မလုပ်​​ဆောင်​ပါက ဆက်​လက်​ပြီး ကန့်​ကွက်​ ဆန္ဒပြကြမည်​ဟု မတူပီဒေသခံ ဦးဘူဖွေးကပြောသည်။

“မတူပီခရိုင်ရုံးက အဲဒီတည်ဆောက်မယ့် မြေနေရာမပြောင်းမလဲခြင်း အခုချင်းပြည်နယ်အစိုးရရဲ့ မူဝါဒမပြောင်းမလဲခြင်း ကျွန်တော်တို့ ဆန္ဒထုတ်ဖော်မယ်ဆိုပြီးမှ ကျွန်တော်တို့ မြို့မိမြို့ဖအစည်းအဝေးမှာ သူတို့ ဆွေးနွေးပြီးပြီ၊ အောက်ခြေမှာဒီလောက်ထိတင်ပြရဲ့သားနဲ့နားမထောင်တာ တကယ့်ကို အံသြစရာကောင်းတယ် ပြည်သူတစ်ချို့အနေနဲ့ ဟိုဘက်မှာလည်း နေရာလိုတယ် ဒီဘက်မှာလည်းနေရာလိုတယ်အခါမှာ ကျွန်တော်တို့မြို့မိမြို့ဖက ဖနိုင် – ငလိုင်ကို ကန့်ကွက်တာမဟုတ်ဘူး သူတို့ ရုံးကိုတည်ဆောက်ပါ တစ်ခြားဌာနတွေကိုလည်းတည်ဆောက်ပါ ခင်ဗျားတို့အစိုးရလုပ်ပိုင်ခွင့်တွေရှိရင်လည်းတည်ဆောက်ပါ မြို့ကိုလည်းတိုးချဲ့ပါဆိုပြီးမှ သူတို့ခွင့်ပြုပါတယ် ကန့်ကွက်တာမဟုတ်ဘူး ခရိုင်အုပ်ချုပ်မှူးရုံးတစ်ခုတည်းကိုပဲ ပြည်သူလူထုသွားလာဖို့ လွယ်ကူတဲ့နေရာ အဲဒီရုံးပဲ မြို့ပေါ်မှာတည်ဆောက်ပေးပါ အဲတာကိုပဲ အကြိမ်ကြိမ်တောင်းဆိုတာ ပြည်သူ့အသံကို နားမထောင်တဲ့လုပ်ရပ်ဟူသမျှက ပြည်သူတွေအလိုမရှိဘူး မတူပီမြို့မိမြို့ဖများက အဲလိုဆုံးဖြတ်တယ်” ဟု ဦးဘူဖွေးကပြောသည်။

မတူပီဒေသခံပြည်သူများက မတူပီခရိုင်အုပ်ချုပ်ရေးမှူးရုံးကို မြို့တွင်းစည်ပင်ဧရိယာတွင် တည်ဆောက်ပေးရန်လိုလားနေကြသော်လည်း မြေနေရာလုံလောက်မှုမရှိခြင်းနှင့် ပညာရှင်များ၏ ကွင်းဆင်းစစ်ဆေးမှုအရဟုဆိုကာ ချင်းပြည်နယ်အစိုးရက မတူပီမြို့နှင့် ၉ မိုင်ခန့်အကွာ ဖနိုင် – ငလိုင်ကျေးရွာဘက်တွင် တည်ဆောက်ရန်စီစဉ်နေခြင်းဖြစ်သည်။ မတူပီခရိုင်တည်ဆောက်ရန်အတွက် ၂၀၁၈ -၂၀၁၉ ဘဏ္ဍာရေးနှစ်တွင် စုစုပေါင်းကျပ်သန်းပေါင်း (၁၈၂၄ ဒသမ ၉) ချထားပြီးဖြစ်သည်။

Share.

About Author

Leave A Reply

*

code