(004SS)
ချင်းပြည်နယ်၊ ဟားခါးမြို့မ ရဲစခန်းအချုပ်ထောင်မှ CDF-Hakha တပ်ဖွဲ့က ကယ်ထုတ်ခဲ့သော အကျဉ်းသူ/သား ၆၂ ဦးအနက် ထောင်ဒဏ် တစ်သက်တစ်ကျွန်း ချမှတ်ခံရသူ ၇ ဦးပါဝင်ကြောင်း ချင်းလူ့အခွင့်အရေးအဖွဲ့ CHRO က ယမန်နေ့ ဇူလိုင် ၃၀ ရက်နေ့တွင် ထုတ်ပြန်သည်။
ဇူလိုင်လ ၂၀ ရက်နေ့တွင် Operation Rung အမည်နဲ့ CDF – Hakhaမှ ဟားခါးမြို့မရဲစခန်းအား တိုက်ခိုက်ခဲ့ပြီး အကျဉ်းချခံရသူ အမျိုးသား ၄၉ ဦးနှင့် အမျိုးသမီး ၁၃ ဦး စုစုပေါင်း ၆၂ ဦးကို ကယ်ထုတ်နိုင်ခဲ့ခြင်းဖြစ်သည်။
အဆိုပါကယ်ထုတ်ခံရသူများအနက် စစ်ခုံရုံးက ထောင်ဒဏ်တစ်သက် တစ်ကျွန်း ချမှတ်ခဲ့သည့် အရပ်သား ၇ ဦးပါဝင်ပြီး၊ အကြမ်းဖက်မှုတိုက်ဖျက်ရေးဥပဒေဖြင့် ထောင်ဒဏ် ၅ နှစ် ချမှတ်ခံရသူ ၁၅ ဦး၊ ထောင်ဒဏ် ၇ နှစ်ချမှတ်ခံရသူ ၁၅ ဦး၊ ထောင်ဒဏ် ၃ နှစ် ချမှတ်ခံရသူ ၉ ဦးနှင့် ထောင်ဒဏ် ၆ နှစ်၊ ၈ နှစ်၊ ၁၃ နှစ် ချမှတ်ခံရသူ ၃ ဦး ပါဝင်ကြောင်း ချင်းလူ့အခွင့်အရေးအဖွဲ့ (CHRO ) ၏ ထုတ်ပြန်ချက်အရ သိရသည်။
ဟားခါးမြို့မရဲစခန်းတိုက်ခိုက်မှုတွင် ရဲတပ်သား ၃ ဦးသေဆုံးခဲ့သည်နည်းတူ ဒါဏ်ရာရရှိသူများပြားခဲ့ပြီး လက်နက်ခဲယမ်း များကိုလည်း CDF – Hakha မှ သိမ်းဆည်းရရှိခဲ့သည်။
ပြီးခဲ့သည့် ဇူလိုင်လ ၄ ရက်နေ့တုန်းကလည်း မတူပီမြို့သိမ်းတိုက်ပွဲတွင် စစ်ကောင်စီတပ်က ဖမ်းဆီးချုပ်နှောင်ထားသော ထောင်ဒဏ်တစ်သက်ကျခံသူ ၂ ဦးအပါအဝင် နိုင်ငံရေးအကျဉ်းသား ၁၃ ဦးကိုကယ်ထုတ်နိုင်ခဲ့သည်ဟု CDF-Matupi တပ်မဟာ ၁ က ထုတ်ပြန်ခဲ့သည်။
အလားတူ မေလ ၂၂ ရက်နေ့တုန်းကလည်း တွန်းဇံမြို့သိမ်းတိုက်ပွဲတွင် စစ်ကောင်စီက ထောင်ဒဏ်တစ်သက်ချမှတ်ခဲ့သော CDM အမျိုးသမီးတစ်ဦးအပါဝင် ၃ ဦးကို ချင်းလဲန်းကောင်စီပူးပေါင်းတပ်က ကယ်ထုတ်ခဲ့ကြသည်။
