ကန်ပက်လက်တွင် ချင်းတော်လှန်ရေးအဖွဲ့ အချင်းချင်း စီးနင်းဖမ်းဆီးမှုဖြစ်ပွား

(006SV)

ချင်းပြည်နယ်၊ ကန်ပက်လက်မြို့နယ်တွင် ချင်းတော်လှန်ရေးအင်အားစု အချင်းချင်းဖြစ်သည့် ကန်ပက်လက်ကောင်စီ ခေါင်းဆောင်တချို့ကို CDF – ကန်ပက်လက်က စီးနင်းဖမ်းဆီးမှုများ ဖြစ်ပွားခဲ့ကြောင်း သိရသည်။

နိုဝင်ဘာလ ၂၄ ရက်က ကန်ပက်လက်မြို့နယ်၊ အမှတ် ၅ ဒေသတွင် ကန်ပက်လက်ကောင်စီ ဥက္ကဌ ဦးမနားထန်းကို CDF – ကန်ပက်လက်က အင်အား ၁၅ ဦးခန့်ဖြင့် လာရောက်ဖမ်းဆီးခဲ့သည်ဟု ကန်ပက်လက်ကောင်စီအဖွဲ့ဝင် တစ်ဦးက ပြောသည်။

ဦးမနားထန်းကို အသင်းတော်တစ်ခုတွင် ဝတ်ပြုနေသည်ကို တွေ့ရှိချိန် ခေါ်ဆောင်ရန် ကြိုးစားရာတွင် ဒေသခံရွာသားတချို့နှင့် CDF – ကန်ပက်လက်တပ်ဖွဲ့ဝင်များ ထိပ်တိုက်တွေ့ပြီး ပြန်လည်ထွက်ခွာသွားသည်ဟု သိရသည်။

“ဦးမနားထန်းက တနင်္ဂနွေးနေ့ဆိုတော့ ဘုရားဝတ်ပြုနေတာ၊ အဲဒီမှာ ပြည်သူလူထုတွေလည်း ရှိတယ်။ အဲဒါ သူတို့ရောက်တာနဲ့။ လူထုက လက်မခံတာနဲ့ သူကိုဖမ်းရင် လူထုနဲ့ ပဋိပက္ခဖြစ်မယ်ဆိုပြီး လူထုက ဆန္ဒပြတော့ မနားထန်းက အဖမ်းမခံရဘူး” ဟု ကန်ပက်လက်ကောင်စီအဖွဲ့ဝင် တစ်ဦးက ပြောသည်။

ထို့နောက် CDF – ကန်ပက်လက်မှ ရဲဘော်များသည် ကန်ပက်လက်ကောင်စီ မြို့နယ်အုပ်ချုပ်ရေးမှူး ဦးဟာကီးကို နေအိမ်တွင် သွားရောက်ဖမ်းဆီးခဲ့ကြောင်း သိရသည်။

ဦးဟာကီးသည် နေအိမ်အနောက်ဘက် ပြတင်းမှ ထွက်ပြေးလွတ်မြောက်သွားခဲ့ပြီး၊ တောထဲတွင် တိမ်းရှောင်နေရကြောင်း၊ ၎င်းနေအိမ်မှ စာရွက်စာတမ်းနှင့် အဝတ်အထည်တချို့ ယူဆောင်သွားခံရသည်ဟု သိရသည်။

“အခုက ကန်ပက်လက်မှာ ကျနော်တို့ နေဖို့က လုံးဝအဆင်မပြေဘူး။ စစ်ဘေးကလည်း ရှောင်ရသေးတယ်။ နောက်ဆုံးတော့ ကောင်စီအကြီးအကဲတွေရယ်၊ အုပ်ချုပ်ရေးမှူးတွေကို သူတို့က အားလုံးဖမ်းချုပ်မယ်။ ကောင်စီကို ဖျက်သိမ်းမယ်။ အဲဒါကို ဦးတည်ထားပြီး လုပ်တာဖြစ်ပါတယ်။ ကျနော်ကိုလည်း ရှောင်ခိုင်းတယ်။ အခြေအနေကြည့်နေရတယ်” ဟု ကန်ပက်လက် ကောင်စီအဖွဲ့ဝင်တစ်ဦးက ပြောသည်။

ယခုကိစ္စနှင့်ပတ်သက်၍ CDF – ကန်ပက်လက်မှ တာဝန်ရှိသူတစ်ဦးက ကန်ပက်လက်ကောင်စီမှ အင်အားစုတချို့ကို သွားရောက်ဖမ်းဆီးခဲ့ပြီး ဖမ်းမမိခဲ့ကြောင်း အတည်ပြုဖြေဆိုသည်။

“ကျနော်တို့ သွားဖမ်းတာက ပြည်သူတွေကြားထဲမှာ သတင်းအမှားတွေဖြန့်ဝေပြီး ပြည်သူလူထုကိုယ်စားဆိုပြီး သူ့သဘောနဲ့သူ ထုတ်ပြန်ချက်တွေ မကြာခဏထုတ်‌နေသလို၊ ပြည်သူတွေကို ထိန့်လန့်အောင် သတင်းမှား‌ တွေ မကြာခဏ ဖြန့်ဝေနေပါတယ်လို့ ခိုင်လုံတဲ့ အ‌ထောက်အထားတွေနဲ့ ကန်ပက်လက်မြို့နယ် ပြည်သူလူထု‌ဆီက မကြာခဏ တိုင်တန်းချက်‌တွေ ရှိလို့ အကြိမ်ကြိမ် သတိပေးမှုတွေလုပ်တာလည်း တစ်နှစ်ကျော်ပါပြီ။ ဒါ‌ကြောင့် သွား‌ရောက်ဆင့်ခေါ်တာကို ထွက်ပြေးတိမ်းရှောင်နေတာပါ” ဟု CDF ကန်ပက်လက်မှ တာဝန်ရှိသူတစ်ဦးက ပြောသည်။

ကန်ပက်လက်မြို့နယ်တွင် ကန်ပက်လက်ကောင်စီနှင့် ယခင်က CDF – ကန်ပက်လက် တပ်ရင်း ၇ တို့သည် ချင်းလဲန်းကောင်စီ၏ အဖွဲ့ဝင်ဖြစ်ပြီး CDF – ကန်ပက်လက်နှင့် ကန်ပက်လက်မြို့နယ်ကောင်စီတို့သည် ICNCC / ချင်းညီနောင်တို့၏ အဖွဲ့ဝင်ဖြစ်သည်။