ချင်းပြည်နယ်တောင်ပိုင်း၊ ကန်ပက်လက်မြို့နယ်ဘက်မှာ စစ်ကောင်စီတပ်နဲ့ ချင်းပြည်နယ် ပြည်သူ့ကာကွယ်ရေးတပ်ဖွဲ့တို့ ဒီရက်ပိုင်းအတွင်းမှာ တိုက်ပွဲဆက်တိုက်ဖြစ်ပွားနေပြီး စစ်ကောင်စီဘက်က အနည်းဆုံးအယောက် ၂၀ သေဆုံးခဲ့တယ်လို့ သိရပါတယ်။
စစ်ကောင်စီတပ်ဟာ မကွေးတိုင်း၊ ဆောမြို့နယ် လောင်းရှည်ကျေးရွာဘက်ကနေ ကန်ပက်လက်မြို့နယ် ကျင်ဒွေးမြို့ ဘက်ကို စစ်အင်အား အလုံးအရင်နဲ့ စစ်ကြောင်းထိုးလာတာကြောင့် ဖေဖော်ဝါရီလ ၁၉ ရက်ကစပြီး ယမန့်နေ့ ဖေဖော်ဝါရီ လ ၂၂ ရက်နေ့အထိ ချင်းပြည်သူ့ကာကွယ်ရေးတပ်ဖွဲ့တွေနဲ့ နေ့စဉ်ရက်ဆက်တိုက်ပွဲဖြစ်ပွား ခဲ့ကြတာဖြစ်ပါ တယ်။
လောင်းရှည်ကျေးရွာဘက်ကနေ စစ်ကား ၁၆ စီးနဲ့ အင်အား ၃၀၀ နီးပါးလောက်ရှိတဲ့ စစ်ကောင်စီတပ်ဖွဲ့တွေဟာ ကျင်းဒွေး မြို့မှာ စစ်အင်အားဖြည့်တင်းဖို့တက်လာကြတာဖြစ်ပြီး CDF-Kanpetlet၊ CDF-Dai, Saw-PDF နဲ့ CNA ပူးပေါင်းတပ်ဖွဲ့တို့က ကြားဖြတ်တိုက်ခိုက်ခဲ့တာကြောင့် စစ်ကောင်စီဘက်က အနည်းဆုံးအယောက် ၂၀ လောက်သေဆုံးခဲ့တယ်လို့ CDF-Kanpetlet တပ်ဖွဲ့က တပ်မမှူးကပြောပါ တယ်။
“ကျင်ဒွေးကို သူတို့မရမကအရောက်သွားဖို့ ပြင်ဆင်ကြတယ် လမ်းတစ်လျှောက်လုံးမှာတိုက်ပွဲဖြစ်တာတော့ ၁၉ ရက်နေ့ ကတည်းကဖြစ်တာ မနေ့ကအထိပေါ့ ၁၉ ရက်နေ့မှာ မနက်ပိုင်းတစ်ခါ ညနေပိုင်းတစ်ခါပေါ့ မနက်ပိုင်းမှာ ၂ ယောက်ကျ တယ် ညနေပိုင်းမှာတော့ ၄ ယောက်ကျတယ် ၂၁ ရက်နေ့မှာ ကျနော်တို့တိုက်ပွဲထပ်ဖြစ်တယ် သူတို့ ၃၊ ၄ ယောက်တော့ ကျတယ် သူတို့အင်အားအလုံးအရင်းဆိုတော့ ကျနော်တို့က နောက်တဆင့်ပြန်ဆုတ်ပေးတယ် ၂၂ ရက်နေ့မနေ့ကတော့ တနေ့ကုန်နီးပါးတော်တော်လေးပြင်းထန်ခဲ့တယ် ၁၁ ယောက်ကတော့အနည်းဆုံးသေချာတယ် ဒဏ်ရာရတဲ့ဟာလည်း များနိုင်သေးတယ် ဒီနေ့ ၂၃ ရက်နေ့အထိတော့ သူတို့ကျင်ဒွေးကိုတော့မရောက်နိုင်သေးဘူး’’ လို႔ CDF-Kanpetlet တပ်ဖွဲ့က တပ်မမှူးကပြောပါ တယ်။
စစ်ကောင်စီတပ်ဖွဲ့နဲ့ ချင်းပြည်သူ့ကာကွယ်ရေးတပ်ဖွဲ့တွေဟာ လောင်းရှည်နဲ့ ကျင်ဒွေးမြို့အကြားမှာရှိတဲ့ ဆွဲလွဲကျင်၊ မောချောင်း၊ ရေရှောင်လမ်းမြက်ခင်းပြင် အနီးတွေမှာ ၃ ရက်အတွင်း တိုက်ပွဲအနည်းဆုံး ၄ ကြိမ်လောက်ဖြစ်ပွားခဲ့ကြ တာဖြစ်ပါတယ်။
အဲဒီတိုက်ပွဲတွေမှာ ပူးပေါင်းကာကွယ်ရေးတပ်ဖွဲ့ဘက်က လက်နက်နဲ့ကျည်ဆံမလုံလောက်မှုကြောင့် ဆုတ်ခွါစနစ်နဲ့ တိုက်ခိုက်ခဲ့ကြတာလို့ သူကဆက်ပြောပါတယ်။
“ကျနော်တို့မှာ လက်နက်အင်အား ရှိတဲ့ဟာလေးတောင်မှ ကျနော်တို့ကျည်စိတ်ကြိုက်လုပ်ဖို့မရှိဘူး ကျည်က အခက်အခဲဖြစ်တော့လေ ကျနော်တို့ဆုတ်ဆုတ်ပေးလိုက်ရတယ်” လို႔ တပ်မမှူးကပြောပါတယ်။
ယခုလက်ရှိမှတော့ လောင်းရှည်နဲ့ ကျင်းဒွေးမြို့အကြားမှာရှိတဲ့ ကျေးရွာ ၅ ရွာလောက်က ပြည်သူတွေဟာ ဘေးလွတ်ရာတောထဲကို တိမ်းရှောင်နေကြပြီး စစ်ကောင်စီဘက်က အထိနာနေတာကြောင့် မောချောင်းကျေးရွာမှ လူနေအိမ် ၄ လုံးကို မီးရှိုခဲ့သလို မဆာတွီကျေးရွာက နေအိမ်တွေကိုလည်းဖောက်ထွင်းတာတွေလုပ်ဆောင်နေတယ် လို့ သိရပါတယ်။
“လောင်းရှည်နဲ့ ကျင်ဒွေးအကြားပေါ့နော် ကြားထဲမှာရှိတဲ့ရွာတွေက အားလုံးစစ်ဘေးရှောင်ရတယ် ဘယ်ရွာတွေကတော့ ဘယ်နေ့ရောက်နိုင်မယ်ခန့်မှန်းပေးတယ် ရွာမရောက်ခင်မှာသူတို့အားလုံးကိုရှောင်ခိုင်းတယ် သူတို့ကျော်သွားရင် ရွာကိုပြန် ဝင်ခိုင်းတယ် ဒါပေမယ့်တိုက်ပွဲကပြင်းထန်တော့ ပြည်သူတွေကပြန်မဝင်ရဲဘူး စစ်ဘေးရှောင်အရည်တွက်ကနည်းနည်းများ သွားတယ်သူတို့အထိနာတော့ မောချောင်းရွာကပြည်သူအိမ် ၄ လုံးမီးရှို့တယ် မောချောင်းရွာဝန်းကျင်မှာသူတို့ အထိနာ တော့လေ’’ CDF-Kanpetlet တပ်မမှူးက ပြောပါတယ်။
လောင်းရှည် နဲ့ ကျင်ဒွေးမြို့ဟာ ၂၃ မိုင်ကျော်ကျော်လောက်ကွာဝေးပေမယ့် ချင်းပြည်သူ့ကာကွယ်ရေးတပ်ဖွဲ့တွေရဲ့ တိုက်ခိုက်မှုတွေကြောင့် စစ်ကောင်စီတပ်တွေဟာ ယနေ့ထိ ကျင်ဒွေးမြို့ကိုမရောက်နိုင်ကြသေးဘူးလို့ သိရပါတယ်။
