(002MG)
စစ်ကိုင်းတိုင်း၊ ကလေးမြို့နယ်တောင်ပိုင်းဖက်က စစ်ဘေးရှောင်ပြည်သူများသည် လက်ရှိတွင် သောက်သုံးရေသန့်နှင့် ဆေး၀◌ါးအကူအညီများ လိုအပ်နေပြီး စစ်ရှောင်ပြည်သူများကြားတွင် ဝမ်းပျက်ဝမ်းလျှောများလည်းဖြစ်ပွားနေသည်ဟု စစ်ဘေးရှောင်များကို ကူညီပေးနေသူထံမှ သိရသည်။
ကလေးတောင်ပိုင်းဖက် စစ်ဘေးရှောင်များကိုကူညီပေးနေသူတဦးက “သူတို့ကအခုလောလောဆယ်ဒုက္ခရောက်တာက စားနပ် ရိက္ခာကထားပါအုံး တကိုယ်ရေသန့်ရှင်းရေးအတွက် ရေလိုတယ်။ရာသီအကူးဆိုတော့ တွင်းရေတွေက ခမ်းတယ်၊ လူအများ နဲ့ဆိုတော့ အိမ်သာ၊ ရေချိုးသုံးဖို့ရေကတော်တော်လေးအဆင်မပြေ ဖြစ်နေတာ။ ထင်း ရယ် ပြီးတော့ ကျန်းမာ ရေးပိုင်း အများနဲ့ဆိုတော့ ဝမ်းလျောဝမ်းပျက်တို့ ရာသီ အကူးအပြောင်းကာလဆိုတော့ ကလေးငယ်တွေ၊လူကြီးမှအစ ချောင်းဆိုး၊နှာစီးတာတွေ တော်တော်လေးခံ စားကြရတယ်” ဟု ပြောသည်။
ကလေးမြို့တောင်ပိုင်းဒေသ ထိုမာ၊ သာယာကုန်းကျေးရွာဖက်တွင် မတ်လဆန်းပိုင်းကစပြီး စစ်ကောင်စီတပ်ဖွဲနှင့် ပြည်သူ့ ကာကွယ်ရေးပူးပေါင်းတပ်ဖွဲ့တို့ တိုက်ပွဲပြင်း ထန်ဖြစ်ပွားနေချိန်တွင် ဟားခါးလေးကျေးရွာသို့ အိုးအိမ်စွန့်ခွါ စစ်ဘေးတိမ်းရှောင်ခိုလုံခဲ့ကြရသည်။ လူဦးရေ (၃,၀၀၀) နီးပါးရှိ သည်ဟု သိရသည်။
အဆိုပါစစ်ဘေးရှောင်များမှာ ထိုမာ၊ သာယာကုန်း၊ ကြာအင်း၊ တွန်းချောင်း၊ အောင်သာယာ ကြံသာ၊ ရှားဖိုစသည့် ကျေးရွာတို့ကဖြစ်ကြပြီး လူဦးရေအနည်းဆုံး ၃၀၀၀ ခန့်ရှိကာ ရေးအဆောက်အအုံ ၊ စာသင်ကျောင်းတို့တွင် ခိုလုံနေကြသည်ဟု စစ်ဘေးရှောင်ကူညီနေထံမှ သိရသည်။
စစ်ကောင်စီတပ်ဖွဲ့သည် ကလေးမြို့နယ်ထဲက ထိုမာကျေးရွာ၊ သာယာကုန်းကျေးရွာ၊ ထောက်ကြန့်ကျေးရွာ၊ မြောင်း စုံကျေးရွာ၊ စက္ကန့်ကျေးရွာ၊ စီးစံကျေးရွာ၊ သုံးအိမ်စု၊ လေးအိမ်စု ကျေးရွာဖက်တို့ နေ့စဉ်လက်နက်ကြီး များဖြင့် ပစ်ခတ် နေသောကြောင့် လူနေအိမ်များထိခိုက်ပျက်စီးခြင်း၊ အရပ်သားပြည်သူများထိခိုက်သေဆုံး ဒဏ်ရာရသူ များရှိသည်ဟု သိရသည်။
ထို့အပြင် မတ်လ (၉) ရက်နေ့ကလည်း ထိုမာကျေးရွာဖက်သို့ Mi-35 စစ်ရဟတ်ယာဉ်ဖြင့် လေကြောင်းမှ ဗုံကြဲတိုက်ခိုက် ခြင်းများပြုလုပ်ခဲ့ပြီး ထိုမာကျေးရွာက လူနေအိမ် (၂၀) နီးပါးမီးလောင်ပျက်စီးခဲ့သည်ဟု သိရသည်။
ကလေးမြို့နယ်တွင် စစ်ကောင်စီတပ်ဖွဲ့နှင့် ပြည်သူ့ကာကွယ်ရေးပူးပေါင်းတပ်ဖွဲ့များသည် ဖေဖော်ဝါရီလ (၂၁) ရက်နေ့ ကစပြီး တိုက်ပွဲပြင်းထန်ဖြစ်ပွားကာ ယနေ့ချိန်ထိ စစ်ရေးအခြေအနေတင်းမာနေဆဲဖြစ်သည်။