(006SV)
ချင်း – စစ်ကိုင်းအစပ်ရှိ ကလေးမြို့နယ်တောင်ပိုင်းက စစ်ကော်မရှင်တပ်များကို ချင်းလဲန်းကောင်စီ (CC) ၊ ချင်းပြည်အစိုးရ၊ ကာကွယ်ရေး ဝန်ကြီးဌာနက ဦးဆောင်ပြုလုပ်နေသော စစ်ဆင်ရေးတိုက်ပွဲများတွင် ABSDF အမှတ် – ၃ စစ်ကြောင်း က ရဲဘော် ၃ ဦးကျဆုံးပြီး ၁၀ ဦးထိခိုက်ဒဏ်ရာ ရရှိကြောင်း သိရသည်။
နိုဝင်ဘာလ ၆ ရက်မှ စတင်၍ စစ်ကိုင်းတိုင်း၊ ကလေးမြို့နယ်တောင်ပိုင်းတွင် ချင်းလဲန်းကောင်စီ ဦးဆောင်ပြုလုပ်သော စစ်ဆင်ရေးတွင် မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ကျောင်းသားတပ်မတော်) (ABSDF) အမှတ် ၃ စစ်ကြောင်းသည် မဟာမိတ်များနှင့် ပူးပေါင်း၍ စစ်ကောင်စီတပ်များကို တိုက်ခိုက်သည်ဟု ABSDF အမှတ် ၃ စစ်ကြောင်းထံမှ သိရသည်။
“ချင်းလဲန်းကောင်စီ၊ ကာကွယ်ရေးဌာန စစ်ကြောင်း ၁ ကနေ ဦးစီးတဲ့ ကလေးနယ်တောင်ပိုင်းက မှန်တော၊ ကြံသာ၊ ကမ်းပါးနီ၊ အောင်မင်္ဂလာ၊ ဟံသာဝတီပေါ့၊၊ အဲဒီဘက်မှာ ရှိတဲ့ တိုက်ပွဲတွေမှာ ကျနော်တို့ ရဲဘော်တွေ ကျဆုံးခဲ့တာဖြစ်ပါတယ်။ အများစုက တိုက်ပွဲတွင်းမှာ ထိခိုက်ကျဆုံးလာကြတာဖြစ်ပါတယ်။ တိုက်ပွဲကတော့ ဒီနိုဝင်ဘာလ ၆ ရက်နေ လကုန်အထိ တိုက်ပွဲတွေ ဖြစ်နေပါတယ်။ မကြာခဏ လက်ရှိအချိန်အထိ တိုက်ပွဲတွေက ဆက်ဖြစ်နေဆဲဖြစ်ပါတယ်” ဟု ABSDF စစ်ကြောင်း ၃ ပြောရေးဆိုခွင့်ရှိသူက ပြောသည်။
တိုက်ပွဲများတွင် ABSDF အမှတ် ၃ စစ်ကြောင်း၊ အမှတ် ၁၂ တပ်ရင်းရှိ တပ်စုမှူးဖြစ်သည့် ရဲဘော် စိန်မြင့်လွင်(ခ) ဖိုးလွင် ၊ ရဲဘော်ဇော်ဇော်ဦး(ခ) မှိုင်းမှိုင်း ၊ ရဲဘော်နိုင်လင်းစိုး (ခ) ညှပ်စိ တို့သည် ဖယ်ဒရယ် ဒီမိုကရေစီ တော်လှန်ရေးအတွင်း ကျဆုံးသွားသည်ဟု သိရသည်။
၎င်းတို့သည် ကျောင်းသားတပ်မတော်မှ ပေးအပ်သော တာဝန်များကို ကျေပွန်စွာ ထမ်းဆောင်ပြီး ရဲစွမ်းသတ္တိနှင့် စွန့်လွှတ်စွန့်စားမှုများကို ကျောင်းသားတပ်မတော်၊ အမှတ် ၃ စစ်ကြောင်း ဂုဏ်ပြုမှတ်တမ်းတင်အပ်သည်ဟု ထုတ်ပြန်သည်။
အဆိုပါရဲဘော်တို့ မြင့်မြတ်စွာ ကျဆုံးမှုအပေါ် မိသားစုများနှင့်ထပ်တူ ဝမ်းနည်းကြေကွဲရပြီး တော်လှန်ရေး တာဝန်များကို ဆက်လက်ထမ်းဆောင်ရင်း အာဏာရှင်စနစ် ပြုတ်ကျသည်အထိ ဆက်လက်တိုက်ပွဲဝင်သွားမည်ဟု ကတိပြုကြောင်း ABSDF က ထုတ်ပြန်သည်။
ကလေးမြို့နှင့် ဂန့်ဂေါမြို့အကြားက တိုက်ပွဲများတွင် စစ်ကော်မရှင်တပ်သည် လေကြောင်းနှင့် လက်နက်ကြီး ပစ်ကူများကို အဓိက အသုံးပြု၍ တိုက်ခိုက်နေကြောင်း သိရသည်။
ချင်းပြည်နယ်မြောက်ပိုင်းဒေသ နှင့် ကလေး-ဂန့်ဂေါဒေသများတွင် စစ်ကော်မရှင်တပ်နှင့် တော်လှန်ရေး ပူးပေါင်း တပ်တို့ တိုက်ပွဲများ တစ်လနီးပါး ဆက်လက်ပြင်းထန်နေရာ စစ်ကော်မရှင်တပ်မှ ဗိုလ်မှူးအပါအဝင် တပ်ဖွဲ့ဝင် ၁၅၀ ထက်မနည်း သေဆုံးပြီး စစ်သုံ့ပန်းများကိုလည်း ဖမ်းဆီးရမိထားသည်ဟု ချင်းပြည်အစိုးရ၊ ကာကွယ်ရေးဝန်ကြီးဌာနက နိုဝင်ဘာလအတွင်း ထုတ်ပြန်ထားသည်။
ကလေးမြို့ နှင့် ဂန့်ဂေါမြို့အကြားတွင် ချင်းပြည်အစိုးရ၊ ကာကွယ်ရေးဌာန၏ စစ်ကြောင်း ၁ သည် Vakok PDF ၊ ကျောင်းသားတပ်မတော် (ABSDF) ၊ PDF ခရိုင်တပ်ရင်းများ၊ ပကဖများ၊ Kalay Revolution Force (KRF)၊ Ranger Kalay Defense Force (RKDF)၊ Yaw Defense Force (YDF) စသည့် မဟာမိတ်အဖွဲ့များနှင့် ပူးပေါင်း တိုက်ခိုက်နေသည်ဟု သိရသည်။
