(006SV)
ကန်ပက်လက်မြို့နယ်က ခေါ်နူမ်းစုမ်အမျိုးသားဥယျာဉ်အပါအဝင် ထိန်းသိမ်းရေးတောများမှ သစ်တောထွက်ပစ္စည်းများ ရှာဖွေစုဆောင်ခြင်းနှင့် ရောင်းဝယ်ခြင်းများကို တားမြစ်ကန့်သတ်လိုက်ပြီးတွေ့ရှိပါက အရေးယူသွားမည်ဟု ကန်ပက် လက်မြို့နယ် ပြည်သူ့အုပ်ချုပ်ရေးအဖွဲ့က ထုတ်ပြန်သည်။
“သစ်ခွပန်းတွေနဲ့ ပတ်သက်ပြီး ဒီလိုနယ်မြေကျူးကျော်ပြီး ရှာဖွေတာတို့ သစ်ခွပန်းတွေ ရှာဖွေချိန်မှာ သစ်ပင်ခုတ်တာတွေက အရမ်းများတော့ ကျနော်တို့ ထိန်းသိမ်းဖို့က ထုတ်ပြန်တာဖြစ်ပါတယ်” ဟု ပြည်သူအုပ်ချုပ်ရေးအဖွဲ့ အတွင်းရေးမှူး ဦးနိုင်ချွဲက ပြောသည်။
ချင်းပြည်နယ်၊ ကန်ပက်လက်မြို့နယ်ထဲက ထိန်းသိမ်းရေးတောများတွင် စည်းကမ်းမဲ့ သစ်ပင်များခုတ်လဲခြင်း၊ နယ်မြေကျူး ကျော်ပြီး သစ်တောထွက်ပစ္စည်းအမျိုးမျိုးကို တရားမဝင် ရှာဖွေစုဆောင်းခြင်းနှင့် ရောင်းဝယ် ဖောက်ကား ခြင်းများ ပိုများ လာသည်ဟု သိရသည်။
ထို့ကြောင့် သစ်ခွပန်းအမျိုးမျိုးနှင့် ချိတ်များ အပါအဝင် သစ်တောထွက်ပစ္စည်းများကို တားမြစ်ပိတ်ပင်လိုက် ခြင်းဖြစ်ပြီး တားမြစ်ချက်အား ချိုးဖောက်သူများကို အရေးယူဆောင်ရွက်သွားမည်ဖြစ်သောကြောင့် အများပြည်သူများ ကြိုတင်သိရှိစေရန် အောက်တိုဘာလ ၂၁ရက်မှာ ကြိုတင်ထုတ်ပြန်လိုက်ခြင်းဖြစ်သည်ဟု အုပ်ချုပ်ရေးအဖွဲ့မှ တာဝန်ရှိသူက ပြောသည်။
“စစ်ဆေးရေးဂိတ်တွေ ဖမ်းမိရင်တော့ သိမ်းဆည်းမှာပဲ။ သိမ်းဆည်းပြီးတော့မှ ကျနော်တို့ အရေးယူတဲ့အပိုင်းမှာတော့ တားမြစ်ချိုးဖောက်မှုက အခုတော့ မရှိသေးဘူး။ ထိုက်သင့်တဲ့ အရေးယူမှုတွေကို လုပ်သွားမယ်” ဟု အတွင်းရေးမှူး ဦးနိုင်ချွဲက ပြောသည်။
ခေါ်နူးစုမ်အမျိုးသားဥယျာဉ်အပါအဝင် ထိန်းသိမ်းရေးတောများမှ သစ်တောထွက်ပစ္စည်းများကို နီးစပ်ရာ ကျေးရွာများနှင့် မြို့နယ်များမှ ပြည်သူများက ကျူးကျော်ပြီး ရှာဖွေမှုများ ပြုလုပ်လေ့ရှိသည်ဟု သိရသည်။
အရေးယူမှု ဆောင်ရွက်မည့် ဆုံးဖြတ်ချက်များကို မြို့နယ်လုံးဆိုင်ရာ စုံညီအစည်းအဝေးများတွင် ချမှတ်ပြီးဖြစ်သကဲ့သို့ သက်ဆိုင်ရာဒေသ/ နယ်မြေအလိုက် ပြည်သူ့အုပ်ချုပ်ရေးအဖွဲ့များကိုလည်း ညွှန်ကြားချက်များ ပေးပို့အကြောင်းကြား ထားသည်ဟု သိရသည်။
ကန်ပက်လက်မြို့နယ်အတွင်းက ထိန်းသိမ်းရေးတောများတွင် ရှားပါးသစ်ပင်ပန်းမန်များ ပေါက်ရောက်လျှက်ရှိပြီး သဘာဝက ပေးသော အဖိုးတန်အမွေအနှစ်များအဖြစ် အစဉ်အဆက်ထိန်းသိမ်းလာခဲ့ကြသည်။
ခေါ်နူးစုမ်အမျိုးသားဥယျာဉ်သည် ၂၀၁၂ ခုနှစ်တွင် အာဆီယံ အမွေအနှစ်ဥယျာဉ်အဖြစ် သတ်မှတ်ခံထားရသည်။
Photo crd
