(003PT)
ချင်းပြည်နယ် ဖလမ်းမြို့နယ် စီဇာမွာလ်ကျေးရွာက အသက် ၁၀၀ ကျော်အရွယ်ရှိပြီဖြစ်သော အဖွားအိုသည် စစ်ကောင်စီတပ်ဖွဲ့၏ လက်နက်ကြီးပစ်ခတ်မှုကြောင့် ယနေ့မနက်ပိုင်းက သေဆုံးခဲ့သည်ဟု သိရသည်။
ဖလမ်းမြို့ပေါ်အခြေစိုက် စစ်ကောင်စီတပ် ခလရ ၂၆၈ တပ်ကုန်းမှ ယနေ့မနက်ပိုင်း ၂ နာရီ၀န်းကျင်ခန့်က တိုက်ပွဲဖြစ်ပွားခြင်းမရှိပဲ လက်နက်ကြီးပစ်ခတ်မှုကြောင့် ဖလမ်းမြို့အနီးရှိ စီဇာမွာလ်ကျေးရွာအတွင်း ကျရောက်ပေါက်ကွဲခဲ့ခြင်းဖြစ်သည်ဟု ဒေသခံတစ်ဦးကပြောသည်။
“ဒီမနက် ၂ နာရီဝန်းကျင်မှာ သူတို့လက်နက်ကြီးကျပြီးတော့ အဖွားအိုတစ်ယောက် သေသွားတယ်ပေါ့နော်။ ပြီးတော့ သူ့သူမီးတစ်ယောက်ကလည်း ဒဏ်ရာရတယ်၊ အခု ဖလမ်းပြည်သူ့ဆေးရုံမှာ” ဟု ဒေသခံတစ်ဦးက ပြောသည်။
လက်နက်ကြီးထိခိုက်မှုကြောင့် သေဆုံးသူမှာ အသက် ၁၀၅ နှစ်အရွယ်ရှိ Pi Ram Tlung ဖြစ်ပြီး သူမီးဖြစ်သူ အသက် ၆၄ အရွယ်ရှိ Pi Zo Htwe မှာလည်း ထိခိုက်ဒဏ်ရာရရှိတာကြောင့် ဖလမ်းမြို့ ပြည်သူ့ဆေးရုံတွင် အရေးပေါ် ဆေးကုသမှုခံယူနေကြောင်း သိရသည်။
စီဇာမွာလ် ကျေးရွာသည် ဖလမ်းမြို့အောက်ဘက် ၂ မိုင်ခန့်အကွာတွင်တည်ရှိပြီး ဖလမ်း-ကလေး လမ်းမကြီးအနီးရှိ ရွာတစ်ရွာဖြစ်သည်။
Photo crd- Rihli Voice
