စစ်ကိုင်းတိုင်းဒေသကြီး ကလေးမြို့မှ ချင်းပြည်နယ်မြောက်ပိုင်း အိန္ဒိယ-မြန်မာနယ်စပ်ကုန်သွယ်ရေးစခန်းတည်ရှိရာ ရိခေါဒါရ်မြို့သို့ ပြေးဆွဲနေသည့် မော်တော်ယာဉ်လိုင်းများကို ရဲနှင့် စစ်သားများက ငွေကြေးအဆမတန် ကောက်ခံနေသည့်အတွက် ကားသမားများ အခက်ကြုံနေရသည်ဟု သိရသည်။
ကလေးမြို့မှ ချင်းတောင်တက်သည့် ကလေး-ခိုင်ကမ်း-တီးတိန်-ရိ ကားလမ်းတစ်လျှောက်ရှိ လုံခြုံရေးနှင့် စစ်ဆေးရေးဂိတ်များတွင် ရဲနှင့် စစ်သားများကို ကားတစ်စီးလျှင် အနည်းဆုံး ကျပ်ငွေ ၅၀၀၀ ပေးဆောင်ရပြီး ရိခေါဒါရ်မြို့အထိ စုစုပေါင်း ကျပ်ငွေ ၃၀၀၀၀ ကျော်ခန့် ပေးဆောင်နေရသည်ဟု အမည်မဖော်လိုသည့် ကားသမားတစ်ဦးက ပြောသည်။
“ကျနော်တို့အရင်တစ်ခါလိုပေးတာထက် နည်းနည်းများသွားပြီ အခုလည်း ၅၀၀၀ ပဲကောက်တော့တာ ရိ ထိသွားမယ်ဆိုရင် ၅၀၀၀ ပေးပေးနေရင်း ၃၀၀၀၀ ကျော်လောက်ကျသွားတယ် ခိုင်ကမ်းဂိတ်ဆိုရင် လက်မှတ်ထိုးပြီး ပိုက်ဆံထည့်တာ တောင်သူတို့ရဲတွေက ဘယ်လောက်ထည့်လဲမေးတယ် ၁ ထောင်ထည့်တယ်ပြောရင် ၄ ထောင်ထပ်ထည့် မရဘူးဆိုပြီး အတင်းကိုထည့်ခိုင်းနေတာ သူတို့ပြောတာတော့ ငါတို့ကိုနောက်တစ်ခါပြန်လာပစ်ရင် နောက်ထပ် ၅၀၀၀ ထပ်တိုး ကောက်မယ်လို့ ကျနော်တို့ ကားသမားတွေဆီပြောတာ အဆင်မပြေဘူး ပေးရတာများလို့ကားသမားတွေအတွက်” ဟု ကလေး-ရိယာဉ်လိုင်းပြေးဆွဲနေသည့် ကားဆရာတစ်ဦးက ပြောသည်။
ယခင် စက်တင်ဘာလက ခိုင်ကမ်း (၉) မိုင် ယာဉ်အသွားအလာစစ်ဆေးရေးဂိတ်နှင့် ရဲစခန်းကို PDF-Zoland၊ CDF-KKG၊ ပူးပေါင်းတပ်ဖွဲ့က ဝင်ရောက်တိုက်ခိုက်ခဲ့ပြီးရဲဝန်ထမ်း (၅) ဦးသေဆုံးမှုရှိခဲ့ပြီးနောက် လုံခြုံရေးတင်းကြပ်မှုရှိလာသည့်အပြင် ကလေး-တီးတိန်-ရိ လမ်းတစ်လျှောက်တွင်လည်း စစ်ကောင်စီတပ်သားများ စခန်းချတပ်စွဲမှုများရှိလာခဲ့သည်။
ယခုကဲ့သို့ လမ်းခရီးတစ်လျှောက်တွင် ရဲနှင့်စစ်သားများအား ငွေကြေးပေးဆောင်နေရသည့်အတွက် ကလေး-ရိအကြား ကားခမှာလည်း ယခင်က လူတစ်ဦးလျှင်ကျပ်ငွေ ၁၅၀၀၀ ခွဲခန့်ရှိရာမှ ၅၀၀၀၀ ခန့်အထိမြင့်တက်သွားပြီး ခရီးသွားပြည်သူ များလည်း အခက်အခဲဖြစ်နေကြသည်ဟု သိရသည်။
“လမ်းမှာ ရဲနဲ့ စစ်သားကို ပိုက်ဆံပေးရတာအရမ်းများတော့ ကုန်ပစ္စည်းသယ်ယူခနဲ့ ကားခတွေက မတက်လို့မရဘူးလေ” ဟု အမည်မဖော်လိုသည့် ကားဂိတ်မှူးတစ်ဦးကပြောသည်။
ကလေး-ရိခေါဒါရ်မြို့အကြား နေ့စဉ်ပြေးဆွဲနေသည့် မော်တော်ယာဉ်လိုင်း လူစီးကားနှင့် ကုန်တင်ကား အစီး ၂၀ ခန့်ရှိပြီး ယခုရက်ပိုင်းအတွင်း လုံခြုံရေးအခြေအနေကြောင့် ပြေးဆွဲမှု ရပ်နားထားသူများလည်းရှိသည်ဟု သိရသည်။
