ချင်းပြည်နယ် ဖလမ်းမြို့နယ် နှင့် စစ်ကိုင်းတိုင်းကလေးမြို့နယ်တို့တွင် စစ်ကောင်စီတပ်ဖွဲ့နှင့် ၃ လအတွင်း တိုက်ပွဲပေါင်း ၁၂ ကြိမ်ဖြစ်ပွားပြီး စစ်ကောင်စီဘက်က ၃၇ ဦး သေဆုံးခဲ့သည်ဟု ချင်းအမျိုးသားအဖွဲ့ချုပ် (CNO/CNDF) ကထုတ်ပြန်သည်။
CNO/CNDF တပ်ဖွဲ့နှင့် စစ်ကောင်စီတပ်ဖွဲ့တို့သည် ပြီးခဲ့သည့် စက်တင်ဘာလမှ နိုဝင်ဘာလအထိ ၃ လအတွင်း ဖလမ်းမြို့နယ် သီဘွာလ်ကျေးရွာတွင် တိုက်ပွဲ ၉ ကြိမ်၊ သူဖေကျေးရွာတွင် တစ်ကြိမ်နှင့် ကလေးမြို့တွင် ၂ ကြိမ် စုစုပေါင်း ၁၂ ကြိမ် ဖြစ်ပွားခဲ့ကြသည်။
ထိုတိုက်ပွဲများတွင် စစ်ကောင်စီဘက်က ၃၇ ဦးသေဆုံးခဲ့ပြီး CNO/CNDF ဘက်မှ အကျအဆုံးမရှိခဲ့ပဲ ထိခိုက်ဒဏ်ရာရရှိသူ ၅ ဦးရှိခဲ့သည်ဟု သိရသည်။
စစ်ကောင်စီတပ်ဖွဲ့သည် သီဘွာလ်ကျေးရွာတိုက်ပွဲတွင် နိုဝင်ဘာလ (၁၅) ရက် နေ့မှစ၍ နိုဝင်ဘာ (၂၃) ရက်နေ့အထိ လေကြောင်းအသုံးပြုပြီး သာလွန်အင်အားဖြင့် အပြင်းအထန် တိုက်ခိုက်ခဲ့သည်ဟု သိရသည်။
စစ်ကောင်စီတပ်ဖွဲ့က ပစ်ခတ်သောအမျိုးအမည်မသိ မီးကျဉ်ပုံစံလက်နက်ကြီးကြောင့် သီဘွာလ်ကျေးရွာရှိ နေအိမ်သုံးလုံးမီးလောင်ကျွမ်းခဲ့ပြီး ဘွာလ်သဲကျေးရွာမှ စိတ်မနှံ့သူ အမျိုးသားတစ်ဦးအား သတ်ဖြတ်ကာ စိတ်မနှံ့သူ အမျိုးသမီးတစ်ဦးအား ဖမ်းဆီးခေါ်ဆောင်သွားသည်ဟု CNO ၏ ထုတ်ပြန်ချက်တွင် ဖော်ပြထားသည်။
