(006SV)
ချင်းပြည်နယ် ပလက်ဝမြို့နယ်၊ သူဌေးကုန်းကျေးရွာအနီးကို စစ်တပ်က Y – 12 နှင့် ဂျက်ဖိုက်တာအုပ်စုဖြင့် ပေါင် ၅၀၀ နှင့် ၃၀၀ ဗုံး အပါအဝင် ဗုံးမျိုးစုံ အသုံးပြု၍ လေကြောင်းတိုက်ခိုက်ခဲ့ရာ ကလေးငယ်နှင့် ကိုယ်ဝန်ဆောင် အမျိုးသမီး အပါအဝင် လူ ၁၂ ဦးအထိ အစုအပြုံလိုက် သေဆုံးကြောင်း သိရသည်။
ချင်းပြည်နယ်တောင်ပိုင်း၊ ပလက်ဝမြို့နယ်၊ သူဌေးကုန်းကျေးရွာအနီး ဝန်းကျင်ကို အာဏာသိမ်းစစ်တပ်က နိုဝင်ဘာလ ၁၄ ရက်တွင် ည ၇ နာရီ ၅၇ မိနစ်မှ ၉ နာရီ ၁၅ မိနစ်အထိ ဂျက်ဖိုက်တာ ၄ စီး၊ Y – 12 ၁ စီးတို့ဖြင့် တစ်နာရီကျော်ကြာ ပေါင် ၅၀၀၊ ၃၀၀ နှင့် ၂၀၀ ဗုံးများ၊ Rocket နှင့် Drop Bomb များအပါအဝင် ဗုံးအလုံးရေး ၅၀ နီးပါးခန့် မရပ်မနား ကြဲချတိုက်ခိုက် ခြင်းဖြစ်သည်။
အဆိုပါလေကြောင်းတိုက်ခိုက်မှုအတွင်း ခေတ္တစစ်ဘေးရှောင် အရပ်သားပြည်သူ ၃ နှစ်အရွယ် ကလေးငယ် ၁ ဦး၊ ကိုယ်ဝန် ၅ လရှိ အမျိုးသမီး ၁ ဦးနှင့် နောက်ထပ် ကျား ၆ ဦး ၊ မ ၄ ဦး စုစုပေါင်း ၁၂ ဦး အစုအပြုံလိုက် သေဆုံးရကြောင်း အာရက္ခတပ်တော် (ULA/AA) က ယမန်နေ့ နိုဝင်ဘာလ ၁၇ ရက်မှာ ထုတ်ပြန်သည်။
ထိခိုက်ဒဏ်ရာ ရရှိသူ ကျား ၁၁ ဦးနှင့် မ ၁၀ ဦး ၊ စုစုပေါင်း ၂၁ ဦးအထိ ရှိခဲ့ပြီး ၎င်းတို့မှာ အသေးစား၊ အလတ်စား၊ အကြီးစား စသည့် ထိခိုက်ဒဏ်ရာများ ရရှိထားကြောင်း၊ နေအိမ်အဆောက်အဦး အများအပြားလည်း ထိခိုက်ပျက်စီးမှု ရှိကြောင်း သိရသည်။
ပလက်ဝမြို့နယ်၊ သူဌေးကုန်းရွာသည် ပလက်ဝ- ကျောက်တော်ကားလမ်းမဘေးတွင် တည်ရှိပြီး စိမ်းစင်းကျေးရွာ၏ အနီးတွင် လည်း တည်ရှိသော ရွာဖြစ်ကြောင်း၊ ၎င်းတို့ကျေးရွာအနီးတွင် အာရက္ခတပ်တော် ULA/ AA ၏ စစ်သင်တန်းကျောင်း ရှိကြောင်း ဒေသခံသတင်းရင်းမြစ်များက ပြောသည်။
နိုဝင်ဘာလ ၁၄ ရက်က သူဌေးကုန်းရွာအနီး လေကြောင်းတိုက်ခိုက်မှုသည် ULA/ AA ၏ စစ်သင်တန်းကျောင်းကို တိုက်လေယာဉ် အုပ်စုလိုက် အသုံးပြု တိုက်ခိုက်ခြင်းဖြစ်ပြီး ထိခိုက်ကျဆုံးမှု များပြားသည်ဟု ဒေသခံသတင်း ရင်းမြစ်တချို့က ပြောသော်လည်း၊ ULA/ AA စစ်သင်တန်းကျောင်းနှင့်ပတ်သက်၍ သီးခြားအတည်ပြုနိုင်ခြင်း မရှိပါ။
အာာဏာသိမ်းစစ်တပ်သည် ULA/ AA ထိန်းချုပ်ထားသော ပလက်ဝဒေသအပါအဝင် ရခိုင်ပြည်နယ်ထဲက မြို့နယ်များတွင် စစ်ဘေးရှောင်စခန်းများ၊ စာသင်ကျောင်း၊ ဆေးရုံး၊ ဆေးခန်း၊ ဘာသာရေးအဆောက်အအုံ၊ ဈေးနှင့် လူနေအိမ်များ၊ လမ်းတံတားနှင့် မြို့ရွာများကို လေကြောင်းတိုက်ခိုက်မှု နေစဉ် ပြုလုပ်နေကြောင်း သိရသည်။
နိုဝင်ဘာလ ၁ ရက်မှ ၁၆ ရက်အတွင်း အာရက္ခတပ်တော် ULA/ AA ထိန်းချုပ်ဒေသများတွင် စစ်တပ်က လေကြောင်းတိုက်ခိုက်မှု ၁၂ ကြိမ်ထက်မနည်း ပြုလုပ်ခဲ့ရာ ကလေးငယ်နှင့် သက်ကြီးရွယ်အိုအပါအဝင် ပြည်သူ ၁၀၆ ဦးထက်မနည်း သေဆုံး၊ ထိခိုက်ဒဏ် ရာများ ရရှိကြောင်း သိရသည်။

