(006SV)
စစ်ကော်မရှင်က ပြုလုပ်မည့် ရွေးကောက်ပွဲကို နိုင်ငံရေးအရ လုံးဝ လက်ခံမည် မဟုတ်သည့်အပြင် နိုင်ငံတကာ ကလည်း အသိအမှတ်ပြု၊ ပူးပေါင်းဆောင်ရွက်ခြင်း မပြုလုပ်ရန် တိုင်းရင်းသားလူမျိုးများ ကောင်စီ (MEC) နှင့် ဖက်ဒရယ်ယူနစ်အဖွဲ့အစည်းမျာက ကြေညာသည်။
“ဒီရွေးကောက်ပွဲက ကျနော်တို့ မြန်မာနိုင်ငံရဲ့ နိုင်ငံရေးပြသနာတွေ ဖြေရှင်းနိုင်တဲ့ ရွေးကောက်ပွဲ မဟုတ်ဘူး။ အတုအယောင်နဲ့ တရားမဝင် ရွေးကောက်ပွဲသာဖြစ်တယ်။ ဒီရွေးကောက်ပွဲက စစ်အာဏာရှင် သက်ဆိုးရှည်ဖို့နဲ့ ပြည်သူလူထုရဲ့ ဒုက္ခ ပိုရှည်ကြာဖို့ပဲ ဖြစ်တယ်။ အဲဒီအတွက် ကျနော်တို့က လက်ခံမှာ မဟုတ်ဘူး။ ထွက်ပေါ်လာတဲ့ ဘာရလဒ်ပဲ ဖြစ်ဖြစ် လက်မခံဘူး။ ကျနော်တို့ တော်လှန်ရေးက ရှိနေမှာပါပဲ။ ကျနော်တို့က ပြည်တွင်းပြည်ပကို တွန်းအားပေးသွားမယ်။ ဒီရွေးကောက်ပွဲကို အသိအမှတ်မပြုဖို့ လက်မခံဖို့ လက်ရှိ အခြေအနေတွေနဲ့ တင်ပြသွားဖို့ ရှိပါတယ်” ဟု အဆိုပါထုတ်ပြန်ချက်နှင့်ပတ်သက်၍ ပြောရေးဆိုခွင့်ရှိသူ (KNPP)မှ ဦးအောင်ဆန်းမြင့်က ပြောသည်။
ဖက်ဒရယ် ဒီမိုကရေစီ ပြည်ထောင်စု တည်ဆောက်ရေးအတွက် ပြည်သူ့ ဆန္ဒနှင့်အညီ လက်ရှိတော်လှန်ရေး အင်အားစုများ အကောင်အထည်ဖော်နေသည့် ပြည်နယ်အားကောင်းရေးမှ ပြည်ထောင်စု အားကောင်းရေး ချဉ်းကပ်မှုအခြေခံဖြင့် ဖက်ဒရယ် တည်ဆောက်ရေး လုပ်ငန်းစဉ်ကို နိုင်ငံတကာမှ အသိအမှတ်ပြု ထောက်ခံရန် တောင်းဆိုထားသည်။
စစ်တပ်၏ ရွေးကောက်ပွဲအပေါ် တိုင်းရင်းသား လူမျိုးများကောင်စီ နှင့် ဖက်ဒရယ်ယူနစ်အဖွဲ့အစည်းများက စက်တင်ဘာလ ၂၁ ရက်မှာ ထုတ်ပြန်ချက်ထုတ်၍ တောင်းဆိုခြင်းဖြစ်သည်။
ကရင်နီအမျိုးသားတိုးတက်ရေးပါတီ (KNPP) ၊ ကရင်အမျိုးသားအစည်းအရုံး (KNU)၊ ချင်းအမျိုးသားတပ်ဦး (CNF)၊ မွန်ပြည်သစ်ပါတီ (NMSP – AD) ၊ တအာင်းပြည်ကောင်စီ (TLC)၊ ပအိုဝ်းအမျိုးသားဖက်ဒရယ်ကောင်စီ (PNFC)၊ မွန်ပြည်နယ် ဖက်ဒရယ်ကောင်စီ (MSFC)၊ ကရင်နီပြည်အတိုင်ပင်ခံကောင်စီ (KSCC)၊ အမျိုးသမီးများအဖွဲ့ချုပ် (WLB)၊ လားဟူဒီမိုကရေတစ် အစည်းအရုံး(LDU)၊ စစ်ကိုင်းဖက်ဒရယ်ယူနစ် တော်လှန်ရေးအင်အားစုများ၊ မန္တလေးနိုင်ငံရေး စင်္ကြံဖြစ်မြောက်ရေးအဖွဲ့ (OFMPP) တို့က ပူးပေါင်းထုတ်ပြန်ခြင်းဖြစ်သည်။
၂၀၂၁ စစ်အာဏာသိမ်းပြီးနောက် ၂၀၀၈ ဖွဲ့စည်းပုံ အခြေခံဥပဒေသည် ပျက်ပြယ်သွားပြီဖြစ်၍ စစ်တပ်သည် ရွေးကောက်ပွဲ ကျင်းပရန် အခွင့်အာဏာမရှိကြောင်း၊ နိုင်ငံရေး ထွက်ပေါက်အဖြစ် အတုအယောက် ရွေးကောက်ပွဲ ကျင်းပရန် ကြိုးပမ်းခြင်းသည် လူထု နိုင်ငံရေးစိတ်ဆန္ဒကို ဆန့်ကျင်ပြီး အချုပ်အခြာအာဏာကို မတရား ရယူရန် ကြိုးပမ်းခြင်းဖြစ်သည်ဟု ထုတ်ပြန်သည်။
စစ်တပ်၏ ရွေးကောက်ပွဲ ရလဒ်များသည် တိုင်းရင်းသားတော်လှန်ရေး အင်အားစုများနှင့် ဖက်ဒရယ်ယူနစ် အဖွဲ့ အစည်းများ လိုလားသော ဖက်ဒရယ်ပြည်ထောင်စုကို တည်ဆောက်နိုင်မှာ မဟုတ်ဘဲ မြန်မာ့ပဋိပက္ခကို ရေရှည် ဖြစ်ပေါ်စေပြီး ဒီမိုကရေစီရေး၊ လူ့အခွင့်အရေး၊ အမျိုးသားတန်းတူးရေးနှင့် ကိုယ်ပိုင်ပြဌာန်းခွင့် ရရှိရေးကို ဖော်ဆောင်ရန် ပိုမိုခက်ခဲလာစေသည်ဟု ဆိုသည်။
လက်ရှိတွင် အသွင်ကူးပြောင်း ရေးကာလ ဖက်ဒရယ်ဒီမိုကရက်တစ် အစိုးရတစ်ရပ် ပေါ်ပေါ်လာရေးအတွက် ဖက်ဒရယ် အသွင်းကူးပြောင်းရေးကာလဆိုင်ရာ အခြေခံဥပဒေ ရေးဆွဲရေး လုပ်ငန်းများကို ဆောင်ရွက်လျက်ရှိကြောင်း၊ ဖက်ဒရယ် ယူနစ်များသည် မဏ္ဍိုင်ကြီး ၃ ရပ်ကို တည်ဆောက်၍ လက်တွေ့ကျင့်သုံးနေပြီဖြစ်ကြောင်း ကြေညာသည်။
“ကျနော်တို့ကတော့ ကျနော်တို့ အနာဂါတ်ဖက်ဒရယ်ဒီမိုကရေစီပြည်ထောင်စု တည်ဆောက်ဖို့အတွက် အခုကတည်းက စပြီးတော့ ပြင်ဆင်နေတဲ့ လုပ်ငန်းတွေ ရှိပါတယ်။ ကျနော်တို့ ပြည်ထောင်စုအတွက်ကို ဖွဲ့စည်းပုံ အခြေခံဥပဒေကို ရေးဆွဲပြင်ဆင်နေပါတယ်။ ကျနော်တို့ ပြည်နယ်တွေမှာလည်း ဖွဲ့စည်းပုံ ရေးဆွဲရေး လုပ်ငန်းတွေ၊ ဥပဒေပြုရေး၊ အုပ်ချုပ်ရေး၊ တရားစီရင်ရေးလုပ်ငန်းတွေ ကျနော်တို့ ထူထောင်နေပြီဖြစ်တယ်။ ကျနော်တို့ ပြည်နယ်တွေ၊ ဖက်ဒရယ်ယူနစ်တွေမှာ ကျနော်တို့ ကိုယ်ပိုင်အုပ်ချုပ်ရေးနဲ့ ကိုယ်ဟာကို အုပ်ချုပ်သွားဖို့ပါပဲ” ဟု ဦးအောင်ဆန်းမြင့်က ပြောသည်။
အာဏာသိမ်း စစ်ကော်မရှင်သည် ၎င်းတို့ လိုချင်သော ရွေးကောက်ပွဲ ရလဒ်ကို ပုံဖော်ရယူနိုင်ရေးအတွက် ရွေးကောက် ပွဲကို ၂၀၂၅ ဒီဇင်ဘာလ ၂၈ ရက်မှစတင်၍ အပိုင်းအလိုက် ကျင်းပသွားမည်ဟု ကြေညာထားသည်။
တိုင်းရင်းသားလူမျိုးများ ကောင်စီ (MEC) သည် ပြည်နယ်အားကောင်းရေးမှ ပြည်ထောင်စု အားကောင်ရေး ဖက်ဒရယ် အခြေခံ ချဉ်းကပ်မှုဖြင့် ခေတ်ပြောင်း၊ စနစ်ပြောင်း နိုင်ငံသစ် တည်ဆောက်သွားမည်ဟု ၂၀၂၅ ဖေဖော်ဝါရီမှာ ကြေညာထားသည်။
