(006SV)
စစ်ကိုင်းတိုင်း၊ တမူးမြို့နယ်၊ သနန်ရွာမှ ဒေသခံ ၃၇ ဦးကို ကူကီးလက်နက်ကိုတပ်များက ဖမ်းဆီးသတ်ဖြတ်ခဲ့ဟူ၍ ISP- Myanmar က သုတေသနပြုဖော်ပြမှုသည် အချက်အလက် မှားယွင်းဖော်ပြထားမှုဖြစ်ကြောင်း ကူကီးအမျိုးသားအစည်းအရုံး/ ကူကီးအမျိုးသား တပ်မတော် (မြန်မာပြည်) က ထုတ်ပြန်သည်။
၂၀၂၃ ခုနှစ်၊ နိုဝင်ဘာလ ၂၄ ရက်တွင် တမူးမြို့နယ်၊ သနန်ရွာမှ ဒေသခံ ၃၇ ဦးကို ကူကီးလက်နက်ကိုင်တပ်များက ဖမ်းဆီးသတ် ဖြတ်ခဲ့ဟူ၍ မြန်မာ့မဟာဗျူဟာနှင့် မူဝါဒလေ့လာရေး အင်စတီကျု (ISP-Myanmar) က အောက်တိုဘာလ ၂၃ ရက်က သုတေသန ပြုဖော်ပြခဲ့သည်။
အဆိုပါပြစ်မှုမျိုး ကျူးလွန်ခဲ့ခြင်း လုံးဝ မရှိဘဲ အခြေအမြစ်မရှိ အချက်အလက် မှားယွင်းဖော်ပြထားသည်ကို တွေ့ရှိရပြီး၊ ISP – Myanmar အနေဖြင့် အချက်အလက် မှားယွင်းဖော်ပြမှုကို ပယ်ဖျက်ပေးရန် ကူကီးအမျိုးသားတပ်မတော် KNA- B က အောက်တိုဘာလ ၂၅ ရက်က ထုတ်ပြန်ချက်ထုတ်၍ တောင်းဆိုသည်။
“အခြေအမြစ်မရှိတဲ့ ISP မြန်မာရဲ့ စွပ်စွဲမှုကိုကျနော်တို့ ဖြေရှင်းချက် ထုတ်ထားတယ်။ ကျနော်တို့ ဖြေရှင်းချက်တစ်ခုထဲနဲ့ မလုံ လောက်ဘူးဆိုရင် NUG လက်အောက်ခံ စစ်ဒေသ(၁) ကိုလည်း ဆက်သွယ်မေးမြန်လို့ ရပါတယ်။အခုဟာက သတင်းရင်းမြစ် အမှန်ကို မသိပဲ မီဒီယာမှာ သွေးထိုးလှုံ့ဆော် ရေးသာဖော်ပြနေလို့ တော်လှန်ရေးအဖွဲ့တွေရဲ့ ရှေးဆက်လုပ်ငန်းစဉ်တွေကို ဟန့်တားရာရောက်နေလို့ ဖြေရှင်းချက်ပေးရခြင်းဖြစ်တယ်” ဟု KNA- B မှ ပြောရေးဆိုခွင့်ရှိသူက ပြောသည်။
ဖြစ်စဉ်သည် ၂၀၂၃၊ နိုဝင်ဘာလ ၂၄ ရက်က သနန်ကျေးရွာရှိ စစ်ကောင်စီတပ်နှင့် ၎င်း၏ လက်အောက်ခံတပ်များကို အမျိုးသားညီညွတ်ရေးအစိုးရ၏ စစ်ဒေသ (၁) မှ ကာကွယ်ရေးတပ်ဖွဲ့များနှင့် KNA- B တို့ အတူ ထိုးစစ်ဆင်တိုက်ခိုက်ခဲ့ခြင်းသာဖြစ်ကြောင်း ပြောရေးဆိုခွင့်ရှိသူက ပြောသည်။
၂၀၂၁ ဖေဖော်ဝါရီလ ၁ ရက်မှ ၂၀၂၄ အောက်တိုဘာလ ၂၀ ရက်အထိ “ဘုတလင်ဖြစ်စဉ်အပါအဝင် စစ်ကောင်စီ ကျူးလွန်ခဲ့သော အစုအပြုံလိုက်သတ်ဖြတ်မှုများ” ခေါင်းစဉ်ဖြင့် သုတေသနပြုဖော်ပြရာ စစ်ကောင်စီတပ်မဟုတ်သော အခြားလက်နက်ကိုင်များ ကျူးလွန်သည့် အစုအပြုံလိုက်သတ်ဖြတ်မှု ငါးခုထက်မနည်းရှိခဲ့ကာ ယင်းဖြစ်စည်များတွင် အရပ်သား ၉၇ ဦးထက်မနည်း သေဆုံးခဲ့ကြောင်း ISP- Myanmar က ထုတ်ပြန်သည်။
ယင်းငါးခုထဲက ဖြစ်စဉ်တစ်ခုတွင် ကူကီးအမျိုးသားတပ်မတော် KNA- B က အစုအပြုံလိုက်သတ်ဖြတ်မှုကို သနန်ရွာမှာ ကျူးလွန်ခဲ့သည်ဟု ISP က ဆိုသည်။
ISP – Myanmar ၏ ထုတ်ပြန်ချက်ကို ကိုးကားပြီး ဧရာဝတီသတင်းဌာနနှင့် RFA အပါအဝင် လွတ်လပ်သည့်သတင်းဌာနများတွင် ရေးသားဖော်ပြထားကြောင်း သိရသည်။
အဖွဲ့အစည်းများ၊ သတင်းဌာနများအနေဖြင့် သက်ဆိုင်ရာအဖွဲ့အစည်းများထံဖြစ်စေ၊ ယုံကြည်စိတ်ချရသော သတင်းရင်းမြစ်များထံဖြစ်စေ သတင်းအချက်အလက်များ စစ်ဆေးအတည်ပြုပြီးမှသာ သတင်းထုတ်ပြန်ပါရန် KNA- B အဖွဲ့က ဆိုသည်။
ကူကီးအမျိုးသား တပ်မတော်KNO/ KNA(B) ကို ၂၀၁၃ ခုနှစ်တွင် ဒုတိယအကြိမ် ပြန်လည်ဖွဲ့စည်းခဲ့ပြီး ရည်ရွယ်ချက်မှာ မြန်မာပြည်မှာ ရှိနေသည့် ကူကီးလူမျိုးများ၏ ကိုယ်ကံကြမ္မာကိုယ်ဖန်တီးရေ၊ လူမျိုးစု အခွင့်ရေးတန်းတူရေးနှင့် အာဏာရှင် အမြစ်ပြတ်ချေမှုန်းရေးတို့ အတွက် ဖွဲ့စည်းရခြင်းဖြစ်ကြောင်း KNO/ KNA(B) ၏ ပြောရေးဆိုခွင့်ရှိသူက ပြောသည်။
၂၀၂၁ ခုနှစ် စစ်အာဏာသိမ်းပြီးနောက် နွေဦးတော်လှန်ရေးနှင့်အတူ အသစ်ပေါက်ဖွားလာသည့် PDF များကိုစုစည်းကာ အခြေခံ စစ်သင်တန်းများပေးပြီး တမူးမြို့နယ်ဒေသတခွင် အတူတကွ စစ်ရေးပူးပေါင်းဆောင်ရွက်နေကြောင်း သိရသည်။
လက်ရှိတွင် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၏ အမှတ် (၁) စစ်ဒေသ၊ ပြည်သူ့ကာကွယ်ရေးအဖွဲ့တွေနှင့် ပူးပေါင်းပြီး တမူးခရိုင် အတွင်းရှိ အောင်ဇေယျစစ်စခန်း၊ မြို့သစ် စစ်စခန်း၊ သနန်နှင့် ခမ်ပတ် စစ်စခန်းများကို သိမ်းပိုက်ထားပြီး ဖြစ်ကြောင်း သိရသည်။
