တမူးမြို့နယ်တွင် ချင်းလူငယ် ၂ ဦးကို စစ်​ကောင်စီကပစ်သတ်၊ အလောင်းလာယူရန် မိသားစုဝင်ထံ အကြောင်းကြား

0

စစ်ကိုင်းတိုင်းဒေသကြီး၊ တမူးခရိုင်၊ ထုံကတင်အုပ်စု၊ နောင်ကက်ရွာသစ်က ချင်းလူငယ် ၂ ဦးကို ဇူလိုင် ၁၀ ရက်နေ့ညက အာဏာသိမ်းစစ်ကောင်စီတပ်ဖွဲ့က ပစ်သတ်ပြီး အလောင်းလာယူရန် ယင်းနေ့ညနေပိုင်းတွင် မိသားစုဝင်ထံ အကြောင်းကြားလာသည်ဟု သိရသည်။

“သေတာ ၂ ဦးပါ၊ သူ့တို့ အလောင်းကို တမူးရင်ခွဲရုံကနေ ဖုန်းဆက်လာတယ်၊ လာယူဖို့ ညနေပိုင်းမှာ အကြောင်းကြားလာတယ်။ အခုချိန်ဆို ရင် သွားသယ်လောက်ပြီထင်တယ်၊ သေတာ ၂ ဦး၊ ဒဏ်ရာရတာက ၁ ယောက်၊ ထွက်ပြေးတဲ့သူတွေလည်းရှိတယ်လို့ သိရတယ်၊ လူငယ်တွေဆိုတော့ နာမည်တွေတော့ မသိဘူး” ဟု ​ဒေသခံတစ်ဦးက ပြောသည်။

ဖြစ်စဉ်မှာ ဇူလိုင်လ ၁ဝ ရက်နေ့ ည ၁၀ နာရီဝန်းကျင်တွင် စစ်ကောင်စီတပ်ဖွဲ့များက ကျွန်းပင်သာကျေးရွာတွင် သေနတ်များပစ်ဖောက်သည့်အပြင် မင်းသာတံတားအနီးတွင် ကူကီချင်းလူငယ် ၆ ဦးတို့နှင့်တွေ့ဆုံခဲ့ပြီး ပစ်ခတ်ခဲ့သောကြောင့် ၂ ဦးသေဆုံးခဲ့ပြီး တံတားပေါ်မှ ခုန်ဆင်းသော (၁) ဦးကိုလည်း စစ်ကောင်စီမှ တရစပ်ပစ်ခတ်ခဲ့တာတွေရှိသည့်အပြင် ထွက်ပြေးလွတ်မြောက်သူလည်းရှိသည်ဟု ဒေသခံတစ်ဦးထံက သိရသည်။

၎င်းတို့ (၆) ဦးမှာ ဆယ်ကျော်သက်လူငယ်များဖြစ်ကြပြီး နောင်ကက်ရွာသစ်တွင် နေထိုင်ကြကြောင်း သိရသည်။

နောင်ကက်ရွာသစ်သည် တမူးမြို့နှင့် မိုင် ၂၀ ခန့်ဝေးပြီး ကူကီးချင်းလူမျိုး အများစုနေထိုင်သည်ဟုလည်း သိရသည်။

Share.

About Author

Leave A Reply