လူသေဆုံးမှုရှိသော ဖမ်းဆီးထိန်းသိမ်းမှုကို အရေးယူပေးရန် ZFU/PDF – Zoland တောင်းဆို
(006SV)
ချင်းပြည်နယ်၊ တွန်းဇံမြို့တွင် ချင်းအမျိုးသားတပ်မတော် CNA က စိတ်ကျန်းမာရေးချို့ယွင်းသူ ဒေသခံတစ်ဦးကို ဖမ်းဆီးထိန်းသိမ်းထားစဉ် ရက်ပိုင်းအတွင်း သေဆုံးသွားကြောင်း သိရသည်။
တီးတိန်မြို့၊ စကောလမ်းရပ်ကွက်က တာန်လန့်ခန့်ဆွင်းသည် တွန်းဇံမြို့သို့ သွားရောက်စဉ် တုန်းတွောင်ကျေးရွာအနီးတွင် ဒီဇင်ဘာလ ၉ ရက်က CNA တပ်ဖွဲ့က ဖမ်းဆီးခဲ့ပြီး ဒီဇင်ဘာလ ၁၀ ရက် နံနက်ပိုင်းမှာ သေဆုံးခဲ့သည်ဟု PDF – Zoland နှင့် CDF – တွန်းဇံ တပ်ဖွဲ့များထံမှ သိရသည်။
“တုန်းတွောင်ဂိတ်မှာ CNA ကင်းသမားက ရပ်ခိုင်းတာကို မရပ်ပဲ ထွက်ပြေးသွားတယ်တဲ့။ လိုက်ဖမ်းတာ၊ ပြန်မိတယ်။ သူတို့က တွန်းဇံမြို့နယ်ကောင်စီဥက္ကဌ ကျနော်ဆီကို လာအပ်တယ်။ ဗစ်တိုရီးယာကမ့်စခန်းမှာ ချင်းလဲန်းကောင်စီဦးဆောင်ကော်မတီ အစည်းအဝေး လုပ်နေချိန်ဆိုတော့ ကျနော်က မရှိဘူး။ ကျနော်မရှိတော့ CNA က သူတို့ဘာသာပဲ ထောင်ထဲမှာ ထည့်ပြီးတော့ မေးမြန်းချက် လုပ်ကြတော့ သူက လုံးဝ ပြန်မထူးဘူးတဲ့။ စကားတခွန်းပဲ ပြောတယ်။ “မွာလ်ပီးရွာမှာ ခိုင်နီးသွား ငုံမလို့” တဲ့။ နောက်ပိုင်းတော့ ဒီလူက စိတ်မနှံ့သူ ဖြစ်နိုင်တယ်ဆိုပြီးတော့ ဆက်မမေးတော့ပဲ စောင်တွေ စီစဉ်ပေးပြီး အိပ်ခိုင်းတယ်တဲ့။ မနက် မိုးလင်းတော့ ကင်းသမား ကြည့်တော့ သူက သေသွားတယ် ပြောတယ်” ဟု CDF တွန်းဇံ စစ်ဦးစီးချုပ် ထန်ဆွန်မုန်းက ပြောသည်။
သေဆုံးသူ၏ ရုပ်အလောင်းကို မိသားစုထံ ပြန်လည်လွှဲပေးလိုက်ပြီးဖြစ် ကြောင်း၊ တွန်းဇံမြို့နယ်ထဲက CNA တပ်ရင်းမှူးနှင့် တိုင်ပင်၍ ချင်းဓလေ့ထုံစံနှင့်အညီ မိသားစုဆွေမျိုး အသိုင်းအဝိုင်းနှင့် ကြေအေးမှု ရယူထားပြီးပြီဟု သိရသည်။
ZFU/ PDF – Zoland ၏ ထုတ်ပြန်ချက်မှာတော့ ဖမ်းဆီးခံရသူ တာန်လန့်ခန့်ဆွင်းသည် CNA တပ်ဖွဲ့ဝင်တချို့၏ ရိုက်နှက်စစ်ဆေးမေးမြန်းမှုကို ခံရပြီး လက်လွန်မှုကြောင့် ဒီဇင်ဘာလ ၁၀ ရက်တွင် အသက်သေဆုံးခြင်းဖြစ်သည်ဟု ဒီဇင်ဘာလ ၁၁ ရက်က ထုတ်ပြန်သည်။
ဒေသခံပြည်သူတစ်ဦး သေဆုံးမှုနှင့်ပတ်သက်၍ CNA တပ်ဖွဲ့ ခေါင်းဆောင်များအနေဖြင့် တာဝန်ယူမှု၊ တာဝန်ခံမှု ရှိရန် လိုအပ်ပြီး ကျူးလွန်သူများကို တရားဥပဒေအရ ထိရောက်စွာ အရေးယူမှု ဆောင်ရွက်ပေးရန် ZFU/ PDF – Zoland က တောင်းဆိုသည်။
“သူတို့ကလည်း အမှန်ဆိုရင် CNF ခေါင်းဆောင်တွေအနေနဲ့ တပည့်တွေက ရိုက်နှက်သတ်ခဲ့တာဆိုတော့ သူတို့ခေါင်းဆောင် တွေက အရေးယူသင့်တယ်။ ကျနော်တို့က အရေးယူမှာ မဟုတ်ဘူး။ သူတို့ကလည်း အဖွဲ့အစည်းတစ်ခုဆိုတော့ သူတို့ ဥပဒေနဲ့ အညီ အရေးယူသင့်တယ်။ တော်လှန်ရေးကာလထဲမှာ အဲလို လက်လွန်တာမျိုးတွေ လုပ်တာတော့ စိတ်မကောင်းဘူး။ နောက်လည်း အဲလို မဖြစ်အောင် အဖွဲ့အစည်းတိုင်း သတိထားဖို့ ပြောချင်ပါတယ်” ဟု ZFU ပြောရေးဆိုခွင့်ရှိသူကပြောသည်။
သေဆုံးသူ တာန်လန့်ခန့်ဆွင်းသည် မလေးရှာနိုင်ငံတွင် စိတ်ကျန်းမာရေးချို့ယွင်းလာမှုကြောင့် ဇာတိ တီတိန်မြို့ကို ပြန်လာ၍ နေထိုင်သည်မှာ ၂ နှစ်ခန့်ကြာပြီးဖြစ်ကြောင်း သိရသည်။
တွန်းဇံမြို့နယ်ကို ဒေသချင်းကာကွယ်ရေးတပ်ဖွဲ့ဖြစ်သည့် CDF – တွန်းဇံနှင့် ချင်းအမျိုးသာတပ်မတော် CNA တို့က သိမ်းပိုက် ထားပြီး အုပ်ချုပ်ရေး ယန္တရားများကို အကောင်အထည်ဖော်လျက်ရှိသည်။
