ဖမ်းဆီးအကျဉ်းကျခံထားရသော သတင်းမီဒီယာသမား ၂၇ ဦးကို အမြန်ဆုံး ပြန်လွှတ်ရန် IPCM တောင်းဆို

(006SV)

မြန်မာနိုင်ငံတွင် ဖမ်းဆီးထိန်းသိမ်းခံထားရသော သတင်းမီဒီယာသမား ၂၇ ဦးကို ခြွင်းချက်မရှိ အမြန်ဆုံး ပြန်လွှတ် ပေးပြီး သတင်းထောက်များကို ပစ်မှတ်ထား ဖမ်းဆီးခြင်း၊ ညှင်းပမ်းနှိပ်စက်ခြင်းနှင့် ထောင်ဒဏ်ချမှတ်ခြင်းများ ချက်ချင်း ရပ်တန့်ရန် လွတ်လပ်သော မြန်မာသတင်းမီဒီယာကောင်စီ (IPCM) က တောင်းဆိုလိုက်သည်။

ဇန်နဝါရီလ ၁၇ ရက်နှင့် ၁၈ ရက်တွင် ကျင်းပသော IPCM ၏ ဒုတိယအကြိမ်မြောက် အထွေထွေညီလာခံကို အပြီးတွင် တောင်းဆိုလိုက်ခြင်းဖြစ်ကြောင်း ဇန်နဝါရီလ ၁၉ ရက် ထုတ်ပြန်ချက်တွင် ဖော်ပြထားသည်။

စစ်အာဏာသိမ်း ၅ နှစ်ကာလတွင် သတင်းသမား ၂၀၀ ကျော် ဖမ်းဆီးခံခဲ့ရပြီး အကျဉ်းထောင်များတွင် သတင်းသမား အနည်းဆုံး ၃၀ မှ ၆၀ ဝန်းကျင်အထိ ထိန်းသိမ်းခံရခဲ့ရကြောင်း၊ လက်ရှိအချိန်ထိ အမျိုးသမီးသတင်းသမား ၅ ဦးအပါအဝင် ၂၇ ဦးသည် အကျဉ်းထောင်များတွင် အကျဉ်းကျခံနေရဆဲဖြစ်သည်ဟု IPCM ထံမှ သိရသည်။

အကျဉ်းကျခံထားရဆဲ သတင်းမီဒီယာသမားများတွင် ထောင်တစ်သက်၊ ထောင် ၁၀ နှစ်အပါအဝင် နှစ်ရှည်ထောင်ဒဏ် ကျခံထားရသူ ၁၄ ဦး ပါဝင်ပြီး တခြားသတင်းများသည်လည်း အနည်းဆုံး ထောင်ဒဏ် ၃ နှစ်မှ ၁၀ နှစ်ကြား ပြစ်ဒဏ်များ ကျခံနေရသည်ဟု သိရသည်။

၂၀၂၁ အာဏာသိမ်းချိန်မှ ယခုနှစ် ဇန်နဝါရီလအထိ သတင်းမီဒီယာအလုပ်ကို လုပ်ကိုင်နေစဉ် စစ်ကောင်စီ၏ ဖမ်းဆီးနှိပ်စက်မှုနှင့် သတ်ဖြတ်မှုများကြောင့် သေဆုံးခဲ့ရသော သတင်းမီဒီယာသမား ၇ ဦး အသက်ဆုံးရှုံးခဲ့ရသည်ဟု သိရသည်။

၅ နှစ်တာအတွင်း သတင်းမီဒီယာသမား ၁၈၀ နီးပါးကို စစ်ကောင်စီက မတရားဖမ်းဆီးအရေးယူခဲ့ပြီး ရာဇသတ်ကြီးပုဒ်မ – ၅၀၅ – က၊ ၅၀၅ – ခ၊ ပုဒ်မ – ၁၂၄ – က၊ မတရားအသင်းဆက်သွယ်မှု ဥပဒေပုဒ်မ – ၁၇(၁)၊ ဆက်သွယ်ရေးဥပဒေပုဒ်မ – ၆၆(ဃ)၊ လူဝင်မှု ကြီးကြပ်ရေး အက်ဥပဒေ၊ ပို့ကုန်သွင်းကုန်ဥပဒေ၊ ပေါက်ကွဲစေတတ်သော ဝတ္ထုပစ္စည်းများပုဒ်မ – (၅)၊ သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေပုဒ်မ – ၂၇ နှင့် အကြမ်းဖက်မှုတိုက်ဖျက်ရေး ဥပဒေပုဒ်မများ အစရှိသည့် ရာဇဝတ်မှုများဖြင့် အရေးယူခဲ့သည် ဟု သိရသည်။

မြန်မာသတင်းမီဒီယာသမားများကို ဖမ်းဆီးထောင်ချမှုများတွင် စစ်ကောင်စီသည် ပုဒ်မ ၅၀၅ – က၊ ၅၀၅ – ခ နှင့်အကြမ်း ဖက်မှုတိုက်ဖျက်ရေးဥပဒေပုဒ်မများကို အများဆုံး အသုံးပြုခဲ့သည်ဟု သိရသည်။

အာဏာသိမ်းပြီးနောက် စစ်ကောင်စီသည် သတင်းမီဒီယာလုပ်ငန်း (၁၅) ခု၏ လုပ်ငန်းလိုင်စင်များကို ရုပ်သိမ်းခဲ့ပြီး သ တင်းမီဒီယာဆက်စပ်နေသော မီဒီယာဆိုင်ရာဥပဒေများကို တစ်ဖက်သတ်ပြုပြင်ပြဌာန်းခဲ့သည်ဟု သိရသည်။

သတင်းမီဒီယာသမားများ နှင့်သတင်းမီဒီယာ လုပ်ငန်းများသည် သတင်းလွတ်လပ်ခွင့် အခြေခံပေးထားချက်များအရ ရပ်တည်နိုင်ခြင်း မရှိဘဲ ကမ္ဘာ့အဆိုးဆုံး သတင်းလွတ်လပ်ခွင့် ထိပါးဖိနှိပ်ခံရသည့် ထိပ်တန်းနိုင်ငံများစာရင်းတွင် ပါဝင်နေသည်အထိ အန္တရာယ်ကျရောက် နေကြောင်း IPCM ၏ ကြေညာချက်တွင် ဖော်ပြထားသည်။

သတင်းလွတ်လပ်ခွင့် နှင့် လွတ်လပ်စွာ ထုတ်ဖေါ်ပြောဆိုခွင့် ကာကွယ်မြှင့်တင်ရေး ၊ သတင်းမီဒီယာသမားများ သတင်းမီဒီယာအလုပ်ကို လွတ်လပ်စွာ လုပ်ကိုင်နိုင်ရေးအတွက် အဖွဲ့အစည်းအသီးသီးက အလေးထား လုပ်ဆောင်ပေးကြပါရန်နှင့် သတင်းမီဒီယာသမားများ ဖမ်းဆီးထောင်ချခြင်း နှင့် နှိပ်စက်သတ်ဖြတ်ခြင်းများ ကို ဆန့်ကျင်ရှုတ်ချပြီး ကျူးလွန်မှုများအတွက် တာဝန်ခံမှုရှိစေရန် IPCM က တောင်းဆိုထားသည်။

နိုင်ငံတကာအဖွဲ့အစည်းများအနေဖြင့်လည်း လွတ်လပ်သော မြန်မာသတင်းမီဒီယာများ ဆက်လက် ရှင်သန်ရေးနှင့် ရေရှည်ရပ်တည်နိုင်ရေးအတွက် ပံ့ပိုးကူညီပေးရန် IPCM က တိုက်တွန်ထားသည်။

IPCM ညီလာခံတွင် IPCM အဖွဲ့ဝင်များ၊ မိတ်ဖက်သတင်းဌာနများ၊ မြန်မာသတင်းမီဒီယာအစုအဖွဲ့များ၊ သက်ဆိုင်ရာအဖွဲ့အစည်းများမှ ကိုယ်စားလှယ်များ စုစုပေါင်း ၁၀၀ ကျော် တက်ရောက်ကြောင်း သိရသည်။