ချင်းပြည်နယ် မတူပီမြို့နယ် လိုင်လဲန်းပီမြို့ကနေ မတူပီ-ပလက်ဝကားလမ်းပေါ်မှာရှိတဲ့ ထယ်ဘွေ့တပ်စခန်းဘက်ကို စစ်ကြောင်းထိုး ချီတက်လာတဲ့ အင်အား ၁၅၀ လောက်ရှိတဲ့ စစ်ကောင်စီတပ်နဲ့ ချင်းပူးပေါင်းကာကွယ်ရေးတပ်ဖွဲ့တို့ မတ်လ ၁၂ ရက်ကစပြီး တိုက်ပွဲတောက်လျှောက်ဖြစ်ပွားခဲ့ပြီး နှစ်ရက်အတွင်း စစ်ကောင်စီဘက် အနည်းဆုံး ၈ ဦးသေဆုံးခဲ့တယ်လို့ သိရပါတယ်။
စစ်ကောင်စီတပ်ဖွဲ့တွေဟာ လိုင်လဲန်းပီမြို့ကနေ မတူပီနယ် ထယ်ဘွယ်တပ်စခန်းဘက်ကို လအုပ်ချောင်းအတိုင်း ခြေလျင်နဲ့ ချီတက်လာရာမှာ ချင်းအမျိုးသားတပ်မတော် (CNA)၊ ချင်းကာ ကွယ်ရေးတပ်ဖွဲ့ CDF-Matupi နဲ့ CDF-Paletwa ပူးပေါင်းတပ်ဖွဲ့တို့က ကြားဖြတ်ချုံခိုတိုက်ခိုက်ခဲ့ကြတာလို့ CDF-Paletwa ပြန်ကြားရေးတာဝန်ခံက ပြောပါတယ်။
“လိုင်လဲန်းပီကနေ စစ်သားတွေ ၁၅၀ ခန့်ပေါ့လေ မတူပီက ထယ်ဘွယ်စခန်းကိုအင်အားဖြည့်ဖို့လာတာပါ လာတဲ့ပုံစံကလည်း ဆမီးဘက်ကနေလာတာမဟုတ်ပဲနဲ့ မရာနယ်မြေကနေ တိုက်ပွဲမဖြစ်တဲ့အချိန်ကျတော့ အဲဒါကို အခွင့်ကောင်းယူပြီးမှ မရာနယ်မြေဘက်ကနေ တိုတဲ့လမ်းကြောင်းဘက်ကိုရွေးပြီးမှလာတာပေါ့ ကျနော်တို့လှုပ်ရှားတဲ့ နယ်မြေကိုဖြတ်တဲ့အချိန်ကျတော့ ၁၂ ရက်နေ့မှာ ကျနော်တို့ CDF-Paletwa ကနေ မိုင်းဆွဲပြီးမှတိုက်တယ် ဟိုဘက်က တစ်ယောက်ကျ ၅ ယောက်လောက်ဒဏ်ရာရတာပေါ့လေ ၁၃ ရက်ကျတော့ ကျနော်တို့ပူးပေါင်းတပ်ဖွဲ့တွေက လအုစ် ချောင်းဆိုတဲ့ ပလက်ဝ-မတူပီနယ်စပ်ချောင်း ၃ ဖွဲ့ပေါင်းတိုက်ခိုက်တယ် အဲဒီမှာလည်း တိုက်ပွဲက ၂ ကြိမ်ရှိပြီးတော့ ဟိုဘက်က ၇ ဦးခန့်ကျဆုံးပြီး ၁၀ ယောက်ကျော်ဒဏ်ရာရတယ်ဆိုပြီး ကျနော်တို့သိရတယ်” လို့ CDF-Paletwa ပြန်ကြားရေးတာဝန်ခံကပြောပါတယ်။
ယမန်နေ့မတ်လ ၁၃ ရက်နေ့က တနေကုန်နီးပါးတိုက်ပွဲပြင်းထန်ခဲ့ပြီး ချင်းပူးပေါင်းကာကွယ်ရေးတပ်ဖွဲ့ဘက်က CNA ရဲဘော်တစ်ဦးက ကျဆုံးခဲ့တယ်လို့သိရပါတယ်။
စစ်ကောင်စီတပ်ဖွဲ့တွေဟာ လအုပ်ချောင်းအတိုင်း ဆက်လက်ချီတက်သွားပြီး ယနေ့မတ်လ ၁၄ ရက်နေ့မှာလည်း ချင်းပူးပေါင်းကာကွယ်ရေးတပ်ဖွဲ့တွေနဲ့ တိုက်ပွဲဆက်လက်ဖြစ်ပွားနေပြီး နှစ်ဖက်ထိခိုက်ကျဆုံးမှုအခြေအနေကိုတော့ မသိရသေးဘူးလို့ CDF-Matupi က တာဝန်ရှိသူတစ်ဦးကပြောပါတယ်။
“အခုက ထယ်ဘွယ်ဘက်ဦးတည်နေတာပေါ့နော ချောင်းအတိုင်းအဆင်းသွားတာ ထယ်ဘွယ်ရောက်ခါနီးပြီ မနေ့က လည်းအကြီး အကျယ်တိုက်ပွဲဖြစ်တယ် ဒီနေ့လည်းဖြစ်နေဆဲ အခုလည်း ပစ်နေတုန်းပဲတိုက်ပွဲက ဒီနေ့တော့ ဘယ်လိုမှ အတည်ပြုလို့မရသေးဘူး ပစ်နေဆဲဆိုတော့လေ လက်နက်ကြီးသံတွေလည်းကြားနေရတယ်” လို့ သူကပြောပါတယ်။
စစ်ကောင်စီတပ်ဖွဲ့မှ လက်နက်ကြီးရမ်းသမ်းပစ်ခတ်မှုကြောင့် တွီဆော့ကုန်းကျေးရွာ လူနေ အိမ်တစ်လုံး၊ စာသင်ကျောင်းတစ်ဆောင်၊ ခရစ်ယာန်ဘုရားရှီခိုးကျောင်းတစ်ဆောင် ထိခိုက်ပျက်စီးခဲ့ကြောင်း သိရသည်။
အလားတူ အိန္ဒိယ-မြန်မာနယ်စပ် ချင်းပြည်နယ် ဖလမ်းမြို့နယ် ရိခေါဒါရ်မြို့အမှတ် ၂ ရက်ကွက် တောင်ကုန်းပေါ်မှာ အခြေစိုက်တဲ့ စစ်ကောင်စီတပ်စခန်းကို ချင်းကာကွယ်ရေးပူးပေါင်းတပ်ဖွဲ့တွေက မတ်လ ၁၂ နဲ့ ၁၃ ရက်နေ့က သွားရောက်ပစ်ခတ်ခဲ့ပြီး စစ်ကောင်စီဘက်က ၃ ယောက်လောက် သေဆုံးတယ်လို့ သိရပါတယ်။
ဒါ့အပြင် ရိခေါဒါရ်မြို့ရဲစခန်းမှာ တာဝန်ထမ်းဆောင်နေကြတဲ့ ဒု-တပ်ကြပ်အပါအဝင် ရဲတပ်သား ၆ ဦးဟာလည်း မတ်လ ၆ ရက်နေ့က ချင်းကာကွယ်ရေးတပ်ဖွဲ့ထံ CDM လုပ်ပူးပေါင်းခဲ့တယ်လို့ PDF-Zoalnd တပ်ဖွဲ့က ထုတ်ပြန်ပါတယ်။
စစ်ကောင်စီတပ်နဲ့ ချင်းကာကွယ်ရေးပူးပေါင်းတပ်ဖွဲ့တို့ တိုက်ပွဲကြောင့် ရိခေါဒါရ်မြို့က ဒေသခံပြည်သူအားလုံးဟာလည်း တဖက်အိန္ဒိယနိုင်ငံမီဇိုရမ်ပြည်နယ် ဇိုခေါထာရ်ဘက်ကို မတ်လ ၇ ရက်နေ့ကတည်းက ယနေ့ချိန်ထိ ထွက်ပြေးတိမ်းရှောင်ရဆဲဖြစ်ပါတယ်။
