အိန္ဒိယနိုင်ငံအရှေ့မြောက်ဒေသ မီဇိုရမ်ပြည်နယ် အိုင်ဇောလ်မြို့က မီဇိုရမ်တက္ကသိုလ် (Mizoram University) တွင် မြန်မာဘာသာရပ် ဒီပလိုမာတန်းကို အောက်တိုဘာလ ၁၂ နေ့က စတင်သင်ကြားနေပြီဖြစ်ကြောင်း သိရသည်။
ယခုလက်ရှိတွင် မြန်မာဘာသာရပ်ကို သင်ကြားသူ ၇ ဦးရှိပြီး ၎င်းတို့တွင် အိန္ဒိယလူမျိုး၊ နာဂလူမျိုးနှင့် တက္ကသိုလ်ကျောင်းတွင် ပါမေက္ခအဆင့်ရှိသူများလည်း တက်ရောက်သင်ကြားကြသည်ဟု သိရသည်။
မီဇိုရမ်တက္ကသိုလ်မှ ပါမောက္ခတစ်ဦးဖြစ်သော Pu Lalnilawma က “မြန်မာဘာသာ သင်ကြားပေးတဲ့ဆရာမက နေမကောင်းဖြစ်နေတာကြောင့် လာမယ့်အပတ်မှ အတန်းကိုပြန်စတက်နိုင်မှာဖြစ်တယ်။ လက်ရှိအမည်စရင်းပေးထားတဲ့ ကျောင်းသား/သူ ၁၀ ယောက်ရှိရှိသည့်အနက် ၃ ယောက်ကပြန်မတက်တော့ လောလောဆယ်မှာ မြန်မာဘာသာကို သင်ကြားလေ့လာသူ ကျောင်းသား/သူ စုစုပေါင်း ၇ ယောက်ပဲရှိသေးတယ်၊ အခြား စိတ်ဝင်စားတဲ့ ကျောင်းသား/ သူတွေအတွက် အချိန်ဇာယားပိုင်းမှာ နည်းနည်းအခက်ခဲရှိကြတယ်၊ ဥပမာ စနေနေ့ တွေမှာ ဒီမြန်မာဘာသာရပ်ကို သင်မယ်ဆိုရင် တက်ချင်တဲ့ကျောင်းသား/သူ တွေပိုများများတက်လာနိုင်ကြမှာ” ဟု ပြောသည်။
ယခုအစီစဉ်ကို ချင်းရေးရာအဖွဲ့ချုပ် (ICA) နင့် မီဇိုရမ်တက္ကသိုလ် (MZU) တို့၏ပူးပေါင်းဆောင်ရွက်မှုဖြင့် စတင်အကောင် အထည်ဖော်ဆောင်ခြင်းဖြစ်သည်။
မြန်မာစာပေသင်ကြားပေးသည့် ဆရာမမှာ မြန်မာစာဘာသာရပ်ဖြင့် Ph.D ဘွဲ့ရရှိထားသူ Dr. Elis Thangi ဖြစ်ပြီး မြန်မာဘာသာနင့် မီဇိုးဘာသာစကားကို ကျွမ်းကျင်ပိုင်နိုင်သူဖြစ်သည်။
အဆိုပါတက္ကသိုလ်တွင် ကျောင်းသူ/ကျောင်းသားများအနေဖြင့် မြန်မာအက္ခရာ၊ ဝေါဟာရ၊ သဒ္ဒါဖွဲ့စည်းပုံနှင့် စကားပြော၊ စကားပြေအရေးအသားတို့ကို လေ့ကျင့်သင်ကြားပေးသွားမည်ဟု သိရသည်။
သင်ကြားမည့်ကာလသည် ၁၀ လကြာမြင့်မည်ဖြစ်ကာ နာရီပေါင်း ၁၂၀ ကို စသင်ခန်းအတန်းတွင် သင်ကြားပို့ချမည်ဖြစ်ပြီး ကျန် ၃၀ နာရီအား မိမိကိုယ်ကိုလက်တွေ့ လေ့လာသင်ယူရန် ဖြစ်ကြောင်း သိရသည်။
