(005MK)
မီဇိုရမ်ပြည်နယ်၏ ဒုတိယမြို့တော် Lunglei မြို့ Electric ရပ်ကွက်ကောင်စီက ၎င်းတို့ရပ်ကွက်အတွင်း နေထိုင်ကြသော မြန်မာနိုင်ငံက စစ်ဘေးရှောင်များ၏ မှတ်ပုံတင်ကဒ်ပြားများကို သိမ်းဆည်းထားသည်ဟု သိရသည်။
Electric ရပ်ကွက်ကောင်စီရုံးက တာဝန်ရှိသူများသည် မေလ ၂၀ ရက်နေ့က ၎င်းတို့ရပ်ကွက်အတွင်း နေထိုင်ကြသော မြန်မာစစ်ဘေးရှောင်များ၏ နေအိမ်များသို့ သွားရောက်ကာ မြန်မာမှတ်ပုံတင်များကို သိမ်းဆည်းခဲ့ခြင်းဖြစ်သည်ဟု Bengvarna သတင်းဌာနကဖော်ပြသည်။
မြန်မာမှတ်ပုံတင် (နိုင်ငံသားစိစစ်ရေးကဒ်ပြား) မရှိသည့် စစ်ဘေးရှောင်များကို သတ်မှတ်ကာလအတွင်း ယူဆောင် လာကြရန်နှင့် အကယ်၍ သတ်မှတ်ကာလအတွင်းယူဆောင်လာခြင်းမရှိပါက ရပ်ကွက်အတွင်း နေထိုင်ခွင့်ပြု မည်မဟုတ်ကြောင်း ရပ်ကွက်ကောင်စီက အသိပေးထားကြောင်းသိရသည်။
မြန်မာစစ်ဘေးရှောင်များအနေဖြင့် မြန်မာနိုင်ငံ နှင့် Lunglei မြို့အား အချိန်မရွေး သွားလိုက်ပြန်လိုက် လုပ်လေ့ရှိသည့် အတွက် မူးယစ်ဆေးဝါးအပြင် ရပ်ကွက်နေဒေသခံပြည်သူများအတွက် မလိုလားအပ်သောပြသနာများဖြစ်လာနိုင်သော ကြောင့် ယခုကဲ့သို့ဆောင်ရွက်ခြင်းဖြစ်သည်ဟုသိရသည်။
စစ်ဘေးရှောင်များအနေဖြင့် လိုအပ်ချက်တစ်ခုခုရှိလာသည့်အခါ နှင့် အရေးပေါ်အခြေအနေများရှိပါက မှတ်ပုံတင်များ ကို အချိန်မရွေးပြန်ထုတ်ပေးနိုင်ရန် ရပ်ကွက်ကောင်စီက စီစဉ်ထားသည်ဟု သိရသည်။
