(005MK)
မီဇိုရမ်ပြည်နယ် ဝန်ကြီးချုပ် ပူးလာလ်ဒိုအောမ်မာနှင့် မြန်မာစစ်ဘေးရှောင်အရေး ဆောင်ရွက်ပေးနေသော Network for Unity Association (NUA) ဦးဆောင်သူများ ယနေ့ ဇူလိုင် ၂၅ ရက်နေ့တွင် တွေ့ဆုံခဲ့ကြသည်ဟု သိရသည်။
မီဇိုရမ်ပြည်နယ် အိုင်ဇောလ်မြို့အခြေစိုက် NUA အဖွဲ့မှ ဦးဆောင်သူများကို မီဇိုရမ်ပြည်နယ်ဝန်ကြီးချုပ်က ယနေ့ မနက်ပိုင်း ၁၀ နာရီတွင် သူ၏ရုံးခန်းသို့ ခေါ်ယူတွေ့ ဆုံခဲ့ပြီး စစ်ဘေးရှောင်အခြေအနေနှင့် ချင်းလူမျိုးများ၏ စည်းလုံးညီညွတ်မှုအခြေအနေများကို မေးမြန်းဆွေးနွေးခဲ့ကြသည်ဟု NUA တာဝန်ရှိသူတစ်ဦးထံမှ သိရသည်။
လာမည့်လထဲတွင် အမေရိကန်ပြည်ထောင်စုကို သွားရောက်မည်ဖြစ်ကာ ချင်းလူမျိုးများအကြား စည်းလုံးညီညွတ်ရေး ပိုမိုအားကောင်းလာစေရေးအတွက် သက်ဆိုင်ရာအဖွဲ့အစည်းများနှင့် တွေ့ဆုံ၍ ဆွေးနွေးပြောဆိုသွားမည်ဟုလည်း ဝန်ကြီးချုပ်က NUA ဦးဆောင်သူများထံ ပြောဆိုခဲ့သည်ဟု သိရသည်။
သို့သော်လည်း အဆိုပါခရီးစဉ်အခြေအနေ အသေးစိတ်ကို ပြောဆိုခြင်းမရှိပေ။
မီဇိုရမ်ပြည်နယ်အတွင်း နေထိုင်ကြသော ချင်းနိုင်ငံရေးသမားများ၊ ချင်းအဖွဲ့အစည်းများကြားတွင် စည်းလုံးညီညွတ်မှုရှိစေရန် ဆန္ဒရှိကြောင်း ယင်းအတွက် တတ်နိုင်သည့်ဘက်မှ အတူတကွ ဝိုင်းဝန်းကြိုးစားဆောင်ရွက်ကြရန်လည်း ပူးလာလ်ဒိုအောမ်မာက ပြောဆိုခဲ့သည်ဟု သိရသည်။
အိန္ဒိယဗဟိုအစိုးရက မီဇိုရမ်ပြည်နယ်အတွင်းရှိ စစ်ဘေးရှောင်များနှင့် သဘာဝဘေးဒဏ်သင့်ပြည်သူများအတွက် ဆန် ထောက်ပံ့နိုင်ရေး ရူပီးသိန်း ၅၀၀ ပေးအပ်မည်ဖြစ်ပြီး မြန်မာ-ဘဂ်လားဒေရှ့်နှင့် မဏိပူရ်ပြည်နယ်တို့မှ မိမိအသက်လုံခြုံရေးအတွက် ထွက်ပြေးလာကြသော စစ်ဘေးရှောင်များအား အကူအညီများပေးအပ်မည်ဖြစ်ကြောင်း ဝန်ကြီးချုပ်က ပြောဆိုခဲ့သည်ဟု သိရသည်။
Network for Unity Association (NUA) သည် မီဇိုရမ်ပြည်နယ်အတွင်းရှိ မြန်မာစစ်ဘေးရှောင်များအရေး ကူညီဆောင်ရွက်နေကြသော အဖွဲ့အစည်းပေါင်း ၁၃ ဖွဲ့ဖြင့် စုပေါင်းဖွဲ့စည်းထားသော အဖွဲ့ဖြစ်သည်။
မီဇိုရမ်ပြည်နယ်အတွင်းရှိ မြန်မာစစ်ဘေးရှောင်များအား စားနပ်ရိက္ခာထောက်ပံ့ခြင်း၊ အခမဲ့ကျန်းမာရေးစစ်ဆေးမှုများပြုလုပ်ခြင်း၊ စစ်ဘေးရှောင် ကလေးငယ်များကောင်းမွန်စွာ ပညာသင်ကြားနိုင်ရေးတို့အတွက် ဆောင်ရွက်ပေးလျှက်ရှိကြောင်း သိရသည်။
