အိန္ဒိယ-မြန်မာနယ်စပ် အမှတ် (၂) နယ်စပ်ကုန်သွယ်ရေးစခန်းအခြေစိုက်ရာ ဖလမ်းမြို့နယ်၊ ရိခေါ်ဒါရ်မြို့အမှတ် (၂) ရပ်ကွက် (တီအိုချောင်း) တောင်ကုန်းပေါ်မှာ အင်အား ၄၀ လောက်ရှိတဲ့ စစ်ကောင်စီတပ်ဖွဲ့တွေ ဖေဖော်ဝါရီလ ၂၇ ရက်နေ့ကစပြီး စခန်းချနေရာယူထား တယ်လို့ ဒေသခံတွေထံကနေသိရပါတယ်။
“အမှတ် ၂ ရက်ကွက်အပေါ်တောင်ကုန်းမှာ ချတာပေါ့ Duty လုပ်တာပေါ့ လူအင်အားက ၄၀ လောက်ရှိတယ်၊ တီးတိန်-ဟိုင်မွလ်-ကလေးလမ်းကို CDF/PDF က အနှောက်ယှက်ပေးတယ်လို့သတင်းကြားလို့တဲ့ ပိုက်ဆံတွေကောက်တယ် အဲလို လုပ်တယ်ဆိုပြီးမှ အပေါ်ကအမိန့်လာတယ်တဲ့ လိုင်းပေါ်မှာတက်တက်နေတော့ အထက်ကနေ နေခိုင်းတယ်လို့ပြောတာပဲ’’ လို့ အမည်မဖော်လိုတဲ့ဒေသခံတစ်ဦးကပြောပါတယ်။
စစ်ကောင်စီခန့် ချင်းပြည်နယ်ဝန်ကြီးချုပ် ဦးငွန်ဆန်းအောင်က ရိခေါဒါရ်မြို့မှာ လုံခြုံရေးတပ်ဖွဲ့တွေထပ်မံချပေးဖို့ အာဏာ သိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ထံတင်ပြခဲ့တယ်လို့သတင်းထွက်ပေါ်ပြီး သိပ်မကြာခင်မှာပဲ ခုလို စစ်ကောင်စီတပ်ဖွဲ့ စခန်းချနေရာယူလာတာဖြစ်ပါတယ်။
ရိခေါဒါရ်မြို့ဟာ အိန္ဒိယ-မြန်မာနယ်စပ်ကုန်သွယ်ရေးရဲ့ အဓိကအချက်အချာကျတဲ့မြို့ဖြစ်ပြီး ရိ ကုန်သွယ်ရေးစခန်းနဲ့ နှစ်မိုင်လောက်အကွာမှာ CDF တပ်ဖွဲ့တွေက ကုန်ပစ္စည်းတွေစစ်ဆေးတာ၊ အခွန်ကောက်ခံမှုတွေလုပ်ဆောင်နေ တာကြောင့် စစ်ကောင်စီပုံရိပ်ကျဆင်းစေပြီး လုံခြုံရေးတပ်ဖွဲ့တွေပြန်ထားသင့်တယ်ဆိုပြီး ဦးငွန်ဆန်းအောင်က ဖေဖော်ဝါရီလ ၁၃ ရက်နေ့က နေပြည်တော်မှာပြုလုပ်တဲ့ စစ်ကောင်စီဥက္ကဌနဲ့ တိုင်း၊ပြည်နယ်ဝန်ကြီးချုပ်တွေ အစည်း အဝေးမှာ တင်ပြခဲ့တာလို့သိရပါတယ်။
စစ်ကောင်စီတပ်ဖွဲ့ဟာ ယခင်ကတော့ ရိခေါဒါရ်မြို့အမှတ် (၁) ရပ်ကွက်တောင်ကုန်းပေါ်မှာသာ စခန်းချနေထိုင်ကြပေမယ့် ခုအခါမှာတော့ အမှတ် (၂) ရက်ကွက်တောင်ကုန်းပေါ် ကလေး-တီးတိန်-ရိ ကုန်သွယ်ရေးလမ်းကို အပေါ်စီးကနေ အကုန်မြင်နိုင်တဲ့ ဗျူဟာကျတဲ့နေရာမှာ ခြေကုတ်ယူလာတာဖြစ်ပါတယ်။
အခုလို စစ်ကောင်စီတပ်သားတွေ တောင်ကုန်းပေါ်မှာ နေရာယူလာတာကြောင့် ကလေးမြို့ဘက်ကနေ တက်လာတဲ့ ကားတွေကို တီးတိန်မြို့နယ် လိုင်သွီးရွာမှာ ရပ်နားထားကြပြီး အခြေအနေစောင့်ကြည့်နေကြတယ်လို့သိရပါတယ်။
