(006SV)
ချင်းပြည်နယ်၊ ဟားခါးမြို့ပေါ်တွင် မြို့နယ်ရဲတပ်ဖွဲ့မှူး စီးနှင်းလာသည့် ကားကို ချင်းကာကွယ်ရေးတပ်ဖွဲ့ CDF – ဟားခါးက တိုက်ခိုက်ရာ မြို့နယ်ရဲတပ်ဖွဲ့မှူးအပါအဝင် ရဲ ၃ ဦး ထိခိုက်ဒဏ်ရာများ ရရှိသည်ဟု သိရသည်။
စစ်ကောင်စီ၏ ချင်းပြည်နယ်အစိုးရအဖွဲ့ ရုံးစိုက်ရာ ဟားခါးမြို့ပေါ်တွင် ဇန်နဝါရီလ ၄ ရက်က လွတ်လပ်ရေးနေ့အခမ်းအနား တက်ရောက်ရန် လာသော ဟားခါး မြို့နယ်ရဲတပ်ဖွဲ့မှူး၏ ကားကို မြို့ပေါ်တနေရာမှာ တိုက်ခိုက်ခဲ့ခြင်းဖြစ်သည်ဟု CDF – ဟားခါးမှ ပြောရေးဆိုခွင့်ရှိသူက ပြောသည်။
“တိုက်ပွဲကတော့ ခဏလေးပါ။ သူတို့ကားလာတဲ့အချိန်ကို ပစ်ပြီးတော့ ကိုယ့်လူတွေကို ပြန်ဆုတ်ခိုင်းတာပါ။ မြို့တွင်းဆိုတော့ အကြာကြီးပစ်လို့လည်း အဆင်မပြေဘူးဆိုတော့။ သူတို့ကားက မှောက်သေးတယ်။ ပလက်ဖောင်းပေါ်ကတက်ပြီးတော့ ဆိုင်ခန်း ၂ ခန်းကို ဝင်တိုက်ပြီးတော့ ကားလည်း တော်တော်လေး ပျက်စီးသွားတယ်။ သေသွားပြီထင်ပြီးတော့ ကိုယ့်လူတွေ ပြန်ဆုတ်ခိုင်းတာပါ” ဟု CDF – ဟားခါးမှ ပြောရေးဆိုခွင့်ရှိသူက ပြောသည်။
ချင်းပြည်နယ်အစိုးရရုံးတွင် လွတ်လပ်ရေးနေ့အခမ်းအနားကို ၄ နာရီ မီနစ် ၂၀ မှာ ကျင်းပရန် စီစဉ်ထားမှုကို သိရှိပြီး မြို့နယ် ရဲတပ်ဖွဲ့မှူးနှင့် တပ်ဖွဲ့ဝင် ၄ ဦးခန့် စီးနှင်းလာသောကားကို စောင့်ကြိုပစ်ခတ်နိုင်ခြင်းဖြစ်သည်ဟု သိရသည်။
ဟားခါး မြို့နယ်ရဲတပ်ဖွဲ့မှူးသည် မျက်စိ ထိခိုက်ပျက်စီးသွားပြီး ရဲတပ်ဖွဲ့ဝင် ၂ ဦးသည် ကျည်ထိဒဏ်ရာများနှင့် ကားမှန် ထိခိုက်ဒဏ်ရာများ ရရှိခဲ့ကြောင်း၊ ၎င်းတို့စီးနင်းလာသော ကားသည် လမ်းဘေးဆိုင်ခန်းများကို ဝင်တိုက်ပြီး ပျက်စီးသွားသည်ဟု သိရသည်။
ယင်းစစ်ဆင်ရေးတွင် CDF – ဟားခါးမှ ရဲဘော်များ အထိအခိုက်မရှိဘဲ ပြန်လည်ဆုတ်ခွာနိုင်ခဲ့သည်ဟု သိရသည်။
ဟားခါးမြို့အနီး Kiamtlang စခန်းတွင် တပ်စွဲထားသော စစ်ကောင်စီတပ်ဖွဲ့ဝင် ၁ ဦးသည် MA 11 သေနတ် ၁ လက်၊ ကျည်ဘောင် ၃ ခု၊ ခဲယမ်းတချို့နှင့်အတူ CDF – ဟားခါးထံသို့ ဇန်နဝါရီလ ၃ ရက်က အလင်းဝင်ရောက်လာသည်ဟု သိရသည်။
