ချင်းပြည်နယ် ဖလမ်းမြို့နယ် ထန်နှီယာရ်ရွာသစ် (Thanhniar Khuathar) မှာ အဏာသိမ်းစစ်တပ်က အသက် ၇၀ အရွယ်အဘွားအိုတစ်ဦးကို အဓမ္မပြုကျင့်ပြီးနောက် သတ်ဖြတ်သွားသည်ဟု စုံစမ်းသိရှိရသည်။
အဆိုပါဖြစ်ရပ်မှာ ဖလမ်းမြို့မှ ၇ မိုင်ခန့်အကွာ ထန်နှီယာရ်ရွာသစ်မှာ ဧပြီလ ၂၆ ရက် တနင်္ဂနွေနေ့က ဖြစ်ပွားခဲ့ခြင်း ဖြစ်ပြီး ယနေ့ဧပြီလ ၂၉ ရက်နေ့ကျမှ ရွာသားများက သေဆုံးနေသည့်ရုပ်အလောင်းကို တွေ့ရှိခဲ့ကြခြင်းဖြစ်သည်။
ဖြစ်စဉ်မှာ အာဏာသိမ်းစစ်တပ်သည် ဧပြီလ ၂၅ ရက်နေ့က ဖလမ်းမြို့ကိုသိမ်းပိုက်ခဲ့ပြီးနောက်မှာ တပ်ဖွဲ့ဝင်တချို့သည် ဖလမ်း-ဟားခါးလမ်း ဘက်ကို ဆက်လက်စစ်ကြောင်းထိုးခဲ့ကြပြီး ဖလမ်းမြို့အထွက် Lungrang ကျေးရွာအနီးမှာတည် ရှိသော Thanhniar ရွာသစ်ကို ဝင်ရောက်ခဲ့ကြသည်ဟု သိရသည်။
ထိုကဲ့သို့ ရွာထဲဝင်ရောက်သည့်အချိန်တွင် ဘေးလွတ်ရာသို့တိမ်းရှောင်နိုင်ခြင်းမရှိဘဲ နေအိမ်၌ ကျန်နေရစ်ခဲ့သော အသက် ၇၀ အရွယ် အဘွားအိုကို အာဏာသိမ်းစစ်သားများက နေအိမ်အတွင်းအဓမ္မပြုကျင့်ပြီးနောက် နဖူးတည့် တည့်ကို သေနတ်ဖြင့်ပစ်သတ်ခဲ့ကြသည်ဟု ရွာသားများထံမှသိရသည်။
“အဲဒီအဘွားကရွာမှာကျန်နေရစ်ခဲ့တာ၊ တောထဲကိုတိမ်းရှောင်သွားကြတဲ့ သူ့တူလေးနဲ့ အမျိုးတစ်ယောက်က တနင်္ဂနွေ နေ့မှာ ဝက်စာကြွေးဖို့ နေအိမ်ပြန်လာတဲ့အခါမှာ အိမ်ထဲကနေ အဘွားက အော်ဟစ်နေတာကြားရတယ်၊ စစ်သားတွေလ ည်းရှိနေတော့ မသွားရဲကြဘဲ တောထဲကိုပြန်လှည့်သွားကြတယ် ဒီနေ့မနက်ပိုင်းကျမှ အဲဒီအဘွားအိမ်ကို ပြန်သွားကြည့် အချိန်မှာ ကုတင်မှာအဝတ်ဗလာနဲ့ နဖူးတည့်တည့်မှာသေနတ်ဒဏ်ရာနဲ့သေဆုံးနေတာကို တွေ့ရှိခဲ့ကြ တာ” ဟု Thanhniar ရွာသစ်ဒေသခံတစ်ဦးကပြောသည်။
အာဏာသိမ်းစစ်သားများသည် Thanhniar ရွာမှပြန်ထွက်သွားသည့်အချိန်တွင် အဘွားအို၏ရုပ်အလောင်းကို နေအိမ် နှင့်အတူ မီးရှို့ခဲ့ကြသော်လည်း နေအိမ်မှာ မီးလောင်ခြင်းမရှိခဲ့ကြောင်းသိရသည်။
ယခုလက်ရှိတွင် အာဏာသိမ်းစစ်တပ်သည် Thanhniar ရွာသစ်အနီး Lungrang ကျေးရွာတွင် နေရာယူတပ်စွဲထားကြ သည့်အတွက် အဘွားအို၏ ရုပ်အလောင်းကိုလည်း ရွာသားများမသယ်ရဲကြသေးကြောင်းသိရသည်။
အာဏာသိမ်းစစ်တပ်သည် ချင်းပြည်နယ်မြောက်ပိုင်းက စစ်ရေးအချက်အချာကျသော ဖလမ်းမြို့ကို မြေပြင် နဲ့ လေကြောင်း၊ လက်နက်ခဲယမ်းသာလွန်အင်အားဖြင့် ၇ လနီးပါးအကြာ အပြင်းအထန်ထိုးစစ်ဆင်တိုက်ခိုက်ခဲ့ပြီးနောက် ဧပြီလ ၂၅ ရက်နေ့မှာ ပြန်လည်ထိန်းချုပ်နိုင်ခဲ့ခြင်းဖြစ်သည်။
ဆူရ်းဘုန်လေဆိပ်နှင့် ၂၆၈ တပ်ကုန်းအပါအဝင် ဖလမ်းမြို့၏နေရာအများစုမှာ အာဏာသိမ်းစစ်တပ်က နေရာယူတပ်စွဲ ထားပြီး တပ်ဖွဲ့ဝင်တချို့မှာ ဖလမ်း-ဟားခါးလမ်းဘက်သို့ ဆက်လက်၍ထိုးစစ်ဆင်ခဲ့ကြသည်။
