မဏိပူရ်ပြည်နယ် အဓိကရုဏ်းအတွင်း ဘုရားကျောင်း ၂၅၀ ကျော်မီးရှို့ဖျက်ဆီးခံရပြီး လူပေါင်း ၁၀၀ ကျော်သေဆုံးမှုရှိပြီ

(05MK)

မဏိပူရ်ပြည်နယ်တွင် လူများစုက သည်းလူမျိုးနှင့် လူနည်းစုတောင်တန်းသားများ (ချင်း-ကူကီးအနွယ်ဝင်) အကြား ဖြစ်ပွား နေသော အဓိကရုဏ်းအတွင်းမှာ ခရစ်ဘာသာဝင်များ၏ ဘုရာကျောင်း ၂၅၀ ကျော် မီးရှို့ဖျက်ဆီးခံရပြီး လူပေါင်း ၁၃၀ ကျော် သေဆုံးခဲ့ပြီဟု Indigenous Tribal Leaders’ Forum (ITLF) က ပြောဆိုသည်။ 

Indigenous Tribal Leaders’ Forum (ITLF) သည် မဏိပူရ်ပြနယ်အတွင်းရှိ တောင်တန်းသားများအားလုံး ပါဝင်စုဖွဲ့ ထား သောအဖွဲ့ဖြစ်ပြီး ယင်းအဖွဲ့၏ ကောက်ယူထားသောစာရင်းအရ ကသည်းလူမျိုးများ၏ မီးရှို့ဖျက်ဆီးမှုကြောင့် ဘုရား ကျောင်း ၂၅၀ ကျော်နှင့် ဘာသာရေးအဆောက်အဦး ၉၀ ကျော် ပျက်စီးခဲ့ပြီဟု The Aizawl Post က ဖော်ပြသည်။ 

ယခုဖြစ်ပွားနေသော ပဋိပက္ခအတွင်းမှာ ချင်း-ကူကီအနွယ်ဝင် တောင်တန်းသား ၁၃၀ ကျော် သေဆုံးခဲ့ပြီး ယင်းအနက် အယောက် ၅၀ ကျော်မှာ အတည်ပြု၍မရဘဲ ပျောက်ဆုံးနေသည်ဟု ITLF က ဆိုသည်။ 

ထို့အပြင် ချင်း-ကူကီးအနွယ်ဝင် တောင်တန်းသားများနေထိုင်သော ကျေးရွာပေါင်း ၁၆၀ ကျော်က လူနေအိမ်ခြေ ၄၅၀၀ ကျော် မီးရှို့ဖျက်ဆီးခံရပြီ လူဦးရေ ၄ သောင်းနီးခန့်မှာ အိုးအိမ်မဲ့ဖြစ်ခဲ့ရသည်ဟု ITLF က ပြောဆိုသည်။ 

ယခုလက်ရှိတွင်လည်း ဒဏ်ရာရရှိသူလည်း အများအပြားရှိနေပြီး မဏိပူရ်ပြည်နယ် Lamka ခရိုင်ဆေးရုံတွင် ဒဏ်ရာကြောင့် ဆေးကုသမှုခံယူသူ ၂၀၀ ကျော်ရှိပြီဟု သိရသည်။ 

မဏိပူရ်ပြည်နယ်တွင် လူများစုဖြစ်သော ကသည်း (Meitei) လူမျိုးများသည် လူနည်းစုတောင်တန်းသားများအတွက် အိန္ဒိယဖွဲ့စည်းပုံအခြေခံဥပဒေမှာ ပြဌာန်းထားသော (Scheduled Tribe) မှာ ပါဝင်နိုင်ရန် ကာလကြာရှည် တောင်းဆိုလာခဲ့ကြသည်။

ယင်းတောင်းဆိုမှုကို ဆန့်ကျင်ကန့်ကွက်သည့်အaနေဖြင့် မေလ ၃ ရက်နေ့က မဏိပူရ်ပြည်နယ် Churachanpur မြို့တွင် ချင်း-ကူကီးအနွယ်ဝင် တောင်တန်းသားများက စည်းလုံးညီညွတ်ရေးချီတက်ပွဲ “Solidarity March” ဆန္ဒပြပွဲပြုလုပ်ခဲ့ကြသည့်အပြီးတွင် ကသည်းလူမျိုးနှင့် ချင်း-ကူကီးအနွယ်ဝင် တောင်တန်းသားများအကြား ပဋိပက္ခများ စတင်ဖြစ်ပွားလာခဲ့ကြခြင်းဖြစ်သည်။

ယခုပဋိပက္ခကြောင့် မဏိပူရ်ပြည်နယ်အတွင်းရှိ ချင်း-ကူကီးအနွယ်ဝင်တောင်တန်းသား ၅ သောင်နီးပါးခန့် နေရပ်စွန့်ခွါ ထွက်ပြေးခဲ့ကြရပြီး မီဇိုရမ်ပြည်နယ်တွင်လည်း လူဦးရေ တစ်သောင်းကျော် ထွက်ပြေးတိမ်းရှောင်လျှက်ရှိကြသည်။