လူသတ် ခုန်ပျံ/ ကြွမိုင်းနှင့် ရှေ့ထွက်/ ဦးတည်မိုင်း တွေ ဘယ်လိုအလုပ်လုပ်သလဲ? ကြိုတင် သိရှိနားလည်ခြင်းအားဖြင့် ဘယ်လို ကာကွယ်မလဲ?
လူသတ် ခုန်ပျံ/ကြွမိုင်း
• ဒီမိုင်းက နင်းမိတဲ့အခါ ဒါမှမဟုတ် တိုက်ကြိုးကို ထိမိတဲ့အခါ မိုင်းကိုယ်ထည်က ၁ မီတာအမြင့်လောက်ထိ လေပေါ် မြောက်တက်လာပါတယ်။ အဲဒီလို လေပေါ်မြောက်တက်လာပြီးမှ ပေါက်ကွဲတာဖြစ်ပါတယ်။
• ဘာကြောင့် ပိုအန္တရာယ်ရှိသလဲ ဆိုရင် သူက မြေပြင်ပေါ်မှာ ပေါက်ကွဲတာမဟုတ်ဘဲ လေထဲမှာ ပေါက်ကွဲတာဖြစ်တဲ့အတွက် အစအနတွေဟာ မြေကြီးထဲ နစ်ဝင်မသွားဘဲ လူ့ခန္ဓာကိုယ်ရဲ့ အရေးကြီးတဲ့ အစိတ်အပိုင်းတွေ (ဦးခေါင်း၊ ရင်ဘတ်၊ ဝမ်းဗိုက်) ရှိရာ အမြင့်ကို တိုက်ရိုက်လွင့်စင်လာပါတယ်။ ဒါကြောင့် ခြေထောက်ပြတ်ရုံတင်မကဘဲ တခြားခန္ဓာကိုယ်ထိပါ ထိခိုက်နိုင်သလို အသက်သေဆုံးစေဖို့အထိ ရည်ရွယ်တာဖြစ်ပါတယ်။
• အသွင်အပြင်နှင့် အမှတ်အသား တွေကတော့ များသောအားဖြင့် သံဗူးပုံစံ (ဆလင်ဒါပုံစံ) ရှိပြီး သံနဲ့ ပြုလုပ်ထားပါတယ်။ မြေကြီးပေါ်မှာ “ဦးမှို” လို့ခေါ်တဲ့ သံချောင်းလေးတွေ ဒါမှမဟုတ် အာရုံခံတံလေးတွေ ပြူထွက်နေတာကိုပဲ မြင်ရတတ်ပါတယ်။ မြေကြီး ဒါမှမဟုတ် သစ်ရွက်ခြောက်တွေကြားထဲက သံစူးလေးတွေ ပြူထွက်နေရင် ဒါဟာ ကြွမိုင်းဖြစ်နိုင်ပါတယ်။
လူသတ် ရှေ့ထွက်/ဦးတည်မိုင်း
• ရှေ့ထွက် ဒါမှမဟုတ် ဦးတည်မိုင်းပါ။ တခြားမိုင်းတွေက ဘေးပတ်ပတ်လည်ကို ပေါက်ကွဲပေမယ့် ဒီမိုင်းကတော့ သတ်မှတ်ထားတဲ့ လမ်းကြောင်းအတိုင်း ရှေ့တည့်တည့်ကိုပဲ ဦးတည်ပေါက်ကွဲအောင် ပြုလုပ်ထားတာဖြစ်ပါတယ်။ သူ့ကို အများဆုံး တွေ့မြင်ရတတ်တဲ့ နေရာတွေကတော့ မြေကြီးပေါ်မှာ ဒေါက်တိုင်လေးတွေနဲ့ ထောင်ထားတာ ဒါမှမဟုတ် သစ်ပင်တွေမှာ ကပ်ပြီး တပ်ဆင်ထားတာ ဖြစ်ပါတယ်။
• ပေါက်ကွဲမှု သဘောသဘာဝ – မိုင်းရဲ့ အတွင်းဘက်မှာ သံလုံးလေးပေါင်း ရာနဲ့ချီ စီထည့်ထားပါတယ်။ ပေါက်ကွဲတဲ့အခါ အဲ့ဒီသံလုံးလေးတွေဟာ အရှိန်ပြင်းပြင်းနဲ့ ရှေ့ကို လွင့်စင်သွားတာကြောင့် မီတာ ၅၀ ကနေ ၁၀၀ အကွာအဝေး အတွင်းမှာရှိတဲ့ ရန်သူ ဒါမှမဟုတ် ပစ်မှတ်ကို အစုလိုက်အပြုံလိုက် ထိခိုက်သေဆုံးစေပါတယ်။
• ပေါက်ကွဲစေသည့် နည်းလမ်း – သူကို ကြိုးနဲ့သွယ်တန်းထားပြီး အဲဒီကြိုးကို ထိမိတဲ့အခါ ပေါက်ကွဲစေနိုင်သလို၊ လူကိုယ်တိုင် ခလုတ်နှိပ်ပြီး Remote Control နဲ့ ဖောက်ခွဲတာမျိုးလည်း လုပ်နိုင်ပါတယ်။ မြေပြင်အထက်မှာ ရှိနေတာကြောင့် သူ့ရဲ့ အကွေးပုံသဏ္ဍာန်ကို မမြင်ရအောင် သစ်ရွက်တွေ၊ ပိုက်ကွန်တွေနဲ့ ဖုံးအုပ်ထားတတ်ပါတယ်။
• မြန်မာနိုင်ငံမှာ လက်နက်ကိုင်တပ်ဖွဲ့တွေအနေနဲ့ တစ်ဖက်နဲ့တစ်ဖက် ရန်သူများ ကျဆုံးစေရန် ရည်ရွယ်ပြီး မိုင်းဆွဲတိုက်ခိုက်တဲ့အခါ ဒီလိုမိုင်းအမျိုးအစားတွေကို အများဆုံး အသုံးပြုနေတာကို တွေ့ရှိရပါတယ်။
