(005MK)
အိန္ဒိယဗဟိုအစိုးရအနေဖြင့် မြန်မာနယ်စပ်တလျှောက်ခြံစည်းရိုးခတ်မည့်အစီစဉ်ကို မီဇိုရမ်ပြည်သူလူထုက သဘောမတူ ကြောင်း မီဇိုရမ်ပြည်နယ်အထက်လွှတ်တော်အမတ် Rajya Sabha MP Pu K.Vanlalvena က ပြောဆိုလိုက်သည်။
နယူးဒေလီမြို့တွင် လွတ်တော်အစည်းအေ၀းတက်ရောက်နေသော မီဇိုရမ်ပြည်နယ်အထက်လွှတ်တော် Pu K.Vanlalvena သည် ယနေ့တွင် အိန္ဒိယပြည်ထဲရေး၀န်ကြီး Amit Shah ထံသို့ အိတ်ဖွင့်ပေးစာတစ်စောင်ပေးပို့လိုက်ပြီး နယ်စပ်အရေးနှင့်ပတ်သက်သော အိန္ဒိယအစိုးရ၏အစီစဉ်သည် မီဇိုရမ်ပြည်သူလူထုတရပ်လုံးမှ သဘောမတူကြောင်း ဖော်ပြထားသည်။
ဗြိတိသျှအစိုးရက လွဲမှားစွာသတ်မှတ်ခဲ့သော နယ်နိမိတ်ကြောင့် ချင်း (ဇိုး) မျိုးနွယ်စုများသည် အိန္ဒိယ-မြန်မာ-ဘဂ်လားဒေရှ့် ၃ နိုင်ငံတွင် ပိုင်းခြားခံခဲ့ကြရပြီး အိန္ဒိယနိုင်ငံ လွတ်လပ်ရေးရပြီးချိန်ကတည်းကနေ ယနေ့ချိန်ထိလည်း အဆိုပါ နယ်နိမိတ်အား ပြောင်းလဲသတ်မှတ်ခြင်းမရှိသေးခြင်းသည် ချင်း (ဇိုး) မျိုးနွယ်စုများအား လူမျိုးရေးအရဖိနှိပ်ခြင်းဖြစ်သည်ဟု အိန္ဒိယ ပြည်ထဲရေး၀န်ကြီးထံ ပေးပို့သောစာတွင် ဖော်ပြထားသည်။
ယခုအသုံးပြုနေသော နယ်နိမိတ်ကိုပြန်လည်ပြောင်းလဲကာ အုပ်ချုပ်မှုတစ်ခုအောက်တွင် ပြန်လည်နေထိုင်ရန် မျှော်လင့်တောင်းတနေသည့်အချိန်တွင် နယ်စပ်တလျှောက်ခြံစည်းရိုးခတ်ရန်ဆောင်ရွက်လာမှုသည် ချင်း (ဇိုး) မျိုးနွယ်စုများအား တုန်လှုပ်အံ့အားသင့်စေသည်ဟု မီဇိုရမ်ပြည်နယ် အထက်လွှတ်တော်အမတ်ကဆိုသည်။
ထို့အပြင် အိန္ဒိယလွတ်လပ်ရေးရပြီးနောက် နှစ်ပေါင်းများစွာ လွတ်လွတ်လပ်လပ်ကျင့်သုံးခဲ့ကြသော Free Movement Regime (FMR) ကိုပါ ဖျက်သိမ်းဖို့ဆောင်ရွက်လာခြင်းသည်လည်း နယ်စပ်အနီးနေထိုင်ကြသော ချင်း (ဇိုး) မျိုးနွယ်စုများအတွက် လွန်စွာဒုက္ခဖြစ်စေမည်ဟု ဆိုသည်။
အိန္ဒိယဗဟိုအစိုးရသည် အိန္ဒိယ-မြန်မာနှစ်နိုင်ငံကြား လွတ်လပ်စွာ လှုပ်ရှားသွားလာမှုစနစ် Free Movement Regime အစီအစဉ်ကို ၁၉၇၀ ခုနှစ်များအတွင်း ပြဌာန်းခဲ့ခြင်းဖြစ်ပြီး ယင်းဥပဒေအရ အိန္ဒိယ-မြန်မာ နယ်စပ်တလျှောက်ရှိ ဒေသခံ များအနေဖြင့် တဘက်တချက်စီ၏ နိုင်ငံအတွင်းကို ပြည်ဝင်ခွင့်ဗီဇာမလိုဘဲ ၁၆ ကီလိုမီတာအထိ အတားအဆီးမရှိ ဝင်ရောက်သွားလာခွင့် ပြုထားခြင်းဖြစ်သည်။
ယခုအခါ ထို FMR ကိုဖျက်သိမ်းပြီး ကီလိုမီတာ ၁၆၀၀ ကျော်ရှည်လျားသော အိန္ဒိယ-မြန်မာနယ်စပ်ကို ခြံစည်းရိုးကာရံ ရန် အိန္ဒိယဗဟိုအစိုးရက စတင်အကောင်အထည်ဖော်ဆောင်ရွက်လာပြီဖြစ်သည်။
ယနေ့တွင်လည်း အိန္ဒိယ-မြန်မာ အမှတ် (၂) နယ်စပ်ကုန်သွယ်ရေး နယ်စပ်ချစ်ကြည်ရေးတံတားကိုလည်း အိန္ဒိယဘက်က စတင်ပိတ်ပင်လိုက်ကာ မြန်မာ ဘက်ကပြည်သူများကို ၀င်/ထွက်ခွင့်တားမြစ်လိုက်ပြီဟုသိရသည်။
